អ្នកនាំមុខក្នុងវិស័យកុំព្យូទ័រ គឺលោកមហាសេដ្ឋី ប៊ីល ហ្គេតស៍ (Bill Gates) ដែលជាសហស្ថាបនិកក្រុមហ៊ុន Microsoft បានចំណាយពេលរាប់សិបឆ្នាំមកហើយក្នុងការធ្វើការដើម្បីសម្រេចគោលដៅរបស់លោកមួយគឺ ធ្វើឲ្យគ្រប់គ្រួសារទាំងអស់មានកុំព្យូទ័រប្រើ ។
ដូច្នេះវាមិនគួរឲ្យភ្ញាក់ផ្អើលទេ នៅពាក់កណ្តាលទសវត្សឆ្នាំ ១៩៩០ ដែលលោក ហ្គេតស៍ ស្ថិតក្នុងចំណោមនាយកប្រតិបត្តិមួយចំនួនដែលទទួលស្គាល់ពីសក្តានុពលរបស់អ៊ីនធើណេត ។
កាលពី ២៥ឆ្នាំមុន ឬនៅថ្ងៃទី ២៦ខែឧសភាឆ្នាំ ១៩៩៥ លោក ហ្គេតស៍ បានសរសេរសេចក្តីជូនដំណឹងមួយដល់បុគ្គលិកមួយចំនួនរបស់ Microsoft ដើម្បីប្រាប់ពីអត្ថប្រយោជន៍នៃការបង្កើនវត្តមានរបស់ក្រុមហ៊ុនលើប្រព័ន្ធអ៊ីនធើណេត ។
លោកបានប្រាប់ថា អ៊ីនធើណេតផ្លាស់ប្តូរច្បាប់ទម្លាប់ និងជាឱកាសដ៏អស្ចារ្យ ខណៈដែលជាឧបសគ្គដ៏អស្ចារ្យដែរ ។ អ្វីដែលលោកចង់និយាយក្នុងសេចក្តីជូនដំណឹងខាងលើគឺអ៊ីនធើណេតកំពុងតែក្លាយជាកត្តាដ៏សំខាន់មួយដែលបានផ្លាស់ប្តូរវិធីដែលមនុស្ស និងអាជីវកម្មធ្វើទំនាក់ទំនងជាមួយគ្នាជារៀងរាល់ថ្ងៃ ។
លោក ហ្គេតស៍ គិតថាអ៊ីនធើណេតជាកន្លែងមួយដែល Microsoft ត្រូវតែចាប់យកឱកាសដើម្បីផ្គត់ផ្គង់ផលិតផលដល់អតិថិជនរបស់ខ្លួន ។ លោកបានបន្ថែមថា ការល្អប្រសើរឡើងនៃហេដ្ឋារចនាសម្ព័ន្ធសម្រាប់សេវាអ៊ីនធើណេតដែលអាចផ្តល់សំឡេង និងវីដេអូកាន់តែច្បាស់ជាងមុន គឺពិតជាសំខាន់ណាស់ក្នុងការចាប់យកអត្ថប្រយោជន៍នៃអ៊ីនធើណេត ។
មិនត្រឹមតែលោកចង់បង្កើតការទិញផលិតផល Microsoft អនឡាញទេ តែលោកថែមទាំងជំរុញឲ្យមានការច្នៃគេហទំព័ររបស់ក្រុមហ៊ុនថែមទៀតដើម្បីអនុញ្ញាតឲ្យអតិថិជនទទួលបានព័ត៌មានពីក្រុមហ៊ុន និងផលិតផលបានគ្រប់គ្រាន់ ។
នៅឆ្នាំ ១៩៩៥ លោក ហ្គេតស៍ បានព្យាករណ៍ថាក្នុងរយៈពេល ១០ឆ្នាំ មនុស្សនឹងមើលភាពយន្ត កម្មវិធីទូរទស្សន៍ និងការកម្សាន្តផ្សេងៗលើអ៊ីនធើណេតជាប្រចាំ ។ ១០ឆ្នាំក្រោយមក YouTube ត្រូវបានបង្កើតឡើង ហើយ ២ឆ្នាំកន្លងមកទៀត Netflix ត្រូវបានបង្កើត ៕
ចែករំលែកព័តមាននេះ