ប្រធានក្លិប Lyon លោក Jean-Michel Aulas បានសរសេរលិខិតផ្ញើជូននាយករដ្ឋមន្ត្រីបារាំង និងរដ្ឋមន្ត្រីក្រសួងកីឡាដោយស្នើពួកគេ អនុញ្ញាតឱ្យលីគកំពូលបារាំង Ligue 1…
ប្រធានក្លិប Lyon លោក Jean-Michel Aulas បានសរសេរលិខិតផ្ញើជូននាយករដ្ឋមន្ត្រីបារាំង និងរដ្ឋមន្ត្រីក្រសួងកីឡាដោយស្នើពួកគេ អនុញ្ញាតឱ្យលីគកំពូលបារាំង Ligue 1 បន្តការប្រកួតរដូវកាលនេះឡើងវិញ។
ដោយសារតែការផ្ទុះឡើងនៃវីរុសកូវីដ-១៩ ក្នុងប្រទេសបារាំង នៅថ្ងៃទី ២៨ មេសា ២០២០ ក្របខណ្ឌ Ligue 1 និង Ligue 2 រដូវកាល ២០១៩-២០ ត្រូវបានរំសាយចោលតែម្តង ដោយក្នុងនោះក្រុម PSG ក្លាយជាម្ចាស់ជើងឯក ។
ការសម្រេចចិត្តនេះ ធ្វើឲ្យក្លិបមួយចំនួន សម្តែងការមិនពេញចិត្តជាពិសេសក្រុមដែលត្រូវកាត់ចោល និងក្រុមមិនអាចលេងពានរង្វាន់ទ្វីបអឺរ៉ុបរដូវកាលក្រោយ ។ ជាក់ស្តែងដូចក្រុម Lyon ដែលនៅលេខ ៧ ក្នុងតារាង Ligue 1 មិនអាចលេងក្នុងពានរង្វាន់ Champions League រដូវកាលក្រោយ ។
នៅក្នុងលិខិត ដែលបានផ្ញើទៅកាន់នាយករដ្ឋមន្ត្រីបារាំង និងរដ្ឋមន្ត្រីក្រសួងកីឡា លោក Aulas បានលើកឡើងថា បាល់ទាត់បារាំង នឹងប្រឈមជាមួយវិបត្តិសេដ្ឋកិច្ចដ៏ធ្ងន់ធ្ងរ ហើយក៏នឹងប៉ះពាល់ដល់សង្គម ដែលមិនធ្លាប់មានពីមុនមក។
«ក្របខ័ណ្ឌ Bundesliga បានចាប់ផ្តើមការប្រកួតឡើងវិញកាលថ្ងៃទី ១៦ ឧសភា។ ប្រទេសអេស្ប៉ាញនឹងចាប់ផ្តើមការប្រកួតឡើងវិញនៅថ្ងៃទី ៨ មិថុនា។ អ៊ីតាលី ,រុស្ស៊ី និងព័រទុយហ្កាល់ បានបន្តការហ្វឹកហាត់រួមគ្នា ហើយអង់គ្លេសកំពុងត្រៀមខ្លួនធ្វើការចាប់ផ្តើមឡើងវិញនៅថ្ងៃទី ១៩ មិថុនា។ ចុះហេតុអី ប្រទេសបារាំងត្រូវមើលបាល់ទាត់អាជីពរបស់ខ្លួន ត្រូវរំសាយចោល ?» នេះបើតាមសម្តីរបស់លោក Jean-Michel Aulas ។
សូមបញ្ជាក់ថា យោងតាមរបាយការណ៍មួយចំនួនពីអ្នកជំនាញ បានឱ្យដឹងថា ក្លិបបាល់ទាត់បារាំង អាចនឹងត្រូវខាតបង់ប្រាក់ចន្លោះពី ៧០០ ទៅ ៩០០ លានអឺរ៉ូ ដោយសារវិបត្តិនៃវីរុសកូវីដ-១៩នេះ ៕ (ដកស្រង់ចេញពី Yahoo)
ចែករំលែកព័តមាននេះ