រាជធានីភ្នំពេញ ៖ ក្រោយបាត់មុខជាង៣ខែ ម្ចាស់ខ្សែក្រវាត់កម្ពុជាសង្វៀនគុនខ្មែរ ធន់ ចាន់តាក់ បានវិលមកហាត់វិញរយៈពេល២សប្តាហ៍មកហើយ ប៉ុន្តែរូបគេមិនទាន់ទទួលយកការប្រកួតពីសង្វៀនណាមួយនៅឡើយ ធ្វើឱ្យអ្នកគាំទ្រមានចម្ងល់យ៉ាងខ្លាំងមិនដឹងថាអាយដលរបស់ពួកគេមានរឿងអីបានជាបាត់មុខយូរបែបនេះ។
ឆ្លើយតបនឹងចម្ងល់នេះកូនសិស្សរបស់លោក គ្រូធន់ សុភា រូបនេះបានបញ្ជាក់ថា ដោយសារខានវាយយូរ ដូចនេះលោកត្រូវការពេលវេលាហ្វឹកហាត់ឱ្យបានពេញលេញល្អជាមុនសិន ទើបទទួលយកការប្រកួត ពីព្រោះលោកបារម្ភពេលឡើងទៅប្រកួតវាយមិនបានល្អធ្វើឱ្យអ្នកគាំទ្ររិះគន់នាំឱ្យប៉ះពាល់ដល់កិតិ្តយសដែលធ្លាប់ប្រកួតកន្លងមក ។
អ្នកប្រដាល់ចិត្តធំជាងប៉ែតរូបនេះ បន្ថែមថា ទម្ងន់របស់លោកមិនឡើងនោះទេ ព្រោះលោកហាត់ខ្លះៗពេលសម្រាកនៅផ្ទះ ហើយមកក្លិបហាត់បាន២សប្តាហ៍ហើយ ដូចនេះប្រហែលដាច់ខែឧសភា នេះលោកនឹងឱ្យលោកគ្រូដាក់ឈ្មោះប្រកួតវិញ ។
សូមបញ្ជាក់ថា អ្នកប្រដាល់មានប្រភពមកពីខេត្តកំពង់ឆ្នាំងរូបនេះ បានមុខពីសង្វៀនប្រដាល់ប្រមាណជា៣ខែដោយសារបញ្ហាជំងឺកូវីដ-១៩ ដែលបានបង្ខំឱ្យរូបគេស្នាក់នៅស្រុកកំណើត៕ (កែសម្រួលដោយ ៖ បុប្ផា)
ចែករំលែកព័តមាននេះ