រាជធានីភ្នំពេញ៖ អគ្គនាយកដ្ឋានពន្ធដាបានប្រកាសឲ្យដឹងថា ការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ២០២០ នឹងត្រូវដាក់ឲ្យអនុវត្តចាប់ពីថ្ងៃទី១ ខែមិថុនា រហូតដល់ថ្ងៃទី៣០ ខែវិច្ឆិកា តទៅ។
យោងតាមសេចក្តីជូនដំណឹងរបស់អគ្គនាយកដ្ឋានពន្ធដាបានបញ្ជាក់ថា សម្រាប់ការបង់ពន្ធក្នុងឆ្នាំ២០២០នេះ ម្ចាស់យានយន្តគ្រប់ប្រភេទត្រូវដាក់លិខិតប្រកាស និងបង់ពន្ធនៅសាខាពន្ធដាខេត្ត ខណ្ឌ ឬនៅតាមធនាគារឯកជនដែលបានចុះអនុស្សារណៈនៃការយោគយល់ជាមួយក្រសួងសេដ្ឋកិច្ច និងហិរញ្ញវត្ថុ មានដូចជា៖ ធនាគារកាណាឌីយ៉ា ធនាគារ អេស៊ីលីដា ធនាគារវឌ្ឍនៈ និងធនាគារកម្ពុជាសាធារណៈជាដើម។
ចំពោះក្រសួង-ស្ថាប័ន ឬអង្គភាពដែលជាអាណាព្យាបាល ឬជាម្ចាស់កម្មសិទ្ធិនៃ យានយន្តដែលត្រូវបានលើកលែងពន្ធ ត្រូវស្នើសុំមកអគ្គនាយកដ្ឋានពន្ធដា ដើម្បីទទួលបាន នូវលតាបត្របង់ពន្ធ(ពន្ធជាបន្ទុករបស់រដ្ឋ) ដោយភ្ជាប់ជាមួយនូវបញ្ជីសារពើភណ្ឌយានយន្តរបស់ក្រសួង-ស្ថាប័ន ឬអង្គភាព ដែលបានស្នើសុំនោះ។
អគ្គនាយកដ្ឋានពន្ធដាបានឲ្យដឹងទៀតថា ចាប់ពីថ្ងៃទី១ ខែមករា ឆ្នាំ២០២១តទៅ អគ្គនាយកដ្ឋានពន្ធដារសហការជាមួយអាជ្ញាធរមានសមត្ថកិច្ច ដើម្បីចុះត្រួតពិនិត្យការប្រកាស បង់ពន្ធ និងផាកពិន័យចំពោះម្ចាស់យានយន្តទាំងឡាយណា ដែលមិនទាន់បានប្រកាសបង់ពន្ធ តាមច្បាប់ស្តីពីសារពើពន្ធជាធរមាន។
បើតាមការបញ្ជាក់ឲ្យដឹងពីលោក ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន បានឲ្យដឹងថា ក្នុងពេលបច្ចុប្បន្ន យានយន្តគ្រប់ប្រភេទដែលបានចុះបញ្ជីរួចរាល់មានសរុបជិត៦លានគ្រឿង ក្នុងនោះរថយន្តមានប្រហែល២០ភាគរយ ស្មើនឹងជិត១លានគ្រឿង ចំណែកនៅសល់៨០ភាគរយទៀត ជាទោចក្រយានយន្ត និងត្រីចក្រយានយន្ត៕
ចែករំលែកព័តមាននេះ