រាជធានីភ្នំពេញ ៖ គួរឱ្យអាសូរខ្លាំងណាស់ដែលអន្ទិតម្នាក់ ទើបតែសឹកលាចាកសិក្ខាបទបានរយៈពេល៣ថ្ងៃប៉ុណ្ណោះ ហើយបានចាប់យកមុខរបរជាកម្មករសំណង់ជាមួយបងប្រុសបង្កើតម្នាក់ទៀត ប៉ុន្តែជាអកុសលខណៈកំពុងជិះម៉ូតូឌុបគ្នាធ្វើដំណើរតាមផ្លូវ ស្រាប់តែមានរថយន្តដឹកកុងតឺន័រគ្រឿងបើកបរក្នុងទិសដៅបញ្ច្រាសគ្នាបានបុកយ៉ាងពេញទំហឹង បណ្ដាលឲ្យអន្ទិតម្នាក់នោះបាត់បង់ជីវិតភ្លាមៗនៅនឹងកន្លែង ចំណែកឯបងប្រុសរងរបួសធ្ងន់ ហើយម៉ូតូបានជាប់នៅក្រោមរថយន្ត។
គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១និង៣០នាទីរសៀលថ្ងៃទី២៨ ខែឧសភា ឆ្នាំ២០២០ នៅតាមផ្លូវបេតុង ស្ថិតនៅក្នុងភូមិបឹងធំទី៣ សង្កាត់បឹងធំ ខណ្ឌកំបូល រាជធានីភ្នំពេញ។
ជនរងគ្រោះដែលបាត់បង់ជីវិតខាងលើឈ្មោះ ឌឹម សំភ័ស ភេទប្រុស អាយុ១៨ឆ្នាំ ទើបតែសឹកលាចាកសិក្ខាបទបានរយៈពេល៣ថ្ងៃ និងចាប់យកមុខរបរជាកម្មករសំណង់ ចំណែកបងប្រុសដែលរបួសធ្ងន់ឈ្មោះ ឌឹម សិទ្ធិ អាយុ២១ឆ្នាំ មុខរបរជាកម្មករសំណង់ ហើយជនរងគ្រោះទាំង២នាក់ស្នាក់នៅផ្ទះជួលក្នុងភូមិបឹងធំទី១ សង្កាត់បឹងធំ ខណ្ឌកំបូល និងមានស្រុកកំណើត ភូមិសេរីចំប៉ា ឃុំជ្រលង ស្រុកបារាយណ៍ ខេត្តកំពង់ធំ ។ ជនរងគ្រោះទាំង២នាក់ជិះម៉ូតូមួយគ្រឿងម៉ាកHonda Beat ពណ៌ស ពាក់ស្លាកលេខ កំពង់ធំ 1O-2255 ។
ចំណែកឯរថយន្តបង្កមួយគ្រឿងខាងលើម៉ាកហ៊្វុយហ្សូ (FUSO) ពណ៌ត្រួយចេក ពាក់ស្លាកលេខ ភ្នំពេញ 3E-3371 សណ្តោងកន្ទុយរុឺម៉កដឹកទូកុងតៃន័រ ពាក់ស្លាកលេខ ភ្នំពេញ 4A-0902 បើកបរបុរសម្នាក់ ឈ្មោះ ជុំ នាង អាយុ៥៨ឆ្នាំ មុខរបរបើកបររថយន្តឱ្យក្រុមហ៊ុនមួយ មានទីលំនៅ ភូមិដក់ទឹក សង្កាត់ស្វាយក្រវ៉ាន់ ក្រុងច្បាមន ខេត្តកំពង់ស្ពឺ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ ជនរងគ្រោះទាំង២នាក់បងប្អូនបានជិះម៉ូតូឌុបគ្នាធ្វើដំណើរក្នុងទិសដៅពីជើងទៅត្បូង លុះពេលទៅដល់ត្រង់ចំណុចកើតហេតុខាងលើ ស្រាប់តែត្រូវរថយន្តបង្កបើកបរក្នុងល្បឿនលឿនក្នុងទិសដៅបញ្ច្រាសគ្នាមកដល់បុកយ៉ាងពេញទំហឹង បណ្ដាលឲ្យអន្ទិតជាប្អូនបាត់បង់ជីវិតភ្លាមៗនៅនឹងកន្លែង ចំណែកឯយុវជនជាបងបានរងរបួសធ្ងន់ធ្ងរ។
ក្រោយពេលកើតហេតុ បុរសដែលជាអ្នកបើកបររថយន្តត្រូវបាននគរបាលឃាត់ខ្លួននាំទៅធ្វើការសាកសួរ ដោយឡែកអ្នករងរបួសធ្ងន់ត្រូវបានរថយន្តគ្លីនិកឯកជនដឹកយកទៅសង្គ្រោះ ចំណែកសពជនរងគ្រោះត្រូវក្រុមគ្រួសារដឹកយកទៅធ្វើបុណ្យតាមប្រពៃណីឯស្រុកកំណើត ។ បន្ទាប់មកនគរបាលការិយាល័យចរាចរណ៍ផ្លូវគោកនៃ ស្នងការដ្ឋាននគរបាលរាជធានីភ្នំពេញចុះទៅធ្វើការវាស់វែងនាំយករថយន្តបង្ក ព្រមទាំងអ្នកបើកបររថយន្ត និងម៉ូតូទៅរក្សាទុក ដើម្បីរង់ចាំចាត់ការតាមច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ