ខេត្តពោធិ៍សាត់ ៖ មានការប្រឈមមុខដាក់គ្នាមួយប្រាវ រវាងក្រុមជនខិលខូចដែលតែងតែដើររុករានដី
ព្រៃមិនចេះឆ្អែតឆ្អន់ ជាមួយកម្លាំងសមត្ថកិច្ចចម្រុះ មានអង្គការសម្ព័ន្ធមិត្តសត្វព្រៃ (Wildlife Alliance) កងរាជអាវុធហត្ថលើផ្ទៃប្រទេស និងមន្ត្រីឧទ្យានុរក្សនៃមន្ទីរបរិស្ថានខេត្ត ខណៈពេលចុះទប់ស្កាត់ការកាប់រានដីព្រៃធ្វើជាកម្មសិទ្ធិ ក្នុងតំបន់អភិរក្សធនធានធម្មជាតិជួរភ្នំក្រវាញកណ្តាល ដែលគ្រប់គ្រងដោយក្រសួងបរិស្ថាន កាលពីព្រឹកថ្ងៃទី២៧ ខែឧសភា ឆ្នាំ២០២០កន្លងមកនេះ ត្រង់ចំណុចនិយាមការលេខ 0343470-1357405 (ខ្នងភ្នំរៀល) ស្ថិតក្នុងភូមិរវៀង ឃុំសំរោង ស្រុកភ្នំក្រវាញ ខេត្តពោធិ៍សាត់។
អភិបាលស្រុកភ្នំក្រវាញនិងជាប្រធានគណៈបញ្ជាការឯកភាពស្រុក លោក សូ សាហុង បាន ឱ្យដឹងថា ក្រុមជនល្មើសមានគ្នាប្រមាណ៣០នាក់ ប្រដាប់ដោយកាំបិត និងដំបង បានមករារាំងកម្លាំងសមត្ថកិច្ចខាងលើដែលកំពុងចុះធ្វើការងារ ។ ក្រោយដឹងដំណឹងនេះភ្លាម លោក ម៉ៅ ធនិន អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពខេត្ត បានបញ្ជាកងកម្លាំងគណៈបញ្ជាការឯកភាពស្រុកភ្នំក្រវាញ ចុះទៅអន្តរាគមន៍ជាបន្ទាន់។
ក្រោយមកក្រុមជនល្មើសក៏ប្រមូលគ្នាប្រមាណជា៦០នាក់ ដើម្បីមតវ៉ានៅស្នាក់ការអង្គការសម្ព័ន្ធមិត្តសត្វព្រៃ តែនៅពេលកម្លាំងយើងទៅដល់ពួកគេ ក៏បែកហ្វូងអស់។ ក្នុងចំណោមជនល្មើសទាំងអស់ សមត្ថកិច្ចបានកំណត់មុខសញ្ញាមេខ្លោងធំៗ ដែលធ្វើសកម្មភាព បានចំនួន០៤នាក់ រួមមាន៖ ១-នួន នី ភេទប្រុស អាយុ៥៨ឆ្នាំ រស់នៅភូមិអង្គ្រង ឃុំសំរោង ស្រុកភ្នំក្រវាញ, ២-សៀម ហឿម ភេទប្រុស អាយុ៥៧ឆ្នាំ រស់នៅភូមិកំពែង ឃុំព្រងិល ស្រុកភ្នំក្រវាញ, ៣-មុត គា ភេទប្រុសអា៤៣ឆ្នាំ រស់នៅភូមិបត់រំដួល ឃុំផ្ទះរុង ស្រុកតាលោសែនជ័យ និង៤-ណាំង ណាង ភេទប្រុស អាយុ៥៦ឆ្នាំ រស់នៅភូមិព្រៃកន្លង់ ឃុំផ្ទះរុង ស្រុកតាលោសែនជ័យ។
បើតាមព័ត៌មាននៃការស៊ើបអង្កេត និងស្វាវជ្រាវច្បាស់លាស់ ក្រុមជនល្មើសទាំងអស់ មានមកពីខេត្តព្រះសីហនុ១គ្រួសារ, ខេត្តកំពង់ចាម១គ្រួសារ, ខេត្តបាត់ដំបង៣គ្រួសារ, ខេត្តកំពង់ស្ពឺ២គ្រួសារ, ខេត្តតាកែវ១គ្រួសារ និងមានមកពីស្រុកវាលវែង ស្រុកតាលោសែនជ័យ ស្រុកក្រគរ ស្រុកបាកាន ស្រុកកណ្តៀង និងក្រុងពោធិ៍សាត់ផងដែរ ។
សមត្ថកិច្ចកំពុងស្រាវជ្រាវរកមេក្លោងបន្ត ដើម្បីចាប់ខ្លួនមកផ្ដន្ទាទោសតាមច្បាប់ ហើយរូបភាពនេះអាចក្រុមប៉ុនប៉ងផ្ដួលរំលំរាជរដ្ឋាភិបាលធ្វើទុកឲ្យហើយ ដើម្បីចោទប្រកាន់នាពេលបោះឆ្នោតខាងមុខនេះ៕
ចែករំលែកព័តមាននេះ