ប្រធាន WHO គាំទ្រភាពជាអ្នកដឹកនាំនយោបាយរបស់សម្ដេចតេជោក្នុងការទប់ស្កាត់កូវីដ១៩
- ភ្នំពេញ
រាជធានីភ្នំពេញ ៖ លោក តេត្រូ អ៊ែតហានូម ហ្គេប្រេយ៉េសស៊ុស (Tedros Adhanom) អគ្គនាយកអង្គការ សុខភាពពិភពលោក…
រាជធានីភ្នំពេញ ៖ លោក តេត្រូ អ៊ែតហានូម ហ្គេប្រេយ៉េសស៊ុស (Tedros Adhanom) អគ្គនាយកអង្គការ សុខភាពពិភពលោក…
រាជធានីភ្នំពេញ ៖ លោក តេត្រូ អ៊ែតហានូម ហ្គេប្រេយ៉េសស៊ុស (Tedros Adhanom) អគ្គនាយកអង្គការ សុខភាពពិភពលោក (WHO) បានប្រកាសគាំទ្រចំពោះភាពជាអ្នកដឹកនាំនយោបាយការចូលរួម និងតួនាទីរបស់សម្ដេចតេជោ ព្រមទាំងកោតសរសើរ កិច្ចខិតខំរបស់រាជរដ្ឋាភិបាលកម្ពុជា ក្នុងការទប់ស្កាត់ជំងឺកូវីដ១៩ ។
ការគាំទ្រនេះ បន្ទាប់ពីសម្តេចតេជោ បានដាក់គោលនយោបាយប្រយុទ្ធនឹងជំងឺកូវីដ១៩ បានល្អប្រសើរដោយគ្មានប្រជាពលរដ្ឋណាម្នាក់បាត់បង់ជីវិត ដោយឆ្លងជំងឺកូវីដ១៩នោះទេ ខណៈរយៈពេលកន្លងពលរដ្ឋកម្ពុជា១២៤នាក់ បានឆ្លងជំងឺនេះ ហើយបានព្យាបាលជាសះស្បើយជាបន្តបន្ទាប់ គឺនៅសល់តែ២នាក់ប៉ុណ្ណោះកំពុងសម្រាកព្យាបាល ហើយសង្ឃឹមថា នឹងជាសះស្បើយនៅពេលខាងមុខនេះ ។
យោងតាមរយៈលិខិតមួយច្បាប់ ដែលបានផ្ញើជូនសម្ដេចតេជោ ហ៊ុន សែន នៅថ្ងៃទី២៨ ឧសភានេះ លោកអគ្គនាយក WHO បានសរសេរថា «ខ្ញុំមានសេចក្ដីសោមនស្សរីករាយ ដែលរាជរដ្ឋាភិបាលកម្ពុជាបានចាត់វិធានការយ៉ាងម៉ឺងម៉ាត់ ក្នុងការប្រតិបត្តិផែនការយុទ្ធសាស្ត្រប្រុងប្រៀបទុកជាមុន និងផែនការឆ្លើយតបនឹងជំងឺកូវីដ១៩ ជាសកលរបស់អង្គការសុខភាពពិភពលោក ។ ខ្ញុំបាទសូមឆ្លៀតយកឱកាសនេះធ្វើការកោតសរសើរកិច្ចខិតខំរបស់រាជរដ្ឋាភិបាលកម្ពុជា ក្នុងការទប់ស្កាត់ជំងឺរាតត្បាតនេះ ។ ជាពិសេស សូមកោតសរសើរ ចំពោះបុគ្គលិកសុខភាពសាធារណៈនៅជួរមុខដែលកំពុងប្រយុទ្ធប្រឆាំងនឹងជំងឺកូវីដ១៩ ។
ជាថ្មីម្ដងទៀត ខ្ញុំបាទសូមបង្ហាញ ការគាំទ្រចំពោះភាពជាអ្នកដឹកនាំនយោបាយ ការចូលរួម និងតួនាទីរបស់សម្ដេចតេជោ» ។ លោកបន្តថា អង្គការសុខភាពពិភពលោកនៅក្នុងកម្រិតសកលតំបន់ និងជាតិបានត្រៀមខ្លួនរួចជាស្រេច ដើម្បីបន្តការងារជាមួយរាជរដ្ឋាភិបាលកម្ពុជាក៏ដូចជា ដៃគូធំៗនានាក្នុងការប្រយុទ្ធប្រឆាំងនឹងការគំរាមកំហែងដោយសារជំងឺកូវីដ១៩ រួមមួយនេះដែលយើងត្រូវរួមដៃគ្នាក្នុងការប្រឆាំងនឹងការរីកសាយភាយនាពេលអនាគត ។ ការចូលរួម និងសាមគ្គីភាពទាំងអស់គ្នា យើងនឹងទទួលបានជោគជ័យ ។
សូមជម្រាបថាកាលពីថ្ងៃទី១០ ខែមេសា ឆ្នាំ២០២០ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានបង្ហាញនូវសមានចិត្ត ក្នុងការគាំទ្រ និងការប្តេជ្ញាចិត្ត តាមការអំពាវនាវរបស់ អង្គការសុខភាពពិភពលោក ដើម្បីចូលរួមកិច្ចខិតខំប្រឹងប្រែងជាសកល ក្នុងការកាត់បន្ថយទំហំនៃផលប៉ះពាល់ និងការបញ្ឈប់ការ រាតត្បាតនៃជំងឺកូវីដ១៩ ៕
ចែករំលែកព័តមាននេះ