ក្រុងម៉ានីល ហ្វ៉ីលីពីន ៖ ជើងឯកប្រដាល់ពិភពលោកម៉ានី ប៉ាក់គីអាវ កាលពី ថ្ងៃពុធ ទី១២ ឧសភា បានប្រកាសថាខ្លួនចង់ឡើងប្រកួតជាមួយលោកមេវេដឌ័រ ដើម្បីទុកជាអនុស្សាវរីយ៍នៃការប្រកួតចុងក្រោយរបស់ខ្លួន ។ ប៉ាក់គីអាវ មានបំណងលាឈប់ពីការប្រដាល់ហើយចាប់អាជីពជាអ្នកនយោបាយវិញ ។
ការជួបគ្នារវាងប៉ាក់គីអាវ និងមេវេដឌ័រ ដែលលោក Bob Arum បាននិយាយថាអាចកើតមាននៅថ្ងៃទី១៣ វិច្ឆិកា នៅឡាសវេហ្គាសឬក៏តិចសាស់នោះ គឺជាព្រឹត្ដិការណ៍ប្រកួតដ៏ធំបំផុតក្នុងប្រវត្ដិសាស្ដ្រកីឡាប្រដាល់អន្ដរជាតិ។
នៅក្នុងបទសំភាសន៍មួយជាមួយនឹង ទូរទស្សន៍ ABS-CBN លោកប៉ាក់គីអាវ បាន និយាយថា “ទស្សនិកជនជាច្រើនពិតជាចង់ឱ្យខ្ញុំប្រកួតជាមួយលោកមេវេដឌ័រខ្លាំងណាស់ ដូច្នេះខ្ញុំក៏បានសុំការអនុញាតពីអ្នកម្ដាយ របស់ខ្ញុំហើយគាត់ក៏បានយល់ព្រម។
ប៉ាក់គីអាវ ដែលបច្ចុប្បន្នមានអាយុ៣១ ឆ្នាំ គឺជាកីឡាករម្នាក់ក្នុងចំណោមកីឡាករប្រដាល់ដែលមានតំលៃខ្លួនខ្ពស់បំផុតលើលោក។ ចំណែកហ្វូងទស្សនិកជនកំពុងតែសង្ខើញចិត្ដចង់ឱ្យប៉ាក់គីអាវ ជួបជាមួយ លោកមេវេដឌ័រដែលមានវ័យ៣៣ឆ្នាំ។ ពួកគេចង់ដឹងថា រវាងស្ដេចប្រដាល់ទាំងពីរនាក់ តើមួយណាដែលខ្លាំងជាងគេក្នុងជំនាន់នេះ។
សូមបញ្ជាក់ថា ការចរចាប្រកួតកន្លងមក រវាងលោកប៉ាក់គីអាវ និងលោកមេវេដឌ័រ ត្រូវបានបរាជ័យកាលពីដើមឆ្នាំនេះ ខណៈដែលលោកមេវេដឌ័រទាមទារឱ្យមានការ ពិនិត្យឈាមតាមរបៀបកីឡាអូឡាំពិកដែល ចំណុចនេះត្រូវបានប៉ាក់គីអាវទាត់ចោល។
នៅក្នុងការរាប់លទ្ធផលនៃការបោះឆ្នោត កាលពីថ្ងៃចន្ទ ប៉ាក់គីអាវ បានឈ្នះសំលេង ភ្លូកទឹកភ្លូកដី ទទួលបានកៅអីតំណាងរាស្ដ្រនៅខេត្ដសារ៉ងហ្គានី ។ កាលពីខែមីនា ប៉ាក់គីអាវ បានឈ្នះអ្នកប្រដាល់ហ្គាណា លោកចូសួ ខ្លូតទី រក្សាបាននូវខ្សែក្រវាត់ WBO របស់ខ្លួន។ លើសពីនេះរូបគេក៏បានជាប់ឈ្មោះជាអ្នកប្រដាល់ដែលរកលុយបានច្រើនបំផុតលើ លោក ។ តាមទស្សនាវដ្ដី Forbes បានផ្សាយថា ប៉ាក់គីអាវ រកប្រាក់បាន៤០លានដុល្លារ អាមេរិក ក្នុងរយៈពេល១២ខែ ។ រូបគេស្ថិតក្នុងចំណោមជនល្បីឈ្មោះ
ទាំងឡាយដែលចង់បានតួនាទី និងតំណែងចាប់ពីក្រុមប្រឹក្សាក្រុង ដល់ប្រធានាធិបតី ៕
ចែករំលែកព័តមាននេះ