រាជធានីភ្នំពេញ ៖ លិខិតកោះប្រជុំមួយរបស់ធនាគារ ជាតិនៃកម្ពុជា ផ្ញើទៅកាន់ធនាគារ ពាណិជ្ជ និងគ្រឹះស្ថានមីក្រូហិរញ្ញវត្ថុ ស្ដីពីការផ្អាកទទួលយកក្រដាសប្រាក់ ១ដុល្លារ ២ដុល្លារ និង៥ដុល្លារ ដោយកិច្ចប្រជុំនេះ បានធ្វើឡើងកាលពីព្រឹកថ្ងៃទី ២៨ ខែឧសភា ឆ្នាំ២០២០ មកនេះក្រោមវត្តមានលោកស្រី ជា សិរី ។ អ្វីដែលជាកត់សម្គាល់ លិខិតមួយ នេះ ត្រូវបានសារព័ត៌មានចុះផ្សាយដោយមានខ្លឹមសារ ផ្អាកការទទួលយកក្រដាសប្រាក់ ប្រភេទទាំងនេះនៅតាមធនាគារ ធ្វើឱ្យប្រជាពលរដ្ឋ មានការយល់ច្រឡំថា គេលែងចាយ ក្រដាសប្រាក់ដុល្លារទាំងបីប្រភេទនេះ ។
មានប្រជាពលរដ្ឋជាច្រើនលើកឡើងតាមបណ្ដាញសង្គម ថា មានអាជីវករតាមផ្សារមួយ ចំនួនចាប់ផ្ដើមមិនទទួលយកក្រដាសប្រាក់ទាំងនេះ សម្រាប់ការទូទាត់ទំនិញ ខណៈធនា គារជាតិ បានចេញសេចក្តីប្រកាសថ្មីមួយទៀតនៅល្ងាចថ្ងៃទី ២៨ ខែឧសភា ឆ្នាំ ២០២០ ដោយបញ្ជាក់ថា ក្រដាសប្រាក់ ១ដុល្លារ ២ដុល្លារ និង ៥ដុល្លារនៅតែអាចទូទាត់ និងចាយ វាយបានដដែលនៅលើទីផ្សារ ។ តែយ៉ាងណាក៏ដោយមានអាជីវករតាមផ្សារ និងកន្លែង លក់ទំនិញមួយចំនួន ហាក់មានការរើសអើសទៅលើក្រដាសប្រាក់ដុល្លារទាំងបីប្រភេទនេះ ។
បើតាមប្រជាពលរដ្ឋជាច្រើនបានទូរស័ព្ទទៅប៉ុស្តិ៍វិទ្យុក្នុងស្រុកមួយបានរាយការណ៍ថា មានអាជីវករជាច្រើនមិនព្រមទទួលយកក្រដាសប្រាក់ដុល្លារទាំងបីប្រភេទដែលធនាគារជាតិកំពុងប្រជុំពិភាក្សាថា តើបន្តទទួលយក ឬបញ្ឈប់ការទទួលយកត្រឹមកំណត់ថ្ងៃណាមួយ ។
បើតាមពលរដ្ឋម្នាក់ដែលមិនបានបញ្ចេញឈ្មោះបានប្រាប់ថា ខ្លួនបានទៅទិញទំនិញនៅ ក្នុងផ្សារក្រុងតាខ្មៅ ហើយឱ្យក្រដាសប្រាក់ ៥ដុល្លារទៅអ្នកលក់ តែអ្នកលក់ស្នើសុំក្រដាស ផ្សេងដោយប្រាប់ថា លុយ ៥ដុល្លារលែងចាយហើយ បើទោះបីខ្លួនដែលជាអ្នកទិញខំ ពន្យល់យ៉ាងណាក៏អ្នកលក់យកដែរ ។
បុរសម្នាក់ឈ្មោះ នី បម្រើការនៅក្នុងក្រុមហ៊ុនមួយក៏បាននិយាយផងដែរថា គាត់ភ្ញាក់ព្រឺត នៅពេលដែលហុចក្រដាសប្រាក់ ៥ដុល្លារទៅអ្នកលក់បែរជាគេបដិសេធទទួលយក ហើយ សុំរកក្រដាសប្រាក់ផ្សេងទៅវិញ ។ លោកបន្តថា លោកមានការព្រួយបារម្ភណាស់ ព្រោះ ថា នៅផ្ទះលោកក៏មានក្រដាសប្រាក់ប្រភេទ ១ដុល្លារ និង ៥ដុល្លារច្រើន ហើយនៅពេល ដែលអាជីវករមិនទទួលយកក្រដាសប្រាក់បែបនេះមិនដឹងថាទៅចាយនៅឯណា ។
សូមបញ្ជាក់ផងដែរថា មានកន្លែងដូរលុយខ្លះនៅម្តុំទួលគោក គឺក្រដាសប្រាក់ ១ដុល្លារ ដូរបានតែ ៣៨០០រៀល ឬក្រោម ៤០០០រៀលប៉ុណ្ណោះ ខណៈហាងឆេងប្រចាំថ្ងៃ ១ដុល្លារ ដូរបាន ៤១០០រៀល និងលក់ចេញ ១ដុល្លារស្មើពី ៤១២៥ ទៅ ៤១៣០រៀល ៕
ចែករំលែកព័តមាននេះ