ប្រទេសថៃ៖ អាជ្ញាធរសុខាភិបាលថៃ គូសបញ្ជាក់កាលពីថ្ងៃទី២៤ ឧសភា ថា ពុំមានអ្នកឆ្លងវីរុសCOVID-19ថ្មី និងក៏ពុំអ្នកស្លាប់ថ្មីដែររយៈពេល២៤ម៉ោងចុងក្រោយនេះនៅប្រទេសថៃ។ តុល្យការចំនួនអ្នកឆ្លងវីរុសនៅថៃមានសរុប៣.០៤០នាក់ ហើយអ្នកស្លាប់មាន៥៦នាក់ តាំងពីចាប់ផ្ដើមការឆ្លងពីខែមករាមក។ នេះជាលើកទី៤ហើយតាំងពីដើមខែនេះមក ដែលពុំមានអ្នកឆ្លងថ្មីប្រចាំថ្ងៃ។
ប្រេសីុលអ្នកស្លាប់ឡើងដល់ជាង២២ពាន់នាក់
ក្រសួងសុខាភិបាលប្រេសីុលគូបញ្ជាក់ថា ប្រេសីុលកត់សម្គាល់ឃើញ អ្នកស្លាប់ថ្មីដោយសារវីរុស៩៦៥នាក់ថែមទៀត នាំឲ្យចំនួនអ្នកស្លាប់សរុបឡើងដល់២២.០១៣នាក់ តាំងពីមានការឆ្លងមក។ ចំណែកអ្នកឆ្លងវីរុសថ្មីមានជាង១៦.៥០០នាក់ នាំឲ្យចំនួនអ្នកឆ្លងសរុបឡើងដល់៣៤៧.៣៩៨នាក់ក្នុងប្រទេសនេះ។ វាជាចំនួនអ្នកឆ្លងវីរុសដ៏ច្រើនបំផុត លើពិភពលោកបន្ទាប់ពីសហរដ្ឋអាមេរិក។ តុល្យការពិតប្រាកដនៃការឆ្លង អាចមានខ្ពស់ជាងនេះ ខណៈសមត្ថភាពនៃការធ្វើតេស្តនៅប្រេសីុលមានកម្រិត។
អ្នកឆ្លងនៅអាល្លឺម៉ង់មានជាង១៧៨ពាន់នាក់
វិទ្យាស្ថានROBERT KOCHទទួលបន្ទុកខាងជំងឺឆ្លងអាល្លឺម៉ង់ រាយការណ៍នាថ្ងៃទី២៤ឧសភាថា ចំនួនអ្នកឆ្លងវីរុសក្នុងប្រទេសនោះ បានឡើងដល់១៧៨.២៨១នាក់ជាមួយអ្នកឆ្លងថ្មី ៤៣១នាក់២៤ម៉ោងចុងក្រោយនេះ។ តាមប្រភពដដែលថា នៅអាល្លឺម៉ង់មានអ្នកស្លាប់ថ្មីដោយសារវីរុសតែ៣១នាក់ រយៈពេល២៤ម៉ោងចុងក្រោយនេះ នាំឲ្យចំនួនអ្នកស្លាប់សរុប ឡើងដល់៨.២៤៧នាក់តាំងពីចាប់ផ្ដើមការឆ្លងក្នុងប្រទេសនោះមក៕
ចែករំលែកព័តមាននេះ