រាជធានីភ្នំពេញ ៖ កូវីដ-១៩ បានធ្វើឲ្យប៉ះពាល់វិស័យជាច្រើននៅលើពិភពលោកព្រមទាំងកម្ពុជាផងដែរ ជាពិសេសវិស័យទេសចរណ៍ក៏រងគ្រោះព្រោះវីរុសឆ្លងមួយនេះបានធ្វើឲ្យភ្ញៀវទេសចរជាតិ និងអន្តរជាតិបានធ្លាក់ចុះខ្លាំង ដែលជាកក្កតាធ្វើឲ្យប្រជាជនប្រកបមុខរបរលក់ដូរក្នុងស្រុកភូមិរបស់ខ្លួន អ្នកខ្លះត្រូវបង្ខំចិត្តផ្លាស់ប្តូរការលក់របស់ខ្លួនពីខេត្ត មកបន្តលក់ក្នុងទីក្រុងភ្នំពេញ ។
ជាក់ស្តែងក្រុមគ្រួសារមួយដែលមានស្រុកកំណើត និងជាអ្នកលក់ផ្លែឈើក្នុងខេត្តកែប និងមានចំការខ្លួនឯងនោះត្រូវមកធ្វើតូបលក់ផ្លែឈើនៅក្រុងភ្នំពេញផងដែរ ។ បងស្រីសុខ ស្រីណែត អាយុ ២៧ឆ្នាំ បានរៀបរាប់ឲ្យដឹងថា «បន្ទាប់ពីប្រទេសកម្ពុជាមានវបត្តិកូវីដ១៩ នេះមកនៅកន្លែងទេសចរណ៍ក្នុងស្រុកភូមិខ្ញុំ ក៏ត្រូវបានស្ងាត់ដែរ ដោយសារខ្លាចផ្លែឈើលក់មិនដាច់ ទើបពួកគាត់សម្រេសចិត្តចែកគ្នីគ្នា និងចែកទីតាំងដើម្បីលក់ ។ វាជារដូវកាលផ្លែឈើទុំ ជាពិសេសផ្លែទុរេន ហើយមិនមានមនុស្សទិញបែបនេះ គឺមិនដឹងត្រូវយកលក់ទីណា» ។
បងស្រីបានបន្តថា ដើម្បីរកចំណូលសម្រាប់ផ្គត់ផ្គង់គ្រួសារ ក៏ដូចជាខ្លាចផ្លែឈើដែលត្រូវប្រមូលផលត្រូវទុកចោលនោះ គាត់ត្រូវបង្ខំចិត្តនាំក្រុមគ្រួសារមកស្នាក់នៅរាជធានីភ្នំពេញ មួយរយៈសិនដើម្បីបន្តលក់ផ្លែឈើរបស់ខ្លួនរហូតផុតរដូវផ្លែឈើទុំ ។ បងស្រីបាននិយាយថា វាប្រហែលជាត្រូវការពេលវេលា ពីរបីខែទន្រាំផុតរដូវផ្លែឈើនេះ ។
អង្គុយលក់ជាមួយបងប្អូនផ្សេងទៀតនៅតុផ្លែឈើដែលមានឆត្រធំធ្វើជាម្លប់នោះ បងស្រីដែលបានផ្តល់សម្ភាសន៍ដល់សារព័ត៌មាន «កោះសន្តិភាព» បានឲ្យដឹងថាគាត់ទើបមករៀបចំទីតាំងនៅលក់ទីនេះ (ក្រោយសាលាបឋមសិក្សាភូមិ ៦) បានពីរសប្តាហ៍នេះទេ ។
បងស្រី ណែត បានបន្តថា «ខ្ញុំតែងតែលក់ផ្លែឈើពីចំការផ្ទាល់របស់ខ្ញុំ នៅម្តុំតំបន់អភិវឌ្ឍនភ្នំវល្ល៍ក្នុងក្រុងកែប ខេត្តកែប យើងលក់ក្នុងខេត្តយើងខ្លះ និងមកទីនេះខ្លះ (ក្រុងភ្នំពេញ) ។ បើមិនធ្វើចឹងយើងលក់ផ្លែឈើមិនដាច់ មានតែទុកស្អុយអស់ហើយ អត់បានប្រាក់ទៀត ចឹងយើងគ្មានជម្រើសទេ ។ ពួកយើងនៅក្នុងភ្នំពេញ ត្រូវប្រថុយនឹងខាតដែរ ឬរត់មិនរួច ព្រោះត្រូវបង់ថ្លៃជួលផ្ទះបណ្ណោះអាសន្ន និងចំណាយការបង់ថ្លៃជួលតូប និងថ្លៃដឹកទំនិញពីខេត្ត» ។
បងស្រីបន្ថែមថា «ប្រសិនជាផាត់ចោលថ្លៃចំណាយផ្សេងៗចេញ នៅទីនេះខ្ញុំអាចសល់លុយបានត្រឹម ៥ ទៅ ៧ម៉ឺនក្នុងមួយថ្ងៃ ដោយសារក្នុង ១គីឡូក្រាម ព្រោះខ្ញុំចំណេញបានតែ ២០០០រៀលទេ» ។ បងស្រី ណែត ក៏បានបញ្ជាក់ដែរថាក្នុងចំការបងស្រី មិនបានប្រើថ្នាំអ្វីទេ គឺដាំដោយបច្ចេកទេសធម្មជាតិសុទ្ធសាធ គាត់ថាត្រូវការចំនួនអ្នកទុកចិត្តជាជាងលក់អស់ច្រើន ។
យ៉ាងណាមិញ បងស្រីលក់ផ្លែឈើផ្សេងទៀតបានលើកឡើងថា ទោះបីប្រទេសកម្ពុជាកំពុងជួបវបត្តិកូវីដ ១៩ ក្តី កន្លែងទេសចរណ៍ភាគច្រើនរងផលប៉ះពាល់ ហើយភ្ញៀវទេសចរជាតិ និងអន្តរជាតិត្រូវបានកាត់បន្ថយ ជាកក្កតាដែលធ្វើឲ្យប្រជាជនលក់ដូរខ្លះរងនូវផលប៉ះពាល់នេះ ។ ប៉ុន្តែខ្លះទៀតក៏លក់បានគួសម្យ ក្នុងរដូវកាលទទួលផលផ្លែឈើធម្មជាតិនានា ។
អ្នកលក់ផ្លែឈើម្នាក់ក្បែររបងវិទ្យាល័យ ប៊ុន រ៉ានី-ហ៊ុនសែន ផ្សារដើមថ្កូវ សុំមិនបញ្ចេញឈ្មោះបានប្រាប់ «កោះសន្តិភាព» ថា បងស្រីលក់ទុរេនបាន ៣០ ទៅ ៤០គីឡូក្រាមក្នុងមួយថ្ងៃប៉ុន្តែបើប្រៀបនឹងឆ្នាំទៅវិញបានតិចជាង ។
បងស្រីបាននិយាយថា វាជារដូវកាលទទួលផលផ្លែឈើហូបផ្លែ ហើយជារៀងរាល់ឆ្នាំខ្ទង់ពីរបីខែនេះ ខ្ញុំតែងតែលក់ទុរេននៅទីនេះ ហើយបើប្រៀបធៀបឆ្នាំទៅលក់មិនសូវដាច់ទេ ។ ខ្ញុំលក់ដាច់ដោយសារ ខ្ញុំមានម៉ូយច្រើនជួយទិញបើតាមលក់ធម្មតា គឺស្ងាត់ណាស់ ។
ដោយរស់នៅក្នុងទីក្រុងភ្នំពេញ តែបងស្រីថា ទុរេន របស់បងស្រីលើកយកមកពីភ្នំកំចាយ ខេត្តកំពត លក់ក្នុងតម្លៃធម្មតា ដូចគេដូចឯងដែរមួយគីឡូក្រាមតម្លៃ ២៥០០០រៀល ប៉ុន្តែបើភ្ញៀវរើសហើយ ហើយវាទុំជ្រុល ឬល្វីង អាចដូរបាន ៕
ចែករំលែកព័តមាននេះ