នៅពេលដែលក្រុមហ៊ុន Amazon ចេញលក់ស្មាតហ្វូនដំបូងរបស់ខ្លួនគឺ Fire Phone នៅខែកក្កដាឆ្នាំ ២០១៤ មនុស្សជាច្រើនបានរិះគន់លើផលិតផលនេះ ដែលធ្វើឲ្យក្រុមហ៊ុនសម្រេចចិត្តឈប់លក់វាទាំងស្រុងនៅខែកញ្ញាឆ្នាំ ២០១៥ ។
វាជាការបរាជ័យដ៏ធំមួយដែលអាចធ្វើឲ្យនាយកប្រតិបត្តិជាច្រើនចាប់ផ្តើមទម្លាក់កំហុសឲ្យអ្នកដទៃ ប៉ុន្តែលោក ជេហ្វ បេសូស (Jeff Bezos) មិនបានធ្វើដូច្នេះទេ ។
បុរសដែលមានជាងគេលើលោកម្នាក់នេះបានប្រាប់ដល់លោក អៀន ហ្វ្រីដ (Ian Freed) ដែលជាប្រធាននាំមុខការបង្កើត Fire Phone ថា អ្នកមិនអាចបាក់ទឹកចិត្តព្រោះតែ Fire Phone សូម្បីតែមួយនាទី ។ សន្យាជាមួយខ្ញុំថា អ្នកនឹងមិនគេងមិនលក់សូម្បីតែមួយនាទី ។លោកបានមានប្រសាសន៍ដូចនេះទោះជាក្រុមហ៊ុនបានខាតបង់ដល់ទៅ ១៧០លានដុល្លារព្រោះតែការបរាជ័យរបស់ Fire Phone ក៏ដោយ ។ ហើយវាក៏បានឆ្លុះបញ្ចាំងពីការដឹកនាំរបស់លោក បេសូស ផងដែរ ។
សម្រាប់លោក ការបរាជ័យជាផ្នែកមួយនៃការលូតលាស់ ។ លោក បេសូស ធ្លាប់បានសរសេរសំបុត្រមួយទៅឲ្យម្ចាស់ភាគហ៊ុនទាំងអស់របស់ក្រុមហ៊ុនកាលពីឆ្នាំ ២០១៨ ថា ខណៈដែលក្រុមហ៊ុនលូតលាស់រីកចម្រើន អ្វីៗទាំងអស់ត្រូវតែធំជាងមុនដែរ សូម្បីតែទំហំនៃការបរាជ័យរបស់អ្នក ។ ប្រសិនបើទំហំនៃការបរាជ័យរបស់អ្នកមិនកើនឡើងទេ អ្នកនឹងមិនអាចបង្កើតបានអ្វីដែលមានតម្លៃបានឡើយ ។
លោកក៏បានសរសេរក្នុងសំបុត្រមួយទៀតកាលពីឆ្នាំ ២០១៩ ថា ពួកយើងនឹងខិតខំប្រឹងប្រែងដើម្បីធ្វើឲ្យវាក្លាយជាការភ្នាល់ល្អ ប៉ុន្តែមិនមែនការភ្នាល់ល្អៗទាំងអស់នឹងនាំយកផលចំណេញច្រើនទេ ។ ការហ៊ានចាប់យកហានិភ័យធំៗ គឺជាផ្នែកមួយនៃសេវាកម្មដែលពួកយើងដែលជាក្រុមហ៊ុនធំមួយអាចផ្គត់ផ្គង់ដល់អតិថិជន និងសង្គម ។ អ្វីដែលល្អសម្រាប់ម្ចាស់ភាគហ៊ុនគឺឆ្នះការភ្នាល់ល្អមួយក៏អាចរកប្រាក់ចំណេញច្រើនជាងការខាតបង់នៃការបរាជ័យជាច្រើនដែរ ។
កត្តាមួយទៀតដែលធ្វើឲ្យលោកជោគជ័យ គឺទាក់ទិននឹងការចំណាយពេលឆ្ងល់ និងធ្វើពិសោធន៍ ។ ទូរស័ព្ទ Fire Phone បានបរាជ័យពិតមែន ប៉ុន្តែ Software មួយចំនួនដែលបានបង្កើតសម្រាប់ទូរស័ព្ទនេះត្រូវបានប្រើដើម្បីផលិតផលិតផលផ្សេងៗទៀតដូចជា Echo និង Alexa ដែលមានប្រជាប្រិយយ៉ាងខ្លាំង ។
លោក បេសូស គិតថា ការជោគជ័យរបស់ក្រុមហ៊ុន គឺមួយផ្នែកមកពីការប្តេជ្ញារបស់ Amazon ក្នុងការសាកល្បងអ្វីដែលថ្មី ។ លោកគិតថា ដើម្បីជំរិញឲ្យមានការបង្កើតថ្មី និងភាពជ្នៃប្រឌិត មនុស្សត្រូវការពេលសម្រាប់ឆ្ងល់ និងសាកល្បងគំនិតថ្មីៗ ៕
ចែករំលែកព័តមាននេះ