ប្រេស៊ីល ៖ តាមប្រភពព័ត៌មាន Channel News Asia បានឱ្យដឹងថា ក្រសួងសុខាភិបាលប្រេស៊ីលបានថ្លែងថា ប្រទេសប្រេស៊ីលបានរកឃើញករណីបាត់បង់ជីវិតថ្មីដោយជម្ងឺកូវីដ៩៦៥ករណី កាលពីថ្ងៃសៅរ៍ ដែលធ្វើឱ្យករណីបាត់បង់ជីវិតសរុបឡើងដល់ ២២.០១៣ករណី។
យោងតាមក្រសួងបានឱ្យដឹងថា ប្រទេសនេះឥឡូវនេះមានករណីឆ្លងសរុបចំនួន ៣៤៧.៣៩៨ករណី ដែលបានកើនឡើងករណីថ្មីដល់ទៅ ១៦.៥០៨ករណី ពីថ្ងៃសុក្រ។ ពេលនេះគឺប្រទេសប្រេស៊ីលបានស៊ីដាច់ប្រទេសរុស្ស៊ី យកលំដាប់ថ្នាក់លេខ២លើតារាងជម្ងឺកូវីដលើពិភពលោកបន្ទាប់ពីសហរដ្ឋអាមេរិក។
ចំនួនអ្នកឆ្លងនិងអ្នកបាត់បង់ជីវិតពិតប្រាកដ ត្រូវបានគេយល់ថាច្រើនជាងនេះ ហើយគិតថារដ្ឋាភិបាលខិតខំលាក់បាំង និង សមត្ថភាពធ្វើតេស្តនៅមានកំណត់។
ប្រធានាធិបតីប្រេស៊ីល លោក Jair Bolsonaro បានរងការរិះគន់យ៉ាងខ្លាំងចំពោះការចាត់វិធានការរបស់លោកចំពោះការផ្ទុះឡើងនៃជម្ងឺនេះ ដែលបានបណ្តាលឱ្យរដ្ឋមន្ត្រីសុខាភិបាលចំនួន ២នាក់ចេញពីតំណែង ព្រោះតែប្រឆាំងនឹងការមិនអើពើរបស់ប្រធានាធិបតី ចំពោះរក្សាគម្លាតសង្គម និង ការប្រាប់ឱ្យប្រើប្រាស់ថ្នាំខុសរបៀប៕ (យោងតាមប្រភពពី www.channelnewsasia.com)
ចែករំលែកព័តមាននេះ