រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់ជិះម៉ូតូមួយគ្រឿងឌុបប្អូនថ្លៃពីក្រោយចេញពីកន្លែងធ្វើការបំណងទៅលេងគូដណ្ដឹង តែជាអកុសលបែរជាទៅជួបគ្រោះថ្នាក់ចរាចរណ៍ ដោយជិះម៉ូតូបោះពួយយ៉ាងលឿនជ្រុលទៅបុកពីក្រោយរថយន្តដឹកដីធន់ធំមួយគ្រឿងទៀតដែលកំពុងឈប់ចាក់ប្រេងនៅលើស្ពានព្រែកព្នៅ បណ្ដាលឲ្យបាត់បង់ជីវិតភ្លាមៗតែម្តង ចំណែកប្អូនថ្លៃរងរបួសបាក់ភ្លៅខាងស្តាំ បង្កឱ្យមានការភ្ញាក់ផ្អើល កាលពីម៉ោង១១និង២០នាទីយប់ ថ្ងៃទី២៦ ខែឧសភា ឆ្នាំ២០២០ ត្រង់ចំណុចលើស្ពានព្រែកព្នៅផ្នែកខាងកើត ស្ថិតក្នុងសង្កាត់ព្រែកតាសេក ខណ្ឌជ្រោយចង្វារ។
សេចក្តីរាយការណ៍បន្តថា ជនរងគ្រោះដែលបាត់បង់ជីវិតខាងលើឈ្មោះ សូយ ធារ៉ូ ភេទប្រុស អាយុ២៦ឆ្នាំ មុខរបរជាងដែក ស្នាក់នៅកន្លែងធ្វើការក្នុងសង្កាត់ព្រែកលាភ ខណ្ឌជ្រោយចង្វារ និងមានស្រុកកំណើតនៅភូមិសំបូរ ឃុំសំបូរ ស្រុកបាធាយ ខេត្តកំពង់ចាម។
តាមប្រភពពីកន្លែងកើតហេតុបានឲ្យដឹងថា នៅមុនកើតហេតុ គេឃើញបុរសរងគ្រោះ និងប្អូនថ្លៃប្រុសបានជិះម៉ូតូមួយគ្រឿងម៉ាកហុងដាឌ្រីម ស៊េរី០១០ ពណ៌ខ្មៅ ពាក់ស្លាកលេខ ភ្នំពេញ 1AF-7389 ធ្វើដំណើរតាមបណ្ដោយមហាវិថីឈ្នះឈ្នះ ពីកើតទៅលិច ក្នុងល្បឿនយ៉ាងលឿន ដែលទើបតែចេញពីធ្វើការបំណងទៅលេងផ្ទះគូដណ្ដឹងរបស់ជនរងគ្រោះនៅឯភ្នំឧត្តុង។
ប្រភពដដែលបន្តថា លុះមកដល់ចំណុចកើតហេតុ ស្របពេលដែលមានរថយន្តមួយគ្រឿងទៀតម៉ាក KIA ជាប្រភេទរថយន្តបែនដឹកដីធន់ធំ ពណ៌ត្រេអ៊ី គ្មានស្លាកលេខ កំពុងតែឈប់ចាក់ថែមប្រេងនៅត្រង់ចំណុចកើតហេតុ ដោយមិនមានដាក់អ្វីជាសញ្ញាណសំគាល់ឱ្យប្រុងប្រយ័ត្ននោះទេ។ ខណៈពេលនោះម៉ូតូរងគ្រោះបើកលឿនមិនប្រយ័ត្ន ក៏ជ្រុលចង្កូតទៅបុកពីក្រោយចំហៀងខាងឆ្វេងរថយន្តខាងលើពេញទំហឹងតែម្តង បណ្ដាលឲ្យបុរសរងគ្រោះដែលជាអ្នកបើកបរម៉ូតូបោកក្បាលទៅនឹងរថយន្តធ្វើឱ្យបែកក្បាលបាត់បង់ជីវិតភ្លាមៗយ៉ាងអាណោចអាធ័ម។
ប្រភពដដែលបន្តទៀតថា ចំណែកឯបុរសជាប្អូនថ្លៃដែលអង្គុយខាងក្រោយបានរងរបួសបាក់ភ្លៅខាងស្តាំ រីឯម៉ូតូរងការខូចខាតផ្នែកខាងមុខយ៉ាងដំណំ។ មិនតែប៉ុណ្ណោះរថយន្តបែនដឹកដីខាងលើនេះ ក៏ស្រាប់តែរអិលថយក្រោយ រួចក៏ថយជ្រុលទៅបុកនឹងបង្កាន់ដៃស្ពានព្រែកព្នៅ បណ្ដាលឲ្យខូចខាតបន្តិចបន្តួច ។ ចំណែកឯរថយន្តក៏រងការខូចខាតបាក់ភ្លៅកង់ខាងក្រោយ រីឯអ្នកបើកបររថយន្តក៏បានគេចខ្លួនចេញពីកន្លែងកើតហេតុភ្លាមៗបាត់ស្រមោល ចោលរថយន្តដែលរងការខូចខាតនោះ។ ក្រោយមកក៏មានរថយន្តរបស់គ្លីនិកឯកជនមកដឹកបុរសដែលរងរបួសយកទៅសង្គ្រោះភ្លាមៗផងដែរ។
ក្រោយពេលកើតហេតុ សមត្ថកិច្ចមូលដ្ឋានបានចុះមកអន្តរាគមន៍ រួចហៅសមត្ថកិច្ចជំនាញឲ្យចុះមកធ្វើការវាស់វែងស្ទូចរថយន្ត និងម៉ូតូយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយទៅតាមផ្លូវច្បាប់ជាបន្ត។ ដោយឡែកសពបុរសរងគ្រោះ ក៏ត្រូវបានសមត្ថកិច្ចទាក់ទងរកសាច់ញាតិនិងប្រគល់ឲ្យដឹកយកទៅធ្វើបុណ្យទៅតាមប្រពៃណីនៅឯខេត្តកំពង់ចាម ដែលជាស្រុកកំណើតរបស់ជនរងគ្រោះ៕ (កែសម្រួលដោយ ៖ បុប្ផា)
ចែករំលែកព័តមាននេះ