ខេត្តតាកែវ ៖ ភ្លៀងធ្លាក់មួយមេធំមុននេះបន្តិច កំពុងតែជន់លិចផ្សារតាកែវយ៉ាងខ្លាំងក្លា ធ្វើឲ្យអាជីវករលក់ដូរស្នើដល់ថ្នាក់ដឹកនាំផ្សារ និងអ្នកប្រមូលភាស៊ីឲ្យគិតគូរដល់ការស្តាប្រព័ន្ធលូជុំវិញផ្សារ ដើម្បីបញ្ចៀសនូវការជន់លិចបែបនេះ ដែលបង្កផលវិបាកដល់អ្នកលក់ដូរក្នុងផ្សារ ។
អាជីវករខ្លះបានលើកឡើងថា ពួកគាត់បង់ភាស៊ីត្រឹមត្រូវណាស់ ដូច្នេះស្នើសុំអ្នកដើរប្រមូលលុយភាស៊ីពីក្រុមអាជីវករលក់ដូរ គួរជួយសម្រួលដល់ការសម្អាត ឬស្តាប្រពន្ធ័លូបង្ហូទឹកអោយបានល្អ ព្រោះពេលនេះគ្រាន់តែភ្លៀងធ្លាក់មួយមេ ស្រាប់តែកកកស្ទះលូរទឹកហូរចេញទៅណាមិនរួច ហើយជះក្លិនមិនល្អ ដោយសារទឹកលិចមិនត្រឹមតែទឹកលិចប៉ុណ្ណោះទេ គឺទឹកស្អុយហៀរចេញមកពីក្នុងលូស្អុយ និងមានទាំងដង្កូវចេញមកគួរអោយខ្ពើមបំផុត ។
ក្រុមអាជីវករបាននាំបន្តទៀតថា ពួកបានសុំណូមពរដល់មេភាស៊ីផ្សារ សូមជួយស្តាប្រពន្ធ័លូអោយបានស្អាតងាយស្រួលដល់ពេលមានភ្លៀងធ្លាក់មកកុំអោយមានការកកស្ទះនឹងពេលរាំងភ្លៀងទឹកក៏បានហូរអស់ផងដែរ ហើយពួកគាត់ជាអ្នកលក់ដូរមែន តែមានការខ្ចប់វេចបានត្រឹមត្រូវណាស់ ព្រោះយើងជួយសម្អាតអនាម័យទាំងអស់គ្នា ។
ទាក់ទងទៅនឹងករណីខាងលើនេះដែរ កោះសន្តិភាពយើងមិនអាចសុំការបំភ្លឺពីលោក ប៉ែន សុខា មេភាស៊ីផ្សារតាកែវបានទេនៅរសៀលនេះ ។
សូមបញ្ជាក់ថា ខេត្តតាកែវទើបតែមានភ្លៀងធ្លាក់មកខ្លាំងនៅថ្ងៃនេះទេ គឺនៅម៉ោង១២កន្លះមកទើបមានការលិចលង់បែបនេះតែម្តង ៕កែសម្រួលដោយ ៖សុឃាក់
ចែករំលែកព័តមាននេះ