រាជធានីភ្នំពេញ ៖ សម័យបច្ចុប្បន្ននេះរបៀបរបបនៃការរស់របស់មនុស្សសម័យថ្មីកាន់តែប្រែប្រួលដែលពីដើមឡើយការប្រើប្រាស់ធ្យូងនិងអុសជាជម្រស់សម្រាប់ស្ត្រីមេផ្ទះក្នុងការចំអិនអាហារសម្រាប់គ្រួសារ ។ ក៏ប៉ុន្តែនៅយុគ្គសម័យទំនើបមនុស្សមួយចំនួនធំប្រើប្រាស់អគ្គិសនីនិងហ្គាសជំនួសវិញ ។
ជាក់ស្តែងអាជីវកម្មខ្នាតតូចមួយ គឺអាជីវកម្មបញ្ចូលហ្គាសកំពុងពេញនិយមខ្លាំង ខណៈមនុស្សមួយចំនួនមើលរំលង ឬមិនចាប់អារម្មណ៍លើអាជីវកម្មនេះក្តី តែបើក្រលែកមើលទៅ ប្រាក់ចំណូលវិញគឺងាយរកលុយ ជាពិសេសសូម្បីតែមានបញ្ហាវីរុសឆ្លងកូវីដ-១៩ ក៏មិនបានធ្វើឲ្យអាជីវកម្មមួយនេះរងគ្រោះនោះទេ ។
បងប្រុសសុភ័ក្ត្រ រស់នៅម្តុំស្ទឹងមានជ័យនិងប្រកបមុខរបរបញ្ចូលហ្គាសបានជិត១ឆ្នាំបាន ឲ្យដឹងថាមុខរបរមួយនេះមានលក្ខណៈតូចតាច តែតោងទាមទាឲ្យមានការប្រយ័ត្នប្រយែងខ្ពស់ក្នុងការទុកដាក់ព្រោះវាងាយឆាបឆេះខ្លាំង ដែលអាចបង្កហានិភ័យធ្ងន់ធ្ងរសម្រាប់រូបគាត់ក៏ដូចជាអ្នកជិតខាង ។
ថ្លែងប្រាប់សារព័ត៌មានកោះសន្តិភាពបងប្រុសសុភ័ក្ត្របានឲ្យដឹងថាអាជីវកម្មរបស់លោកចាប់បើកពី ម៉ោង៦ព្រឹកដល់៧យប់ដោយចាប់ផ្តើមក្នុងដើមទុនចំនួន ៣០០០ដុល្លារអាមេរិក ដែលនេះគឺជាដើមទុន បូកបញ្ចូលទាំងការជួលផ្ទះ សំភារៈ ដួចជា ធុងហ្គាស និងឧបករណ៍សម្រាប់បញ្ចូលហ្គាស ។ បងប្រុសសុភ័ក្ត្រនិយាយថា «មួយខែៗទោះមិនសូវចំណេញអ្វីច្រើន តែអាចរកចំណូល គ្រប់គ្រាន់សម្រាប់ផ្គត់ផ្គង់គ្រួសារនិងការចំណាយផ្សេងប្រចាំខែ» ។
អ្វីដែលល្អប្រសើរនោះគឺថាទោះបីជាពិភពលោកនិងកម្ពុជាកំពុងមានការព្រួយបារម្ភរឿងវីរុសឆ្លងកូវីដ-១៩ តែអាជីវកម្មបញ្ចូលហ្គាស់មិនមានភាពប្រែប្រួលអ្វីនោះទេ រកចំណូលបានដូចថ្ងៃធម្មតាដែរ បើទោះជាមានវិបត្តិកូវីដ១៩ក៏ដោយ។ នេះបើតាមការអះអាងរបស់បងប្រុស ។
បងសុភ័ក្ត្របានបន្តដូចនេះថា «ម៉ូយខ្លះយកមក ១០កំប៉ុង ឯអ្នកផ្សេងទៀត យកមកចាប់ពី ៣កំប៉ុងឡើង។ ហើយកំប៉ុងហ្គាសដែលត្រូវបញ្ចូលមានចាប់ពីតម្លៃ ១០០០រៀល ដល់ ១៥០០រៀលក្នុងមួយកំប៉ុង។ ប៉ុន្តែភាគច្រើនដាច់ជាងគេគឺកំប៉ុងហ្គាស់មានតម្លៃ១០០០រៀល » ៕
ចែករំលែកព័តមាននេះ