រាជធានីភ្នំពេញ ៖ ការលក់ដូងតាមរ៉ីម៉ក់ចល័តក្នុងទីក្រុងកំពុងមានកំណើនពីមួយឆ្នាំទៅមួយឆ្នាំ ។ យ៉ាងណាមិញអាចថា ដោយសារតែកូវីដ១៩ កំពុងវាយលុកពិភពលោក ហើយកម្ពុជាក៏កំពុងរងផលប៉ះពាល់ដោយសារតែវីរុសឆ្លងមួយនេះផង ធ្វើឲ្យអ្នកលក់ផ្លែដូងស្រស់ហាក់មិនសូវបានរកបានច្រើនដូចមុន តែបងប្អូនអ្នកលក់ដូរនៅបន្តការលក់ជាធម្មតាទោះប្រាក់ចំណេញធ្លាក់ចុះជាងមុនក្តី…
រាជធានីភ្នំពេញ ៖ ការលក់ដូងតាមរ៉ីម៉ក់ចល័តក្នុងទីក្រុងកំពុងមានកំណើនពីមួយឆ្នាំទៅមួយឆ្នាំ ។ យ៉ាងណាមិញអាចថា ដោយសារតែកូវីដ១៩ កំពុងវាយលុកពិភពលោក ហើយកម្ពុជាក៏កំពុងរងផលប៉ះពាល់ដោយសារតែវីរុសឆ្លងមួយនេះផង ធ្វើឲ្យអ្នកលក់ផ្លែដូងស្រស់ហាក់មិនសូវបានរកបានច្រើនដូចមុន តែបងប្អូនអ្នកលក់ដូរនៅបន្តការលក់ជាធម្មតាទោះប្រាក់ចំណេញធ្លាក់ចុះជាងមុនក្តី ។
អ្នកលក់ដូងតាមរ៉ឺម៉ក់ម្នាក់ បានប្រាប់កោះសន្តិភាពនៅថ្ងៃទី ២៦ ឧសភានេះថា គាត់ប្រកបមុខរបរលក់ដូងចល័តអស់រយៈពេល ៧ ទៅ ៨ឆ្នាំហើយ។ មុនប្រកបរបរលក់ដូងចល័ត គាត់បានធ្វើការជាកម្មករសំណង់អស់រយៈពេលយូរ ប៉ុន្តែគាត់ពិបាករឿងបើកប្រាក់ខែមិនដែលទាន់ពេល (ត្រូវបង់ថ្ងៃជួលផ្ទះ និងទឹកភ្លើង) ទើបគាត់ប្តូរមុខរបរទៅ។
មានស្រុកកំណើតក្នុងខេត្ត ព្រៃវែង លោកពូ ពេជ្រ ឌី និយាយថា «ខ្ញុំលក់ចល័តពីម្តុំបឹងទំពុន ដល់ផ្សារបឹងត្របែក តាំងពីព្រឹកព្រលឹម មិនកំណត់ម៉ោងទេ លក់ទាល់តែយប់ ធ្វើម៉េចលក់ឲ្យបានអស់» ។ លោកបានបន្តថា សព្វថ្ងៃគាត់រស់នៅផ្ទះជួលគេជាមួយប្រពន្ធកូននៅម្តុំបឹងទំពុន ។
លោកពូ ឌីបន្តថា គាត់លក់ដូងធម្មតាមួយផ្លែ តម្លៃ៣០០០ ទៅ៣៥០០រៀល ហើយដូងក្រអូបវិញ មួយផ្លែ ៤០០០រៀល។ ប៉ុន្តែពីមុនគាត់លក់ក្នុងតែ ១៥០០រៀល ទេក្នុងមួយផ្លែ ដោយក្រោយមកដូងឡើងថ្លៃពេលយកពីអ្នកលក់បោះដុំ អញ្ចឹងទើបគាត់លក់ឡើងថ្លៃដែរ ។ ហើយក្នុងមួយថ្ងៃ គាត់ចំណាយទៅលើសាំងអស់៣លីត្រសម្រាប់ការដើរលក់ចល័តជុំវិញទីតាំងទាំងនោះ។
ដោយលក់តាមតម្លៃក្នុងការទិញចូល លោកពូឌីនិយាយថា ពីមុនគាត់ចំណាយដើមទុនត្រឹម ៨ទៅ១០ម៉ឺនទេ (ទិញចូលម្តង) ប៉ុន្តែដូងឡើងថ្លៃ ដូចនេះគាត់ត្រូវចំណាយទុករហូតដល់ទៅ ៣០ទៅ៤០ម៉ឺន ក្នុងការទិញយកមកលក់ម្តងៗ។ ពីមុនគាត់ទិញចូលដូងមួយឡូ ៧ទៅ៨ម៉ឺន ប៉ុន្តែឥឡូវតម្លៃដូងមួយឡូគឺហក់ឡើងដល់ ២៤០០០រៀល ទៅ២៥០០០ រៀល ។
លោកពូឌី បានបន្ថែមថា «ខ្ញុំទិញដូងចូលម្តងៗ ១០ទៅ២០ឡូសម្រាប់លក់ ហើយលក់អស់ទើបខ្ញុំទៅយកទៀត។ បើផាត់ដើមទុនចេញ បានចំណេញជិត៥ម៉ឺនដែរក្នុងមួយថ្ងៃ»។
ដោយឡែកងាកមកមើលអ្នកលក់ដូងចល័តម្នាក់ទៀត បានចាប់អាជីពនេះលក់ដូងនេះ បានជាង៤ទៅ៥អាទិត្យហើយ។ ដោយពីមុនក៏គាត់ធ្វើជាជាងសំណង់ដែរ ប៉ុន្តែដោយមានភាពជរា និងមិនមានកំលាំងដូចក្មេងៗដូចមុន លោកសានបានចាប់ផ្តើមមុខរបរនេះវិញ (លក់ដូងតាមរ៉ឺម៉ក់)។
លោកពូសាន និយាយថា «ដំបូងឡើយខ្ញុំលក់បាន ៥ទៅ១០ឡូដែរក្នុងមួយថ្ងៃ ប៉ុន្តែឥឡូវមិនសូវដាច់ទេ តែបើមិនលក់មិនមានអ្វីធ្វើទេ ព្រោះមិនមានកំលាងធ្វើសំណង់ដូចមុន។ ខ្ញុំលក់អំឡុងពេលនេះ បានត្រឹមតែ៤ទៅ៥ឡូអីទេ»។ ដោយលក់ក្នុងតម្លៃ ៣០០០រៀលក្នុងមួយផ្លែ លោកពូសាន បានបន្តថា គាត់លក់បានចំណេញ ៣ទៅ៤ម៉ឺន ពេលទូទាត់ថ្លៃដើម និងថ្លៃសាំងរួច ។ លោកបានបន្តថាគាត់ចំណាយសាំងអស់ ១លីត្រកន្លះទៅ២លីត្រ។ ហើយមួយថ្ងៃលក់បាន ៧ទៅ៨ម៉ឺន តែត្រូវបែងចែកបង់ថ្លៃរ៉ឺម៉ក់ ព្រោះបង់រំលោះគេ។
លោកពូសានបន្ថែមថា គាត់ទិញរ៉ឺម៉ក់បង់រំលោះ តម្លៃរ៉ឺម៉ក់ ២៧០ដុល្លារអាមេរិក ដូចនេះត្រូវបង់រំលោះ ១ខែ ៣០ម៉ឹន ដូច្នេះលោកយល់ឃើញថា ការលក់ដូងហាក់ប្រសើរក្នុងការរកចំណូល ព្រោះលោកគ្មានដើមទុនប្រាក់ម៉ឺនដុល្លារទៅចាប់មុខរបរផ្សេងឡើយ។
អ្នកលក់បាយម្នាក់ (សុំមិនបញ្ចេញឈ្មោះ) បានឈប់ទិញដូង ហើយគាត់បាននិយាយថា គាត់ចូលចិត្តញុំាំទឹកដូង ព្រោះវាធ្វើឱ្យគាត់ត្រជាក់ក្នុងខ្លួននិងមានរស់ជាតិផ្អែម។ គាត់ញុំាទឹកដូង ពីរទៅបីផ្លែក្នុងមួយថ្ងៃ គាត់ចាប់ផ្តើមញុំាំតាំងពី ដូងមួយផ្លែ ២០០០៛រៀល តែអីឡូវ៣០០០រៀល។ ប៉ុន្តែត្រូវតែញុំាំ ព្រោះចូលចិត្តហើយជួយផ្តល់ថាមពល៕
ចែករំលែកព័តមាននេះ