កូវីដ ១៩ បានបង្កគ្រោះភ័យទាំងផ្នែកសុខភាព និងសេដ្ឋកិច្ច ហើយផលប៉ះពាល់ទាំងនេះអាចនឹងមានវត្តមានក្នុងរយៈពេលជាច្រើនឆ្នាំក្រោយពីពិភពលោកឆ្លងផុតការផ្ទុះជំងឺខាងលើ ។ ពិភពលោក ព្រមទាំងទីផ្សារ អតិថិជន និងអ្នកលក់មានភាពខុសពីមុន ហើយពួកគេអាចនឹងផ្លាស់ប្តូរជារៀងរហូតដែរ ។ ដូច្នេះតើអាជីវករត្រូវធ្វើយ៉ាងដូចម្តេចដើម្បីជោគជ័យក្នុងពិភពលោកថ្មីបន្ទាប់ពីកូវីដ ១៩?
១. រកឱកាស
អាជីវករតែងតែចេះរកឱកាសនៅជុំវិញខ្លួន ។ ឱកាសដំបូងដែលអាជីវករត្រូវយកចិត្តទុកដាក់លើ គឺការបង្កើនចំណែកទីផ្សារ ។ បច្ចុប្បន្ននេះ ទម្លាប់ និងភាពស្មោះត្រង់របស់អតិថិជនត្រូវបានផ្លាស់ប្តូរហើយ ដូច្នេះវាជាឱកាសល្អក្នុងការទាក់ទាញអតិថិជនថ្មីមកកាន់អាជីវកម្មអ្នក ។
ក្រៅពីនេះទៅទៀត វាជាពេលដែលអ្នកត្រូវវាយតម្លៃលើផ្នែកមួយចំនួនក្នុងអាជីវកម្មរបស់អ្នកដែលកំពុងធ្វើឲ្យអ្នកខាតបង់ជារៀងរាល់ខែ ។ អ្នកអាចបោះបង់វាចោល ចរចាជាមួយភាគីជាប់ទាក់ទិនឡើងវិញ ឬរកជម្រើសថ្មីដែលល្អជាងមុន ។
២. បង្កើតអាជីវកម្មសម្រាប់ពិភពលោកថ្មី
កូវីដ១៩ បានជំរុញឲ្យមានការផ្លាស់ប្តូរក្នុងសេដ្ឋកិច្ច ទីផ្សារ សហគមន៍ និងគោលការណ៍របស់មនុស្សផងដែរ ។ ដោយហេតុដូចនេះ អាជីវកម្មដែលចង់ជោគជ័យត្រូវតែផ្តោតស្មារតីលើការធ្វើទំនើបកម្មផ្នែកបច្ចេកវិទ្យា និងការប្រមូលទិន្នន័យ និងចំណេះដឹងផងដែរ ។
៣. រកវិធីសម្របខ្លួនទៅនឹងការផ្លាស់ប្តូរ
មនុស្សជាច្រើននឹងមានតម្រូវការខ្ពស់សម្រាប់ផលិតផល និងសេវាកម្មដែលផ្គត់ផ្គង់តាមតម្រូវការសំខាន់ៗដូចជាអាហារ និងការរស់នៅដែលមិនប៉ះពាល់ដល់សុខភាពជាដើម ។ លើសពីនេះទៅទៀត ភាពងាយស្រួលក៏នឹងកាន់តែមានភាពទាក់ទាញដែរដូចជាការទិញទំនិញអនឡាញ និងធ្វើការពីផ្ទះជាដើម ។ និងចុងក្រោយ មនុស្សអាចនឹងងាកទៅពេញចិត្តការចែករំលែកបទពិសោធន៍ និងអនុស្សាវរីយ៍ជាមួយអ្នកដទៃច្រើនជាងលើសម្ភារៈប្រើប្រាស់ ៕
ចែករំលែកព័តមាននេះ