រាជធានីភ្នំពេញ ៖ ដោយសារជំងឺកូវីដ១៩ បានធ្វើឲ្យភ្ញៀវទេសចរលើកសកលលោកធ្លាក់យ៉ាងគំហុកចាប់ពី៦០ ទៅ៨០ភាគរយ ។ នេះ បើតាមអង្គការទេសចរណ៍ពិភពលោក ។ យោងតាមការផ្សាយរបស់ក្រសួងទេសចរណ៍កម្ពុជា…
រាជធានីភ្នំពេញ ៖ ដោយសារជំងឺកូវីដ១៩ បានធ្វើឲ្យភ្ញៀវទេសចរលើកសកលលោកធ្លាក់យ៉ាងគំហុកចាប់ពី៦០ ទៅ៨០ភាគរយ ។ នេះ បើតាមអង្គការទេសចរណ៍ពិភពលោក ។
យោងតាមការផ្សាយរបស់ក្រសួងទេសចរណ៍កម្ពុជា នៅថ្ងៃទី២៥ ឧសភា ឆ្នាំ២០២០ បានលើកយ៉ាងដូច្នេះថា បច្ចុប្បន្នវិស័យទេសចរណ៍ពិភពលោកកំពុងប្រឈមការគម្រាមកំហែងពីជំងឺកូវីដ១៩ ដោយចំនួនទេសចរមានការធ្លាក់ចុះយ៉ាងខ្លាំងស្ទើរគ្រប់ប្រទេស ។
ប្រភពបានបន្តថា អង្គការទេសចរណ៍ពិភពលោក (UNWTO) បានប៉ាន់ប្រមាណថា វិបត្តិកូវីដ១៩ នឹងធ្វើឱ្យចំនួនទេសចរអន្តរជាតិធ្លាក់ចុះក្នុងរង្វង់ពី ៦០-៨០ ភាគរយក្នុងឆ្នាំ២០២០ ។ រដ្ឋាភិបាលនៃបណ្តាប្រទេសលើពិភពលោកបានដាក់បម្រាមមិនឱ្យប្រជាពលរដ្ឋរបស់ខ្លួនចេញក្រៅផ្ទះ (Lockdown) ឬក្រៅប្រទេស ដើម្បីទប់ស្កាត់ការរាតត្បាតនៃជំងឺឆ្លងកូវីដ១៩ ដោយតម្រូវឱ្យប្រជាពលរដ្ឋអនុវត្តតាមវិធានអនាម័យ ការរក្សាគម្លាតសង្គម ដែលនាំឱ្យពួកគេប្តូរទម្លាប់រស់នៅប្រចាំថ្ងៃ ដោយងាកមកប្រើបច្ចេកវិទ្យាថ្មីៗ បណ្តាញទំនាក់ទំនងសង្គម និងធ្វើការនៅផ្ទះជាដើម ។
អង្គការទេសចរណ៍ពិភពលោកក៏បានដាក់ចេញនូវវិធានការទប់ស្កាត់ការរាតត្បាតជំងឺកូវីដ១៩ ដោយស្នើឱ្យអ្នកទេសចរពិភពលោក «នៅផ្ទះថ្ងៃនេះ ធ្វើដំណើរនៅថ្ងៃស្អែក» ឬជាភាសាអង់គ្លេសថា Stay Home Today, Travel Tomorrow) ។ ពិតណាស់ ទោះបីជាពួកគេកំពុងជាប់បម្រាមក៏ដោយក៏អ្នកទេសចរទាំងនោះមិនបានបោះបង់ក្តីស្រមៃរបស់ខ្លួន ក្នុងការធ្វើដំណើរកម្សាន្តនៅតាមគោលដៅទេសចរណ៍នានា ក្រោយជំងឺកូវីដ១៩ត្រូវបានបញ្ចប់នាពេលខាងមុខ ។
ក្រៅពីនេះ ក្រសួងទេសចរណ៍ក៏កំពុងសិក្សាស្រាវជ្រាវ និងចងក្រងឯកសារស្តីពីវិធាននៃបរិបទថ្មីក្នុងវិស័យទេសចរណ៍ (New Normalization Protocols) ក្នុងសម័យកាល COVID-19 សម្រាប់ទេសចរជាតិ-អន្តរជាតិដែលធ្វើដំណើរកម្សាន្តនៅកម្ពុជា ដោយអនុវត្តតាមការណែនាំរបស់ក្រសួងសុខាភិបាលកម្ពុជា អង្គការសុខភាពពិភពលោក (WHO) និងអង្គការទេសចរណ៍ពិភពលោក (UNWTO)។
ជាមួយគ្នានោះដែរក្រសួងបន្តថា សៀមរាប-អង្គរ គឺជាបរមភូមិដ៏ពិសិដ្ឋដែលបុព្វបុរសខ្មែរបានខិតខំអភិវឌ្ឍកសាងឱ្យមានការរីកចម្រើន និងមានភាពល្បីល្បាញតាំងពីសម័យអង្គរ ឬមុនសម័យអង្គរ (ព្រោះមានប្រាសាទ មួយចំនួនត្រូវបានកសាងមុនសម័យអង្គរទៅទៀត) រហូតមកដល់បច្ចុប្បន្ន ដែលបានប្រែក្លាយពីមហារាជធានីយសោធរបុរៈជាង ៦០០ឆ្នាំរបស់កម្វុជទេសមកជាតំបន់ទេសចរណ៍ដ៏ល្បីល្បាញសម្រាប់មនុស្សជាតិទូទាំងពិភពលោក ៕
ចែករំលែកព័តមាននេះ