ខេត្តកំពត ៖ គិតមកទល់ថ្ងៃទី៣០ ឧសភា សាកសពកម្មកររងគ្រោះទាំងពីរនាក់ក្រោយកាយរកឃើញនៅក្រោមគំនរថ្ម ក៏ត្រូវបានប្រគល់ជូនក្រុមគ្រួសារ ដើម្បីចាត់ចែងធ្វើបុណ្យតាមប្រពៃណី ។ ជាមួយគ្នានេះដែរ ក៏មានការឧបត្ថម្ភនិងជ្រោមជ្រែងពីសំណាក់ក្រុមហ៊ុនថៃប៊ុនរុង ដោយបានផ្តល់ថវិកាជូនគ្រួសារសពក្នុងម្នាក់ៗ៣៥.០០០ដុល្លារ សម្រាប់ចូលរួមរំលែកទុក្ខដល់ក្រុមគ្រួសារ ។
សូមរំលឹកថា តាមប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា មានកម្មករពីរនាក់ធ្វើការក្នុងក្រុមហ៊ុនផលិតសុីម៉ងត៍ភ្នំល្អាង (រោងចក្រថៃប៊ុនរុង) រងគ្រោះថ្នាក់ដល់អាយុជីវិត ក្រោមបំណែកថ្មយ៉ាងអាណោចអាធ័មបំផុត ខណៈពួកគេទាំងពីរឡើងទៅបំផ្ទុះយកថ្មលើភ្នំ សម្រាប់ផលិតសុីម៉ងត៍ក្នុងរោងចក្រ ។
ប្រភពដដែលបានបញ្ជាក់ថា គ្រោះថ្នាក់នេះ បានកើតឡើងនៅនៅវេលាម៉ោង០៤ និង៤០នាទីរសៀលថ្ងៃទី២៩ ឧសភា ត្រង់ចំណុចភ្នំមួយកន្លែង ស្ថិតក្នុងភូមិល្អាង ឃុំល្អាង ស្រុកដងទង់ ខេត្តកំពត។
សមត្ថកិច្ចបានបញ្ជាក់ឲ្យដឹងទៀតថា ជនរងគ្រោះទាំងពីរនាក់រួមមាន៖ ទី១-ឈ្មោះ គុណ រ៉ាល់ ហៅតាល់ ភេទប្រុស អាយុ២៩ឆ្នាំ ជនជាតុិខ្មែរ ,ទី២-ឈ្មោះ ញឹប សារុន ភេទប្រុស អាយុ៣៣ ជនជាតិខ្មែរ ទាំងពីរនាក់ រស់នៅក្នុងភូមិសាស្ត្រស្រុកទឹកឈូ ខេត្តកំពត ដោយជនរងគ្រោះធ្វើការនៅក្រុមហ៊ុនផលិតសុីម៉ងត៍ ថៃប៊ុនរុង ដែលមានទីតាំងស្ថិតក្នុងភូមិល្អាង ឃុំល្អាង ស្រុកដងទង់ ខេត្តកំពត។
ព័ត៌មានបន្ថែមនឹងមានផ្សាយជូនបន្ត ។
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ