ខេត្តស្វាយរៀង ៖ អគ្គីភ័យបានឆាបឆេះផ្ទះ២ខ្នងទំហំ៨ម៉ែត្រគុណ២០ម៉ែត្រសង់អំពីឈើលើ ក្រោមថ្មរនាបក្តារ ជញ្ជាំងក្តារ ដំបូលប្រក់ក្បឿងហ្វ៊ីប្រូ ហើយភ្លើងបានឆេះទ្រព្យសម្បត្តិអស់គ្មានសល់។ ពាក់ព័ន្ធនឹងករណីនេះ ត្រូវបានសមត្ថកិច្ចឱ្យដឹងថា មូលហេតុគឺបណ្តាលមកពីទុស្សេខ្សែភ្លើងនៅក្នុងផ្ទះបាយ។
ហេតុការណ៍ខាងលើនេះបានកើតឡើងកាលពីវេលាម៉ោង៥និង៤០នាទីល្ងាចថ្ងៃទី២៤ ឧសភា ឆ្នាំ២០២០ នៅចំណុចខាងត្បូងជាប់របងសាលាដំបូងខេត្តស្វាយរៀង ស្ថិតក្នុងភូមិស្រះវង្ស សង្កាត់ស្វាយរៀង ក្រុងស្វាយរៀង ។
ម្ចាស់ផ្ទះរងគ្រោះខាងលើឈ្មោះងួន រ៉ា ភេទប្រុស អាយុ៥៨ឆ្នាំ ជាក្រឡាបញ្ជីសាលាដំបូងខេត្តស្វាយរៀង រស់នៅក្នុងភូមិឃុំកើតហេតុខាងលើ ។
តាមប្រភពព័ត៌មានបានឱ្យដឹងថា នៅថ្ងៃកើតហេតុ ម្ចាស់ផ្ទះរងគ្រោះ (ប្តីប្រពន្ធនិងកូន) បានទៅធ្វើបុណ្យនៅស្រុកកំណើតឃុំគគីរសោម ស្រុកស្វាយទាប រីឯកូនស្រីនិងកូនប្រសាបាននាំកូនទៅចាក់ថ្នាំព្យាបាលជម្ងឺនៅមន្ទីរពេទ្យ ដោយនៅតែកូនស្រីម្នាក់អាយុ២៦ឆ្នាំចាំផ្ទះ ។
តាមប្រភពព័ត៌មានបានឱ្យដឹងបន្តថា មុនពេលកើតហេតុ កូនស្រីម្នាក់អាយុ២៦ឆ្នាំដែលនៅចាំផ្ទះបានដាំស្លរួចក៏ចូលបន្ទប់ទឹកដើម្បីមុជទឹក ស្រាប់តែទុស្សេខ្សែភ្លើងក្នុងផ្ទះបាយខាងក្រោយ ហើយនាងក៏បានរត់ចេញមកខាងមុខផ្ទះដើម្បីបិទបារ៉ែតភ្លើង ពេលនោះភ្លើងបានឆាបឆេះផ្ទះបាយ ហើយនៅក្នុងផ្ទះបាយក៏មានធុងហ្គាសចំនួន២ ក្នុងនោះធុងហ្គាស១ទម្ងន់១៧គីឡូក្រាម ត្រូវភ្លើងឆាបឆេះធុងហ្គាសទាំងពីរផ្ទុះយ៉ាងខ្លាំងបង្កជាអណ្តាតភ្លើងឆាបឆេះផ្ទះទាំងមូលយ៉ាងសន្ធោសន្ធៅតែម្តង។
តាមប្រភពព័ត៌មានបានឱ្យដឹងបន្តទៀតថា ដោយសារជាផ្ទះឈើលើ ថ្មក្រោម ហើយក្នុងបន្ទប់នីមួយៗ មានពូក កន្ទេល មុង ភួយ និងសម្លៀកបំពាក់ បង្កឲ្យភ្លើងឆេះកាន់តែខ្លាំង និងមានខ្យល់ខ្លាំងទៀតនោះ បណ្តាលឱ្យអណ្តាតភ្លើងឆេះលឿន ហើយនាងនៅតែម្នាក់ឯងភ័យផង ក៏បានទូរសព្ទ័ទៅប្អូនថ្លៃឲ្យមកផ្ទះដើម្បីហៅរថយន្តពន្លត់អគ្គីភ័យចុះមកជួយអន្តរាគមន៍ លុះពេលមកដល់ ភ្លើងបានឆាបឆេះទាំងផ្ទះពេញបន្ទុកទៅហើយ ។
ក្នុងហេតុការណ៍ខាងលើនេះដែរ លោកស្នងការនគបាលខេត្តស្វាយរៀងបានបញ្ជារថយន្តពន្លត់អគ្គីភ័យរបស់ស្នងការចំនួន២គ្រឿង រថយន្តពន្លត់អគ្គីភ័យកងរាជអាវុធហត្ថខេត្ត២គ្រឿង ដោយប្រើប្រាស់ទឹកអស់១៥គ្រឿង ទើបអាចគ្រប់គ្រងស្ថានការណ៍បាននៅវេលាម៉ោង៨និង៣០នាទីយប់ថ្ងៃដដេល ប៉ុន្តែភ្លើងបានឆាបឆេះផ្ទះអស់ទាំងស្រុង រួមទាំងទ្រព្យសម្បត្តិ មាសប្រាក់ សំលៀកបំពាក់ ពូក កន្ទេល មុង ភួយ ខ្នើយត្រូវភ្លើងឆេះអស់គ្មានសល់ តែមិនបង្កឲ្យគ្រោះថ្នាក់ដល់មនុស្សណាម្នាក់នោះទេ ហើយក៏មិនបង្កឲ្យឆេះឆ្លងរាលដាលទៅដល់ផ្ទះអ្នកជិតខាងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ