រាជធានីភ្នំពេញ ៖ រាជិនីតេក្វាន់ដូកម្ពុជា ស៊ន សៀវម៉ី ដែលជាម្ចាស់មេដាយមាសកីឡាអាស៊ីលើកទី១៧ នៅទីក្រុង Incheon ប្រទេសកូរ៉េខាងត្បូង បានរកឃើញគូអនាគត…
រាជធានីភ្នំពេញ ៖ រាជិនីតេក្វាន់ដូកម្ពុជា ស៊ន សៀវម៉ី ដែលជាម្ចាស់មេដាយមាសកីឡាអាស៊ីលើកទី១៧ នៅទីក្រុង Incheon ប្រទេសកូរ៉េខាងត្បូង បានរកឃើញគូអនាគត ហើយដោយបានធ្វើពិធីភ្ជាប់ពាក្យនាថ្ងៃទី២៨ ខែឧសភា ឆ្នាំ២០២០ នៅផ្ទះរបស់នាងស្ថិតក្នុងសង្កាត់គីឡូម៉ែត្រលេខ៩ ខណ្ឌឬស្សីកែវ រាជធានីភ្នំពេញ ដោយមានភ្ញៀវដែលត្រូវជាសាច់ញាតិ បងប្អូន និងមិត្តភក្តិគ្រួសារទាំងសងខាងចូលរួមយ៉ាងច្រើនកុះករ ។
តាមការបញ្ជាក់របស់លោក ស៊ន អេលីត ដែលត្រូវជាបងប្រុសរបស់នាងថា កូនប្រុសមានឈ្មោះថា កែវ ដេវីត ជាអ្នកជំនាញខាងថតរូបក្នុងកម្មវិធីធំ និង Pre-wedding ជាដើម ខណៈគម្រោងរៀបការនឹងកំណត់នៅពេលស្ថានភាពជំងឺកូវីដ-១៩ ស្ងប់ស្ងាត់លែងមានក្នុងប្រទេសកម្ពុជា ។ ប៉ុន្ដែពាក់ព័ន្ធថ្លៃបណ្ណាការបង្គាប់ប៉ុន្មាន នោះមិនត្រូវបានលោកបង្ហើបឲ្យដឹងនោះទេ។
សូមបញ្ជាក់ថា កីឡាការិនីតេក្វាន់ដូកម្ពុជា ស៊ន សៀវម៉ី ជាអ្នកកែប្រែប្រវត្តិសាស្ត្រកីឡាកម្ពុជាចាប់តាំងពី៤៤ឆ្នាំ ដោយបានឈ្នះមេដាយមាសនៅក្នុងការប្រកួតកីឡាអាស៊ីលើកទី១៧ នៅទីក្រុង Incheon ប្រទេសកូរ៉េខាងត្បូង កាលពីឆ្នាំ ២០១៤ និងជាម្ចាស់មេដាយមាសកីឡាស៊ីហ្គេម ៣ ជំនាន់ កាលពីឆ្នាំ២០១៣ នៅមីយ៉ាន់ម៉ា ឆ្នាំ២០១៧ នៅម៉ាឡេស៊ី និងឆ្នាំ២០១៩ នៅហ្វីលីពីន។
មិនតែប៉ុណ្ណោះ កីឡាការិនីវ័យ២៤ឆ្នាំរូបនេះ ក៏ជាអត្តពលិកកម្ពុជាដំបូងគេ ដែលដណ្ដើមបានមេដាយមាសក្នុងការប្រកួតជម្រុះកីឡាតេក្វាន់ដូ កាលពីឆ្នាំ២០១៦ នៅហ្វីលីពីន ដើម្បីទទួលបានសិទ្ធិចូលរួមព្រឹត្តិការណ៍អូឡាំពិក ឆ្នាំ២០១៦ នៅទីក្រុងរីយ៉ូ ប្រទេសប្រេស៊ីលផងដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ