ខេត្តកំពង់ចាម ៖ ផ្លូវដីដែលធ្លាប់មានសភាពក្រហេងក្រហូងបែកភក់ ពិបាកក្នុងការធ្វើដំណើរទាំងកង់ ម៉ូតូ និងរថយន្តក្នុងស្រុកស្រីសន្ធរ ។ ដោយមើលឃើញក្តីកង្វល់របស់ប្រជាពលរដ្ឋ អាជ្ញាធរគ្រប់លំដាប់ថ្នាក់ បានគិតគូរនិងស្ថាបនាផ្លូវបេតុងប្រវែង២១គីឡូម៉ែត្រ រួមទាំងផ្លូវអ៊ុតបេទីមឡើងរលោង ហើយបានធ្វើឲ្យប្រជាពលរដ្ឋសាទរគ្រប់ៗគ្នា។
លោកតាអឿ អឿន វ័យ៧១ឆ្នាំនៅភូមិផ្ទះកណ្ដាល ឃុំផ្ទះកណ្ដាល ស្រុកស្រីសន្ធរមានប្រសាសន៍ឱ្យដឹងនាព្រឹកថ្ងៃទី២៤ឧសភា២០២០ថា ឪពុកម្ដាយរបស់គាត់បានចាប់កំណើតនៅលើទឹកដីស្រុកស្រីសន្ធរជាប់នឹងដងទន្លេមេគង្គ។តាំងតែពីដើមរៀងមកផ្លូវមុខផ្ទះរបស់គាត់ជាប្រភេទផ្លូវដីហើយហុយក្នុងរដូវប្រាំងនឹងបែកភក់ក្នុងរដូវវស្សា ពិបាកនៅក្នុងការធ្វើដំណើរណាស់។
លោកតាអឿន មានប្រសាសន៍ឱ្យដឹងទៀតថា ក្នុងគ្រាផ្លូវដែលលំបាកមានពេលខ្លះគាត់ត្រូវជិះកង់ធ្វើដំណើរចេញពីផ្ទះទៅកាន់ភូមិដទៃទៀត តែងតែរអិលកង់ដួលប្រឡាក់សម្លៀកបំពាក់ជាញឹកញាប់មិនមែនត្រឹមតែគាត់នោះទេសូម្បីតែអ្នកធ្វើដំណើរឯទៀតកំពុងតែជិះម៉ូតូសុខៗ បានរអិលភក់ដួល ។ការលំបាកនេះបានកើតឡើងរហូតមកដល់វៃគា្ន៧១ឆ្នាំ ទើបតែក្នុងឆ្នាំ ២០២០នេះ ផ្លូវបេតុងត្រូវបានស្ថាបនារួចរាល់១០០% ចាប់ពីត្រង់ចំណុចមុខសាលាស្រុកស្រីសន្ធរកាត់តាមភូមិរបស់គាត់ទៅព្រំប្រទល់ស្រុកកោះសូទិន ជាមួយនោះមានបំពាក់អំពូលភ្លើងប្រើពន្លឺព្រះអាទិត្យ ហើយនៅពេលយប់ភ្លើងបានភ្លឺចិញ្ចែងចិញ្ចាចដែលមើលទៅហាក់បីដូចជាផ្លូវនៅក្នុងទីក្រុងយ៉ាងដូច្នោះ។
ជាមួយនឹងផ្លូវល្អស្អាតគាត់បានប្រសិទ្ធនាមប្រៀបដូចជាឋានសួគ៌ គាត់មិនចាកចេញទៅរស់នៅស្រុកណាទៀតនោះទេ។គឺសុខចិត្តរស់នៅស្រុកកំ ណើត ព្រោះអាជ្ញាធរដែនដីកំពុងតែមានការយកចិត្តទុក ដាក់ក្នុងការអភិវឌ្ឍមូលដ្ឋានឲ្យទទួលបានការរីកចម្រើន ដូចជានៅតំបន់ផ្សេងៗទៀត។ ពេលដែលបានផ្លូវស្អាតហើយនោះសូមអ្នកបើកបរមធ្យោបា យយានយន្តតូចធំមេត្តាគោរព ច្បាប់ចរាចរណ៍ ធ្វើយ៉ាងណាបង្ការកុំឲ្យមានគ្រោះថ្នាក់កើតឡើង។
ស្ត្រីឈ្មោះសៀ មួយ អាយុ៦៤ ឆ្នាំរស់នៅក្នុងឃុំផ្ទះកណ្ដាលប្រាប់ឲ្យដឹងថា កាលពីមុនផ្លូវនេះជាប្រភេទផ្លូវដីក្នុងរដូវវស្សាមានពេលមួយគាត់បានជិះកង់ឌុបស្ករទៅលក់នៅឯផ្សារមិនទាន់ទាំងដល់ផងត្រូវរអិលដួលបែកឆ្នាំងស្ករអស់។សូម្បីទៅសិស្សជិះកង់មករៀនក៏ដួលញឹកញាប់នៅក្បែរមុខផ្ទះរបស់គាត់ដោយសារតែរដូវភក់ក្នុងរដូវវស្សា។ពេលដែលបានផ្លូវបេតុងរលោងគាត់ពិតជាសប្បាយរីករាយ។
លោកស៊ីម គង់ អភិបាលស្រុកស្រីសន្ធរ មានប្រសាសន៍ឱ្យដឹងដែលថា កាលពីដើមទីផ្លូវនៅមុខសាលាស្រុកជាប្រភេទផ្លូវដីដែលមានប្រវែងច្រើនគីឡូម៉ែត្រកាត់តាមភូមិឋានរបស់ប្រជាពលរដ្ឋទៅដល់ព្រំប្រទល់ស្រុកកោះសូទិន។ដោយសារតែការលំបាកជាច្រើនឆ្នាំប្រជាពលរដ្ឋបានស្នើសុំមកអាជ្ញាធរពាក់ព័ន្ធ ហើយក៏ត្រូវបានសម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានផ្ដល់ជាផ្លូវបេតុងដែលមានប្រវែង២១គីឡូម៉ែត្រ ចាប់ផ្ដើមស្ថាបនាឡើងក្នុងខែមិនាឆ្នាំ ២០១៨ ចរាល់នៅក្នុងឆ្នាំ ២០២០។ក្រោមការជួយឧប ត្ថម្ភពីសំណាក់ក្រុមហ៊ុនប៉េង ហួត គ្រុប ក្នុងនោះមានប្រវែង ៥គីឡូម៉ែត្រ បានអ៊ុតកៅស៊ូបេទីមឡើងរលោង៕
ចែករំលែកព័តមាននេះ