រាជធានីភ្នំពេញ ៖ បុរសម្នាក់ខណៈឃើញនារីម្នាក់រួម និងមិត្តភក្ដិរៀបចាំចុះពីលើម៉ូតូកង់បីដោយមានកាន់កាបូបក្នុងដៃផងក៏បានជិះម៉ូតូទៅជិតរួចបានឆក់យកកាបូបពីដៃនាងបានសម្រេច ហើយព្យាយាមជិះម៉ូតូគេចខ្លួន ប៉ុន្តែត្រូវនាងស្រែកថា«ចោរៗ» បង្កឲ្យមានការភ្ញាក់ផ្អើលឆោឡោ ។
ភ្លាមៗនោះកម្លាំងនគរបាលខណ្ឌដង្កោរួមជាមួយនគរបាលប៉ុស្តិ៍ដង្កោ ក្រោមបញ្ជាដោយផ្ទាល់ពីសំណាក់លោកវរសេនីយ៍ឯកជឹម សុីថា អធិការនគរបាលខណ្ឌដង្កោ ដែលកំពុងល្បាតនៅក្បែរនោះបានជួយអន្តរាគមន៍ដេញតាមចាប់ខ្លួនបាន ។ ដែលហេតុការណ៍នោះបានកើតឡើង កាលពីវេលា៧យប់ ថ្ងៃទី២៩ ខែឧសភា ឆ្នាំ២០២០ នៅតាមផ្លូវបេតុង បុរីឡាយគង់ ស្ថិតនៅក្នុងភូមិម័ល សង្កាត់ដង្កោ ខណ្ឌដង្កោរាជធានីភ្នំពេញ។
ជនសង្ស័យខាងលើនេះឈ្មោះ ផន អុីម ភេទប្រុស អាយុ២៧ឆ្នាំ មុខរបរមិនពិតប្រាកដ ស្នាក់នៅផ្ទះជួល ភូមិដំណាក់ធំ២ សង្កាត់ស្ទឹងមានជ័យ២ ខណ្ឌមានជ័យរាជធានីភ្នំពេញ។
ចំណែកនារីរងគ្រោះឈ្មោះ យ៉ង តូច អាយុ២២ឆ្នាំ មុខរបរកម្មការនីរោងចក្រ ស្នាក់នៅផ្ទះជួលក្នុងភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។
តាមប្រភពព័ត៌មានបានឲ្យដឹងថា ជនរងគ្រោះរួមជាមួយ និងមិត្តស្រីរបស់នាងម្នាក់ទៀតបានហៅម៉ូតូកង់បី១គ្រឿង ជិះចេញពីបន្ទប់ជួលមួយកន្លែងដែលស្ថិតនៅក្នុងភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ ធ្វើដំណើរទៅហូបមីឆានៅក្នុងបុរីឡាយគង់ ដែលមានទីតាំងស្ថិតនៅក្នុងភូមិម័ល សង្កាត់ដង្កោ ខណ្ឌដង្កោ។
លុះពេលទៅដល់ត្រង់ចំណុចកន្លែងលក់មីឆាខាងលើ ខណៈដែលនាងបម្រុង និងចុះពីលើម៉ូូកង់បីចូលទៅហូបមីឆា ស្រាប់តែជនសង្ស័យឈ្មោះ ផន អុីន ជិះម៉ូតូ០១គ្រឿងម៉ាកហុងដាឌ្រីមសេ១២៥ ពណ៌ខ្មៅគ្មានស្លាក លេខតែម្នាក់ឯងធ្វើសកម្មភាពឆក់យកកាបូបលុយរបស់នាងបានសម្រេចរួចជិះម៉ូតូគេចខ្លួន ។
ប្រភពដដែលបានបន្តថា នៅក្នុងកាបូបលុយនោះមានលុយចំនួន២០៦,០០០រៀល (ម្ភៃម៉ឺនប្រាំមួយពាន់រៀល) និង២១ដុល្លារ រួមនិងទូរស័ព្ទដៃម៉ាកOppo ១គ្រឿងពេលនោះជនរងគ្រោះក៏បានស្រែកឆោឡោថា«ចោរៗ» បង្កឲ្យមានការភ្ញាក់ផ្អើលដល់កម្លាំងនគរបាលខណ្ឌដង្កោ រួមជាមួយនគរបាលប៉ុស្តិ៍ដង្កោ ។
ក្រោមបញ្ជាដោយផ្ទាល់ពីសំណាក់លោកវរសេនីយ៍ឯកជឹម សុីថា អធិការនគរបាលខណ្ឌដង្កោ ដែលកំពុងល្បាតនៅក្បែរនោះ បានជួយអន្តរាគមន៍ដេញតាមចាប់ខ្លួន ខណៈនោះជនសង្ស័យបាន ជិះរត់រហូតដល់បុរីភ្នំមាសស្ថិតនៅក្នុងភូមិម័ល សង្កាត់ដង្កោខណ្ឌដង្កោ ក៏បានផ្តួលម៉ូតូរត់គេចខ្លួនទៅក្នុងប្រឡាយទឹក ហើយកម្លាំងនគរបាលខាងលើបានធ្វើការឡោមព័ទ្ធ និងឃាត់ខ្លួនបាន ។
បន្ទាប់មកជនសង្ស័យរួម និងវត្ថុតាង ត្រូវបាននាំយកទៅធ្វើការសាកសួរនៅប៉ុស្តិ៍នគរបាលរដ្ឋបាលដង្កោមួយជំហ៊ានរួចទើបញ្ជូនទៅកសន់ផ្នែកព្រហ្មទណ្ឌដង្កោ ដើម្បីសាកសួរ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធីច្បាប់៕
ចែករំលែកព័តមាននេះ