ខេត្តបន្ទាយមានជ័យ ៖ អភិបាលរងខេត្តលោក ង៉ោ ម៉េងជ្រួន បានឱ្យកោះសន្តិភាពដឹងថា គម្រោងបើកច្រកព្រំដែនកម្ពុជា-ថៃឡើងវិញដែលបានប្រកាសកាលពីមុនថា នឹងបើកនៅថ្ងៃទី១ ខែមិថុនាខាងមុខត្រូវបានពន្យារ ខណៈរាជរដ្ឋាភិបាលថៃប្រកាសពន្យារការដាក់ប្រទេសក្នុងគ្រាអាសន្ន ១ខែមិថុនាបន្តទៀត ។
នៅព្រឹកថ្ងៃទី២៥ ខែឧសភា មានកិច្ចប្រជុំមួយនៅសាលាខេត្ត ដាក់វិធានការរៀបចំសន្តិសុខនិងសណ្តាប់ធ្នាប់នៅក្រុងប៉ោយប៉ែតមិនឲ្យមានការជួបជុំតវ៉ាណាមួយឡើយ ។
លោក អ៊ុំ រាត្រី អភិបាលខេត្ត បានកោះប្រជុំបន្ទាន់នេះ ដើម្បីដាក់វិធានការដល់កងកម្លាំងមានសមត្ថកិច្ចរួមនឹងអាជ្ញាធរក្រុងប៉ោយប៉ែត ត្រូវមានវិធានការរៀបចំសន្តិសុខនិងសណ្តាប់ធ្នាប់តំបន់ជាប់ជាយដែន ដោយមិនឱ្យមានការជួបជុំគ្នា ក្រោយពីទទួលបានការសុំធ្វើបាតុកម្មដោយសន្តិវិធីមួយនៅច្រកទ្វារអន្តរជាតិប៉ោយប៉ែត នៅថ្ងៃទី១ ខែមិថុនា ដែលមានរយៈពេល១សប្តាហ៍គឺពីថ្ងៃទី១ ដល់៧ ខែមិថុនា ។
ក្នុងលិខិតឆ្លើយតបទៅលោក ឌិន ពុទ្ធី ដែលជាប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា លោកអ៊ុំ រាត្រី បានបង្ហាញពីយោបល់ក្នុងលិខិតផ្លូវការចុះថ្ងៃទី២៥ ខែឧសភាថា ពាក់ព័ន្ធករណីសំណើសុំខាងលើ រដ្ឋបាលខេត្តបន្ទាយមានជ័យមិនអនុញ្ញាតទេ ពីព្រោះបច្ចុប្បន្ននេះ រាជរដ្ឋាភិបាលកំពុងមានវិធានការទប់ស្កាត់ការរីករាលដាលជំងឺកូវីដ-១៩នៅទូទាំងប្រទេស ដែលជំងឺនេះបាននិងកំពុងរីករាលដាលជាសា
កលឥតឈប់ឈរស្ទើរគ្រប់ប្រទេសនៅលើសាកលលោក ដែលប្រទេសនីមួយៗសុទ្ធតែមានវិធានការទប់ស្កាត់ទៅតាមលទ្ធភាពរៀងៗខ្លួននិងគោលការណ៍ណែនាំរបស់អង្គការសុខភាពពិភពលោក(WHO) ។
ជាក់ស្តែង រាជរដ្ឋាភិបាលដែលមានក្រសួងសុខាភិបាលជាសេនាធិការ បានជំរុញការអប់រំសុខភាពជូនដល់ប្រជាជន និងពង្រឹងការងារតាមដានការអនុវត្តវិធានការការពាររលកទីពីរនៃការចម្លងជំងឺកូវីដ-១៩ នៅក្នុងព្រះរាជាណាចក្រកម្ពុជា តាមខ្លឹមសារលិខិតលេខ០៩៧ សខល ចុះថ្ងៃទី១៩ ខែឧសភា ឆ្នាំ២០២០ ដោយបន្តការហាមឃាត់មិនឱ្យមានការជួបជុំ ឬរៀបចំពិធីណាមួយដែលមានអ្នកចូលរួមច្រើនកុះកររហូតដល់ខែកញ្ញា ឆ្នាំ២០២០ ។
លិខិតដដែលបន្តថា កន្លងមករដ្ឋបាលខេត្តបន្ទាយមានជ័យ ធ្លាប់បានអន្តរាគមន៍ទៅរដ្ឋបាលខេត្តស្រះកែវ ព្រះរាជាណាចក្រថៃ ដើម្បីសុំឱ្យជួយសម្រួលមិនយកកម្រៃឈ្នួលតូបពីបងប្អូនអាជីវករ និងសុំសម្រួលឱ្យបងប្អូនអាជីវករកម្ពុជាទាំងអស់ក្នុងផ្សាររុងក្លឿ បានចេញចូលទៅមើលតូបរបស់ខ្លួនក្នុង១លើក២០នាក់ រហូតដល់ស្ថានភាពវិលមកជាប្រក្រតីវិញ ក្នុងនោះភាគីថៃបានឆ្លើយតបថា នឹងជួយសម្រួលមិនយកកម្រៃឈ្នួលតូបពីបងប្អូនអាជីវករកម្ពុជា ប៉ុន្តែចំពោះសំណើសុំសម្រួលឲ្យបងប្អូនអាជីវករកម្ពុជាទាំងអស់ក្នុងផ្សាររុងក្លឿបានចេញចូលទៅមើលតូបរបស់ខ្លួនក្នុង១លើក ២០នាក់ ភាគីថៃមិនឯកភាពនោះទេ ។
ម្យ៉ាងទៀត រដ្ឋបាលខេត្តស្នើឱ្យលោក ឌិន ពុទ្ធី ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា ត្រូវធ្វើសកម្មភាពស្របតាមច្បាប់ស្តីពីសមាគមនិងអង្គការមិនមែនរដ្ឋាភិបាល លិខិតបទដ្ឋានយុត្តនានាជាធរមាន និងលក្ខកៈរបស់ខ្លួនដូចបានតម្កល់ទុកនៅក្រសួងមហាផ្ទៃ ។ក្នុងលិខិតស្នើសុំរបស់លោក ឌិន ពុទ្ធី ចុះថ្ងៃ
ទី២៥ ខែឧសភា បានលើកឡើងថា ប្រជាពលរដ្ឋខ្មែរដែលជាអាជីវករ អ្នកលក់ដូរទំនិញ នៅក្នុងផ្សាររុងក្លឿ ស្រុកអារញ្ញ ខេត្តស្រះកែវ ប្រទេសថៃ កម្មករអូសរទេះ អ្នករត់ម៉ូតូឌុប អ្នករត់តាក់ស៊ី អ្នករត់ម៉ូតូកង់បី និងអ្នកប្រកបរបរសេដ្ឋកិច្ចក្រៅប្រព័ន្ធទាំងអស់ ដែលរស់នៅក្នុងក្រុងប៉ោយប៉ែត ខេត្តបន្ទាយមានជ័យ បានឯកភាពគ្នាជាឯកច្ឆន្ទ នឹងចូលរួមធ្វើបាតុកម្មដែលមានមនុស្សចូលចំនួន១.៥០០នាក់ រទេះ១០០គ្រឿង និងឧគ្ឃោសនស័ព្ទចំនួន១គ្រឿង ។
ការធ្វើបាតុកម្មនេះ មានគោលបំណងទាមទារដូចខាងក្រោម ៖
១-ស្នើសុំការអនុញ្ញាតរួមមាន ថ្មើរជើង រទេះទោចក្រយានយន្ត និងរថយន្តរបស់ពួកយើងខ្ញុំ អាចឆ្លងកាត់ច្រកទ្វារព្រំដែនអន្តរជាតិប៉ោយប៉ែត
-ខ្លងលឹក ដើម្បីបានចូលទៅលក់ដូរនៅក្នុងស្រុកអារញ្ញ ខេត្តស្រះកែវ ប្រទេសថៃវិញ នៅថ្ងៃទី១ ខែមិថុនា ឆ្នាំ២០២០ ជាកំហិត ។
២-ក្នុងករណីបើភាគីថៃនៅតែមិនព្រមបើកច្រកទ្វារព្រំដែនអន្តរជាតិខ្លងលីក-ប៉ោយប៉ែតវិញទេ ពួកយើងខ្ញុំទាំងអស់គ្នាស្នើសុំឯកឧត្តមអភិបាលនៃគណៈអភិបាលខេត្តបន្ទាយមានជ័យ មេត្តាបិទច្រកទ្វារព្រំដែនអន្តរជាតិប៉ោយប៉ែតកុំឱ្យមានរថយន្តរបស់ថៃ អាចបើកបរចូលមកទឹកដីនៃព្រះរាជាណាចក្រកម្ពុជាបានជាបន្តទៅទៀត ។ អាជីករលក់ដូរទំនិញនៅផ្សាររុងក្លឿ មានការព្រួយបារម្ភយ៉ាងខ្លាំងចំពោះរបស់របររបស់ខ្លួនដែលមាននៅក្នុងតូបនីមួយៗ មានតម្លៃរាប់ម៉ឺនដុល្លារ តូបខ្លះមានអីវ៉ាន់រហូតដល់ទៅរាប់សែន
ដុល្លារ ។
អីវ៉ាន់ទាំងនោះពួកគាត់ទិញយកមកដាក់លក់ មិនមែនសម្រាប់យកមកទុកក្នុងរយៈពេលយូរបាននោះទេ ដូច្នេះអីវ៉ាន់ត្រូវខូចគុណភាព ហួសកាលបរិច្ឆេទ មិនអាចប្រើប្រាស់ ឬហូបចុកបាន ។ អីវ៉ាន់ខ្លះទៀតត្រូវបានទឹកលិច ពុកផុយ កណ្តុរ ឬសត្វល្អិតកាត់ខ្ទេចខ្ទីគ្មានសល់ ។ទាំងនេះហើយដែលជាមូលហេតុធ្វើឱ្យពួកគាត់ខាតដើមទុន បាត់បង់ទ្រព្យធនយ៉ាងធ្ងន់ធ្ងរ អាចធ្លាក់ខ្លួនទៅជាអ្នកក្រជំពាក់បំណុលគេវ័ណ្ឌក ។
លិខិតរបស់លោក ឌិន ពុទ្ធី បន្តថា ការបើកច្រកទ្វារព្រំដែនអន្តរជាតិនានាជាដំណោះស្រាយល្អបំផុត សម្រាប់ប្រជាពលរដ្ឋខ្មែរនិងប្រជាពលរដ្ឋថៃ ពីព្រោះនៅតាមច្រកទ្វារអន្តរជាតិទាំងនោះ តែងតែមានម៉ាស៊ីនស្គែនពិនិត្យកម្តៅក្នុងខ្លួនមនុស្ស ម៉ាស៊ីនបាញ់អាល់កុល ឬថ្នាំសម្លាប់មេរោគកូវីដ-១៩បាន និងជួយកាត់បន្ថយការឆ្លងដែន ដោយខុសច្បាប់នៅតាមច្រករបៀងនានា ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ