សូមប្រយ័ត្ន បុរសជនជាតិខ្មែរម្នាក់ទៀតហើយត្រូវបានរកឃើញថា មានផ្ទុកមេរោគកូវីដ១៩ ។ ក្រសួងសុខាភិបាលនៅថ្ងៃទី៣០ ខែឧសភា ឆ្នាំ២០២០នេះបានប្រកាសថា បុរសជនជាតិខ្មែរម្នាក់នេះវិលត្រឡប់មកពីចូលរួមសិក្សាសាសនានៅប្រទេសថៃ ។
បុរសជនជាតិខ្មែរ អាយុ២៦ឆ្នាំ រស់នៅភូមិរកាពរ៥ ឃុំរកាពរ៥ ស្រុកត្បូងឃ្មុំ ខេត្តត្បូងឃ្មុំ បានទៅចូលរួមសិក្សាសាសនាមួយនៅសាលាមួយនៃខេត្តយ៉ាឡា ក្នុងប្រទេសថៃ ហើយបានវិលត្រឡប់មកពីប្រទេសថៃវិញដោយបានធ្វើដំណើរតាមរថយន្តទេសចរណ៍១២កៅអី (មានតែក្រុមគាត់១០នាក់ និងអ្នកបើកបរ) រហូតមកដល់ច្រកចូលអូរបីជាន់ រួចបានឆ្លងចូលមកកម្ពុជា នៅថ្ងៃទី២៨ ខែឧសភា ឆ្នាំ២០២០ ។
បុរសរូបនេះត្រូវបានក្រុមគ្រូពេទ្យយកវត្ថុសំណាករបស់គាត់ទៅវិភាគនៅវិទ្យាស្ថានប៉ាស្ទ័រកម្ពុជា ដោយទទួលបានលទ្ធផលវិជ្ជមានវីរុសកូវីដ-១៩ នៅថ្ងៃទី២៩ ខែឧសភា ឆ្នាំ២០២០ ។
បច្ចុប្បន្ន បុរសខាងលើរូបនេះត្រូវបានបញ្ជូនទៅសម្រាកព្យាបាលនៅមន្ទីរពេទ្យខេត្តមិត្តភាពកម្ពុជា-ជប៉ុន មង្គលបុរី ខេត្តបន្ទាយមានជ័យ នៅថ្ងៃដដែលនេះរួចហើយដែរ ។
ចំណែកបុរស០៨នាក់ផ្សេងទៀត មានតេស្តអវិជ្ជមានកំពុងដាក់បន្តធ្វើចត្តាឡីស័កចំនួន១៤ថ្ងៃ នៅមណ្ឌលធ្វើចត្តាឡីស័ករបស់ខេត្ត ។
រីឯបុរសម្នាក់ទៀតកំពុងរង់ចាំយកវត្ថុសំណាកទៅធ្វើការវិភាគនៅវិទ្យាស្ថានប៉ាស្ទ័របញ្ជាក់ឡើងវិញ ហើយរូបគាត់ត្រូវបានដាក់ឱ្យនៅតាមដាននៅក្នុងមន្ទីរពេទ្យខេត្តបន្ទាយមានជ័យនាពេលបច្ចុប្បន្ននេះ ៕
ចែករំលែកព័តមាននេះ