អ្នកបានមើលឃើញមនុស្សដែលបានយកគំនិតរបស់ខ្លួនទៅបង្កើតអាជីវកម្មមានតម្លៃរាប់ប៊ីលានដុល្លារួចទៅហើយក្នុងវិស័យមួយចំនួន ។ ប៉ុន្តែវិស័យខ្លះប្រៀបដូចជាមានឱកាសជោគជ័យច្រើនជាងវិស័យមួយចំនួនទៀត ។ យោងតាមការស្រាវជ្រាវរបស់ Wealth X ដែលបានសិក្សាមនុស្សជុំវិញពិភពលោកដែលមានទ្រព្យសម្បត្តិរួម ៥លានដុល្លារ បានឲ្យដឹងថា ខាងក្រោមនេះជាវិស័យដែលបង្កើតបានមហាសេដ្ឋីច្រើនជាងគេជុំវិញពិភពលោក ៖
១. ធនាគារ និងហិរញ្ញវត្ថុ
យោងទៅតាម Wealth X បានឲ្យដឹងថា អ្នកមានធ្វើការក្នុងវិស័យធនាគារ និងហិរញ្ញវត្ថុច្រើនជាងវិស័យផ្សេងទៀងអស់ ។ លោក ជេមី ឌីម៉ុន (Jamie Dimon) ដែលជានាយកប្រតិបត្តិរបស់ JPMorgan Chase ស្ថិតក្នុងចំណោមអ្នកមានទ្រព្យសម្បត្តិលើស ៥លានដុល្លារចំនួន ២២.៦% ដែលរកចំណូលបានពីវិស័យហិរញ្ញវត្ថុ ។
២. អាជីវកម្ម និងសេវាកម្មអតិថិជន
ច្រើនជាង ១៦% នៃអ្នកមានទាំងអស់កសាងទ្រព្យសម្បត្តិរបស់ពួកគេចេញពីអាជីវកម្ម និងសេវាកម្មអតិថិជន ។ លោក ដេវីត ស្ទ៊ូវូដ (David Steward) បានបង្កើតក្រុមហ៊ុន World Wide Technilogiy ដែលជាក្រុមហ៊ុនផ្តល់សេវាកម្មផ្នែក IT និងរកចំណូលបានច្រើនជាង ១១ប៊ីលានដុល្លារទៅទៀត ។ បច្ចុប្បន្នលោកមានទ្រព្យសម្បត្តិប្រមាណ ៣.៥ប៊ីលានដុល្លារបើយោងតាម Forbes ។
៣. អង្គការមិនយកប្រាក់ចំណូល
យោងតាមការសិក្សាខាងលើ ច្រើនជាង ៧% នៃអ្នកមានធ្វើការឲ្យអង្គការមិនយកប្រាក់ចំណូលពេញម៉ោង ។ ប៉ុន្តែភាគច្រើនអ្នកទាំងនេះបានកសាងទ្រព្យសម្បត្តិដែលខ្លួនមានពីវិស័យដទៃទៀតប្រៀបបានដូចលោកមហាសេដ្ឋី ប៊ីល ហ្គេស៍ (Bill Gates) និងភរិយាជាដើម ។
៤. អចលនទ្រព្យ
ការសិក្សាខាងលើបានឲ្យដឹងទៀតថា ៥.៤% នៃអ្នកមានរកចំណូលបានពីអចលនទ្រព្យ ។ លោក ស្ទីវភិន រ៉ស (Stephen Ross) បច្ចុប្បន្នជាមហាសេដ្ឋីដែលមានជាងគេក្នុងវិស័យអចលនទ្រព្យនៅសហរដ្ឋអាមេរិក និងមានទ្រព្យសម្បត្តិរួមប្រមាណ ៧.៦ប៊ីលានដុល្លារ ។
៥. សុខាភិបាល
មានតែ ៤.៩% នៃអ្នកមានទេដែលកសាងទ្រព្យសម្បត្តិពីវិស័យសុខាភិបាល បើយោងតាមការស្រាវជ្រាវរបស់ Wealth X ។ លោក អឺនេស្តូ បឺតារេលី (Ernesto Bertarelli) ដែលជាអ្នកមានជាងគេក្នុងប្រទេសស្វ៊ីសបានកសាងទ្រព្យសម្បត្តិពីក្រុមហ៊ុនឱសថ Serono របស់លោក ៕
ចែករំលែកព័តមាននេះ