រាជធានីភ្នំពេញ ៖ យោងតាមលោកកែវ សារ៉េត អគ្គលេខាធិការនៃសហព័ន្ធកីឡាបាល់ទាត់កម្ពុជាបាននិយាយថា គណៈកម្មការប្រកួតបាល់ទាត់ជាតិកម្ពុជា(CNCC)សម្រេចមិនបើកការប្រកួតលីគកំពូល និងពានរង្វាន់សម្តេចតេជោ ហ៊ុន សែន តាមពេលវេលាដែលក្រសួងអប់រំ យុវជន និងកីឡាអនុញ្ញាតនោះឡើយ បើទោះជាកីឡាករ និងគណៈកម្មការអន្ទះសាររង់ចាំ ការអនុញ្ញាតឱ្យបើកប្រកួតឡើងវិញក៏ដោយ ។ ជាមួយនឹងការពន្យារពេល ទាំងគណៈកម្មការ និងកីឡាករថាក្រៅពីគ្មានការប៉ះពាល់ គឺជារឿងល្អនោះផង។
លោក កែវ សារ៉េត បានថ្លែងប្រាប់អ្នកសារព័ត៌មានថា ការប្រកួតបាល់ទាត់ដណ្ដើមពានរង្វាន់សម្ដេចតេជោ ហ៊ុន សែន នឹងបន្តអូសបន្លាយពេលដំណើរការរហូតដល់ដើមខែកក្កដា ខណៈដែលការប្រកួតនេះបានផ្អាកដំណើរការតាំងពីអំឡុងខែមេសា ។ ការសម្រេចបែបនេះ កើតឡើងពីកិច្ចប្រជុំពិភាក្សាស្វែងរកបញ្ហាប្រឈមនានារវាង CNCC ជាមួយតំណាងក្លិបនីមួយៗកាលពីថ្ងៃទី២៥ ឧសភា ឆ្នាំ២០២០ កន្លងទៅ ដោយអះអាងថា បើទោះជាក្រសួងអនុញ្ញាតឱ្យបើកប្រកួតលីគជាថ្មី តែមិនអាចបើកដំណើរការភ្លាមៗបានទេ ។
ការពន្យារពេល១ខែបន្ថែមក្នុងការបើកការប្រកួតឡើងវិញនេះ គឺដើម្បីឲ្យកីឡាករតាមក្លិបនីមួយៗមានពេលគ្រប់គ្រាន់ ដើម្បីហ្វឹកហាត់ស្តារកម្លាំង និងបច្ចេកទេសឡើងវិញ ។ ម្យ៉ាងទៀត CNCC ចង់ឲ្យលីគកំពូលត្រឡប់មកវិញជាមួយការប្រកួតដ៏ទាក់ទាញនោះផង ។ លោកបន្ថែមថា ការពន្យារពេលនេះ គ្មានការប៉ះពាល់ចំពោះកីឡាករ និងអ្នករៀបចំនោះទេ ផ្ទុយទៅវិញគឺមានតែផ្ដល់ពេលវេលាដ៏សមស្របមួយ ដើម្បីឱ្យកីឡាករ និងអ្នករៀបចំការប្រកួតមានពេលវេលាត្រៀមខ្លួនឱ្យបានល្អទៅវិញទេ។
លោកថា ក្នុងរយៈពេលកូវីដកន្លងមក កីឡាករទាំងអស់ មិនមានពេលហ្វឹកហាត់ដែលត្រូវតែទុកពេលឱ្យកីឡាករទាំងអស់ធ្វើការត្រៀមខ្លួនបន្ថែម ។ ជាមួយនឹងការពន្យារពេលប្រកួតពាន សម្រាប់ការប្រកួតលីគកំពូលដែលបានផ្អាកអស់មួយរយៈព្រោះតែជំងឺកូវីដ-១៩ ក៏នៅតែមិនទាន់កំណត់ឱ្យប្រកួតនៅឡើយផងដែរ បន្ទាប់ពីការប្រកួតលីគកំពូល ដែលធ្វើឡើងជាច្រើនប្រកួតរួចមកហើយត្រូវបានផ្អាកកណ្ដាលទីនោះ។
លោក ចាន់ មិថុនា មន្ត្រីព័ត៌មានផ្នែកបាល់ទាត់ បានផ្ដល់សម្ភាសន៍ថា ការប្រកួតលីគនៅមិនទាន់មានការឯកភាពគ្នាឱ្យប្រកួតឡើងវិញថ្ងៃណា ពេលណានៅឡើយទេ បើទោះជាមានការដាក់សំណើឱ្យមានការប្រកួតជាថ្មី កុំឱ្យបន្តអូសបន្លាយពេលវេលាទៀតក្តី ។
លោកថា ក្រសួងអប់រំបានអនុញ្ញាតឱ្យមានការបើកប្រកួតឡើងវិញក្នុងលក្ខខណ្ឌមិនឱ្យមានអ្នកទស្សនា ឬ មិនឱ្យមានអ្នកនៅក្នុងព្រឹត្តិការណ៍លើសពី១០០នាក់ ដែលក្នុងលក្ខខណ្ឌបែបនេះ គឺមិនមែនជាអ្វីដែលការប្រកួតលីគមួយនេះចង់បាននោះទេ។ ប៉ុន្តែសហព័ន្ធ មិនមានជម្រើសនោះទេ គឺត្រូវតែបើកការប្រកួតនៅក្នុងពេលនេះ ដើម្បីកុំឱ្យFIFA និងគណៈកម្មការអន្តរជាតិផ្សេងទៀត រង់ចាំ ព្រោះតែការប្រកួតលីគនេះបើនៅដំអក់យូរ ក៏ប៉ះពាល់ជាមួយព្រឹត្តិការណ៍FIFAមួយចំនួនផងដែរ ។
លោកថា ការប្រកួតលីគកំពូលរមែងធ្វើឡើងរៀងរាល់ដើមឆ្នាំ ដោយការប្រកួតកាលពីដើមឆ្នាំ ដំណើរការបានចំនួនប៉ុន្មានសប្ដាហ៍ហើយក៏ផ្អាកចោលវិញ ។ លោកមិនហ៊ានថា ការប្រកួតដែលនៅតែមិនទាន់កំណត់ថ្ងៃជាថ្មី មានការប៉ះពាល់ចំពោះអារម្មណ៍កីឡាករ និងគ្រូបង្វឹកកម្រិតណានោះទេ ប៉ុន្តែលោកនៅតែយល់ថា កីឡាករទាំងអស់នឹងយល់ពីស្ថានការណ៍ដែលបានកើតឡើង ម្យ៉ាងដើម្បីអាចមានពេលគ្រប់គ្រាន់ក្នុងការត្រៀមខ្លួននោះផង ។
លោកថា ការប្រកួតលីគ គឺជាការប្រកួតមួយដ៏សំខាន់ ដោយសារតែការប្រកួតនោះ ក៏ដើម្បីកំណត់រកក្រុមកំពូល និងដើម្បីកំណត់រកកីឡាករឆ្នើមជម្រើសជាតិ ដើម្បីរំលេចក្រុមសម្រាប់ការប្រកួតរបស់FIFAផងដែរ ។ លោកថា ការប៉ះពាល់វាអាចនឹងមានសម្រាប់ការពន្យារពេល ប៉ុន្តែលោកនៅតែថាវាមិនមែនជាបញ្ហាធ្ងន់ធ្ងរនោះទេ ដ្បិតនេះគឺជាបញ្ហារបស់ពិភពលោកទាំងមូល ។
លោកថា ការប្រកួតលីគកំពុងស្ថិតក្នុងការប្រជុំពិភាក្សា ដើម្បីកំណត់ឱ្យបើកប្រកួតជាថ្មី ប៉ុន្តែសម្រាប់និតិវិធីបែបណា ហើយកំណត់យកពេលណា គឺរង់ចាំការសម្រេចពីថ្នាក់លើសិន។
បើតាមលោក កែវ សារ៉េត ការប្រកួតទៀតសោតទំនងជាអាចផ្លាស់ប្តូររូបមន្តប្រកួតពីពីរជើងមកធ្វើត្រឹមតែមួយជើងប៉ុណ្ណោះ ។ ប៉ុន្តែលោកអះអាងថា គម្រោងនេះកំពុងស្ថិតក្នុងការពិចារណា ពុំទាន់មានលិខិតបញ្ជាក់ជាផ្លូវការនោះទេ ។
យោងតាមប្រកាសរបស់ក្រសួងអប់រំ យុវជន និងកីឡា កាលពីថ្ងៃទី២៦ ខែឧសភា សម្រេចឲ្យសហព័ន្ធកីឡាជាតិទាំងអស់បើកការប្រកួតកីឡាឡើងវិញគ្រប់ទម្រង់ ក្រោមរូបភាពប្រកួតបិទទ្វារមិនឲ្យមានអ្នកគាំទ្រចូលទស្សនា។ រាល់ការប្រកួតនីមួយៗ ក្រសួងអនុញ្ញាតឲ្យមានតែកីឡាករ គ្រូបង្វឹក និងអាជ្ញាកណ្តាលចៅក្រម មិនឱ្យលើសពី១០០នាក់ ។ ក្រសួងដាក់បម្រាមបែបនេះ គឺដើម្បីរួមចំណែកបង្ការ និងទប់ស្កាត់រលកទីពីរនៃការឆ្លងរីករាលដាលនៃជំងឺកូវីដ-១៩ ៕ (កែសម្រួលដោយ ៖ បុប្ផា)
ចែករំលែកព័តមាននេះ