ក្នុងពេលដែលមនុស្សជុំវិញពិភពលោកកំពុងតែព្យាយាមសម្របខ្លួនទៅនឹងការផ្លាស់ប្តូរបង្កដោយការផ្ទុះជំងឺកូវីដ ១៩ មហាសេដ្ឋីបែរជាកំពុងប្រមូលលុយទៅវិញ ។ យោងទៅតាមរបាយការណ៍មួយពីវិទ្យាស្ថានស្រាវជ្រាវគោលនយោបាយ និង Americans For Tax Fairness…
ក្នុងពេលដែលមនុស្សជុំវិញពិភពលោកកំពុងតែព្យាយាមសម្របខ្លួនទៅនឹងការផ្លាស់ប្តូរបង្កដោយការផ្ទុះជំងឺកូវីដ ១៩ មហាសេដ្ឋីបែរជាកំពុងប្រមូលលុយទៅវិញ ។ យោងទៅតាមរបាយការណ៍មួយពីវិទ្យាស្ថានស្រាវជ្រាវគោលនយោបាយ និង Americans For Tax Fairness បានឲ្យដឹងថា ទ្រព្យសម្បត្តិសរុបរបស់មហាសេដ្ឋីនៅសហរដ្ឋអាមេរិកបានកើនឡើងដល់ទៅ ៤០០ប៊ីលានដុល្លារក្នុងកំឡុងពីថ្ងៃទី ១៨ ខែមិនា ដល់ថ្ងៃទី ១៩ខែឧសភាកន្លងមកនេះ ។
កំណើននៃតម្រូវការសម្រាប់ផលិតផលលក់អនឡាញបានជួយបង្កើនទ្រព្យសម្បត្តិសរុបរបស់លោកមហាសេដ្ឋី ជេហ្វ បេសូស (Jeff Bezos) ដល់ទៅ ៣០% មកស្មើ ១៤៨ប៊ីលានដុល្លារ ។ ជាមួយគ្នានេះផងដែរ មហាសេដ្ឋីដទៃដូចជាលោកប៊ីល ហ្គេតស៍ (Bill Gates) ម៉ាក ហ្សាក់កាបឺក (Mark Zuckerberg) និងលោក វ៉ារេន បាហ្វេត (Warren Buffett) ក៏មើលឃើញទ្រព្យសម្បត្តិកើនឡើងក្នុងកំឡុងពេលនោះដែរ ។
យោងទៅតាម Forbes បានឲ្យដឹងថា ការផ្ទុះជំងឺកូវីដ ១៩ នេះ មិនបង្កការប៉ះពាល់ច្រើនដល់អ្នកដែលមានប្រាក់ចំណូលខ្ពស់សម្រាប់ទេ ហើយពួកគេក៏មិនមានឱកាសបាត់បង់ការងារខ្ពស់ដែរបើប្រៀបធៀបនឹងអ្នកដែលមានប្រាក់ចំណូលទាប ។ មានន័យថា ស្ថានការបច្ចុប្បន្នកំពុងតែបង្កើនវិសមភាពរវាងអ្នកមាន និងអ្នកក្រក្នុងសង្គម ។
អ្នកមានទ្រព្យសម្បត្តិស្តុកស្តម្ភ ភាគច្រើនជាអ្នកឈ្នះក្នុងពេលដែលសេដ្ឋកិច្ចមានវិបត្តិ ។ បន្ទាប់ពីឆ្លងផុតវិបត្តិសេដ្ឋកិច្ចហើយ វិសមភាពទ្រព្យសម្បត្តិ និងប្រាក់ចំណូលកើនឡើង ។ អ្នកដែលក្រីក្រ និងជាប់បំណុលជាអ្នកដែលជួបប្រទះបញ្ហាច្រើនជាងគេ ហើយការស្រាវជ្រាវបានបង្ហាញឲ្យឃើញថាកូវីដ ១៩អាចនឹងបង្កផលប៉ះពាល់ស្រដៀងគ្នាដែរ ។
ដូច្នេះ អ្នកឈ្នះក្នុងពេលដែលសេដ្ឋកិច្ចមានវិបត្តិជាមនុស្សដែលអាចរក្សាការងាររបស់ពួកគេបាន អាចធ្វើការពីផ្ទះ និងអ្នកដែលមានទ្រព្យសម្បត្តិសេះសល់ច្រើនសម្រាប់ពេលដែលត្រូវការចាំបាច់ ៕
ចែករំលែកព័តមាននេះ