ប្រទេសចិន ៖ តាមប្រភពព័ត៌មាន Shanghaiist បានឱ្យដឹងថា អ្នកបុរាណវិទ្យានៅខេត្តហឺណាន (Henan) បានរកឃើញសារធាតុរាវចម្លែកដែលផ្ទុកក្នុងដបបុរាណរាងដូចសត្វក្វាន ពេលជីកផ្នូរបុរាណដែលមានអាយុកាលជាង២០០០ឆ្នាំ។ គ្មាននរណាម្នាក់ហ៊ានសាកផឹកសារធាតុរាវចម្លែកនោះទេ។
ដបថ្មដែលមានរាងដូចកក្ងាន ត្រូវបានគេរកឃើញនៅក្នុងផ្នូរបុរាណមួយនៅជិតទីក្រុង Sanmenxia ដែលនៅតាមបណ្តោយទន្លេលឿង។ វាត្រូវបានគេជឿថា មានអាយុកាលតាំងពីចុងរាជវង្សសេ្តចឈិន (២២១ដល់២០៦ឆ្នាំមុនគ.ស) ឬដើមរាជវង្សស្តេចហាន (២០៦មុនគ.ស ដល់ ២២០ក្រោយគ.ស)។
ផ្នូរបុរាណនេះ ត្រូវបានជីកកកាយ ដោយសារតែមានគម្រោងស្ថាបនាភូមិឡើងវិញឱ្យកាន់តែមានភាពប្រសើរនៅតំបន់ជាយនៃក្រុង Sanmenxia។ គេជឿថាផ្នូរនេះគឺជារបស់មន្ត្រីថ្នាក់ទាបកាលពីសម័យមុន។ នៅខាងក្នុងផ្នូរនោះ គេឃើញមាន មួកធ្វើពីលង្ហិន ផ្តិលលង្ហិន ដាវធ្វើពីដែក និងគុជមានតម្លៃ រួមទាំងវត្ថុបុរាណផ្សេងៗទៀត។
ប៉ុន្តែអ្វីដែលមានភាពលេចធ្លោជាងគេ គឺដបថ្មរាងកក្ងាន ដែលមានផ្ទុកសារធាតុរាវប្រហែល ៣០០០មីលីលីត្រ។ ទឹកនោះ មានពណ៌ត្នោតបែកលឿង ដែលត្រូវបានគេយកទៅធ្វើតេស្តនៅមន្ទីរពិសោធន៍ហើយពេលនេះ។
គេសង្ស័យថា វាគឺជាប្រភេទស្រាអង្ករម្យ៉ាង ព្រោះតែកន្លងមក គេក៏ធ្លាប់ឃើញមានសារធាតុរាវប្រភេទនេះជីកចេញពីក្រោមដីផងដែរ។ កាលពីឆ្នាំ២០០៨ អ្នកបុរាណវិទូនៅខេត្ត Shaanxi បានរកឃើញក្រឡស្រាមួយដែលមានអាយុកាលប្រហែលគ្នា៕ ដកស្រង់ចេញវេបសាយ ៖ shanghaiist (កែសម្រួលដោយ ៖ បុប្ផា)
ចែករំលែកព័តមាននេះ