លោកមហាសេដ្ឋី ម៉ាក ឃ្យូបេន (Mark Cuban) ជាមហាសេដ្ឋីដ៏មានប្រជាប្រិយភាពមួយរូបនៅសហរដ្ឋអាមេរិក និងជាអាជីវករដ៏ជោគជ័យមួយរូបផងដែរ ។ សហគ្រិនដែលមានអាយុ ៦១ឆ្នាំនេះជាម្ចាស់ភាគហ៊ុនរបស់ក្រុមហ៊ុនជាច្រើន…
លោកមហាសេដ្ឋី ម៉ាក ឃ្យូបេន (Mark Cuban) ជាមហាសេដ្ឋីដ៏មានប្រជាប្រិយភាពមួយរូបនៅសហរដ្ឋអាមេរិក និងជាអាជីវករដ៏ជោគជ័យមួយរូបផងដែរ ។ សហគ្រិនដែលមានអាយុ ៦១ឆ្នាំនេះជាម្ចាស់ភាគហ៊ុនរបស់ក្រុមហ៊ុនជាច្រើន និងមានទ្រព្យសម្បត្តិរួម ៤.៣ប៊ីលានដុល្លារបើយោងទៅតាម Forbes។ប៉ុន្តែមុនពេលមានថ្ងៃនេះ លោកបានឆ្លងកាត់ឧបសគ្គជាច្រើនដែលរួមមានការបាត់បង់ការងារម្តងហើយម្តងទៀតជាដើម ។
លោកបានបញ្ចប់ការសិក្សាពីសាកលវិទ្យាល័យ Indiana University ក្នុងឆ្នាំ ១៩៨១ និងចេញទៅធ្វើការឲ្យធនាគារ Mellon Bank ។ ពេលនោះលោកបានចាប់ផ្តើមកម្មវិធីមួយដែលប្រមូលផ្តុំបុគ្គលិកថ្មីៗ និងនាយកមានបទពិសោធន៍ច្រើនមកជជែកគ្នា ប៉ុន្តែចៅហ្វាយរបស់លោកមិនពេញចិត្តនឹងការផ្តួចផ្តើមនេះទេ និងបានប្រាប់ថាប្រសិនបើលោកទៅជិតចៅហ្វាយរបស់លោក លោកនឹងមានរឿងធំ ។
ដោយហេតុដូចនេះទើបលោកបានលាឈប់ និងចេញទៅធ្វើការឲ្យ Tronics 2000 មុននឹងប្តូរទៅរស់នៅក្នុងអាផាតមិនមួយជាមួយមនុស្ស ៥នាក់ទៀត ។ ពេលនោះលោកមានអាយុ ២៤ឆ្នាំ និងមិនមានលុយក្នុងខ្លួនទេ ។ លោកបានសម្រេចចិត្តចាប់ផ្តើមអាជីវកម្មខ្លួនឯងមួយលក់ម្សៅទឹកដោះគោតែវាមិនអាចដំណើរការបានយូរឡើយ ។
បន្ទាប់មកលោកបានទៅធ្វើការឲ្យក្រុមហ៊ុនបង្កើត Software សម្រាប់កុំព្យូទ័រមួយឈ្មោះថា Your Busniess Software ដែលអនុញ្ញាតឲ្យលោករកបានប្រមាណ ១៨,០០០ដុល្លារក្នុងមួយឆ្នាំ ។ ប៉ុន្តែលោកត្រូវបានបណ្តេញចេញពីក្រុមហ៊ុនព្រោះលោកមិនស្តាប់បញ្ជារបស់ចៅហ្វាយ ។
បទពិសោធន៍មួយនេះប្រៀបបានជាជំហានដំបូងក្នុងជីវិតជាអាជីវកររបស់លោក ឃ្យូបេន ។ លោកបានសម្រេចចិត្តចាប់ផ្តើមក្រុមហ៊ុនផ្តល់ទីប្រឹក្សាផ្នែកកុំព្យូទ័រមួយឈ្មោះថា MicroSolutions ដែលលោកបានលក់ឲ្យទៅ CompuServe ក្នុងតម្លៃ ៦លានដុល្លារ ។
បន្ទាប់ពីនោះមក លោកបានចាប់ផ្តើម Broadcast.com ដែល Yahoo បានទិញក្នុងឆ្នាំ ១៩៩៩ ក្នុងតម្លៃ ៥.៧លានដុល្លារ ។
លោកបានសរសេរក្នុងសៀវភៅដែលបានចេញផ្សាយកាលពីឆ្នាំ ២០១១ របស់លោកក្រោមចំណងជើងថា “How to Win at Sport of Business” ថា «ចំនួននៃការបរាជ័យរបស់អ្នកមិនសំខាន់ទេ ។ ក្នុងពិភពលោកអាជីវកម្ម ដើម្បីជោគជ័យអ្នកត្រូវតែធ្វើអ្វីដែលត្រូវតែម្តងប៉ុណ្ណោះ» ៕
ចែករំលែកព័តមាននេះ