ខេត្តកំពង់ឆ្នាំង ៖ ដោយសារជីវភាពក្រីក្រ ខ្វះប្រាក់កាសក្នុងការព្យាបាលជំងឺ នាព្រឹកថ្ងៃទី២៦ ខែឧសភា លោកយាយម្នាក់អាយុ៧៩ឆ្នាំបានត្រូវលោកមេឃុំឆ្នុកទ្រូ ស្រុកបរិបូណ៌ ចំណាយប្រាក់ផ្ទាល់ខ្លួនជួលរ៉ឺម៉កម៉ូតូដឹកគាត់ទៅព្យាលនៅមណ្ឌលសុខភាពឃុំ ប៉ុន្តែដោយជំងឺរបស់លោកយាយមានសភាពធ្ងន់…
ខេត្តកំពង់ឆ្នាំង ៖ ដោយសារជីវភាពក្រីក្រ ខ្វះប្រាក់កាសក្នុងការព្យាបាលជំងឺ នាព្រឹកថ្ងៃទី២៦ ខែឧសភា លោកយាយម្នាក់អាយុ៧៩ឆ្នាំបានត្រូវលោកមេឃុំឆ្នុកទ្រូ ស្រុកបរិបូណ៌ ចំណាយប្រាក់ផ្ទាល់ខ្លួនជួលរ៉ឺម៉កម៉ូតូដឹកគាត់ទៅព្យាលនៅមណ្ឌលសុខភាពឃុំ ប៉ុន្តែដោយជំងឺរបស់លោកយាយមានសភាពធ្ងន់ ក្រុមគ្រូពេទ្យមណ្ឌលសុខភាពក៏សម្រេចដឹកលោកយាយទៅព្យាលនៅមន្ទីរពេទ្យបង្អែកស្រុកបរិបូណ៌ជាបន្តទៀត ។
លោក សាំង គីមស៊ន មេឃុំឆ្នុកទ្រូ បានឱ្យដឹងថា លោក យាយ ស៊ឹម សយ អាយុ៧៩ឆ្នាំ រស់នៅភូមិឆ្នុកទ្រូ ឃុំឆ្នុកទ្រូ មានជំងឺប្រចាំកាយជាយូរណាស់មកហើយ តែគាត់ពុំបានទៅមណ្ឌលសុខភាព ឬឲ្យក្រុមគ្រួពេទ្យព្យាបាលឡើយ ព្រោះតែស្ថានភាពគ្រួសារមានជីវភាពខ្វះខាត ។ ដោយឃើញស្ថានភាពបែបនេះ រូបលោក ក៏បានស្នើសុំមណ្ឌលសុខភាពឃុំ ឱ្យជួយព្យាបាលគាត់ ប៉ុន្តែពេលដឹកមកដល់មណ្ឌលសុខភាព ក្រុមគ្រូពេទ្យនៅទីនោះគ្មានលទ្ធភាពព្យាបាល ក៏សុំឱ្យគាត់ទៅព្យាលបាលនៅមន្ទីពេទ្យបង្អែកស្រុកបរិបូណ៌ជាបន្តទៀត ។ ហេតុនេះហើយ ដើម្បីមានសោហ៊ុយក្នុងការទៅសម្រាកព្យាបាល នៅមន្ទីរពេទ្យបង្អែកស្រុកបរិបូរណ៌ លោកបានផ្តល់ប្រាក់ចំនួន៣០ម៉ឺនរៀលជូនលោកយាយផងដែរ ។
លោកមេឃុំបញ្ជាក់ថា ប្រាក់នេះគ្រាន់តែជាបណ្តោះអាសន្នប៉ុណ្ណោះ ហើយលោកនឹងផ្ញើប្រាក់កាសទៅជួយជាបន្តទៀត ពេលលោកយាយនៅព្យាបាលរយៈពេលយូរ ឬក៏លោកយាយត្រូវដឹកទៅបន្តព្យាបាលនៅមន្ទីរពេទ្យខេត្តក្តី។ ចំពោះថ្លៃសេវាព្យាបាល គ្រូពេទ្យមិនយកថ្លៃទេ ព្រោះលោកបានចេញលិខិតបញ្ជាក់ជូនលោកយាយថា ជាជនក្រីក្ររួចអស់ហើយ ។
ក្នុងឱកាសនោះដែរ កូនស្រីលោកយាយ ឈ្មោះ ស៊ឹម ម៉ាប់ បានថ្លែងអំណរគុណចំពោះទឹកចិត្តសប្បុរសរបស់លោកមេឃុំ និងក្រុមគ្រូពេទ្យទាំងអស់ ដែលបានយកចិត្តទុកដាក់ជួយដឹកម្តាយគាត់ទៅព្យាបាល និងជួយជាសោហ៊ុយសម្រាប់សម្រាកព្យាបាលផងដែរ ។ ក្នុងនាមរូបគាត់ជាកូនស្រី សូមជូនពរលោកមេឃុំនូវពុទ្ធពរ ទាំង៤ប្រការកុំបីឃ្លៀងឃ្លាតឡើយ ។
ជាការពិតណាស់ ប៉ុន្តែប្រសិនបើមានមេឃុំទាំងអស់ យកចិត្តទុកដាក់ចំពោះចាស់ជរា និងជនក្រីក្រដូចលោកមេឃុំឆ្នុកទ្រូនេះ មិនដឹងប្រជាពលរដ្ឋ សប្បាយចិត្តបែបណាទេ ៕ (កែសម្រួលដោយ ៖ បុប្ផា)
ចែករំលែកព័តមាននេះ