ខេត្តមណ្ឌលគិរី៖ អាជ្ញាធរខេត្តមណ្ឌលគិរី ដឹកនាំដោយលោក ស្វាយ សំអ៊ាង បានចុះពិនិត្យមើលឈើល្មើសច្បាប់នៅក្រុមហ៊ុនផេស៊ីហ្វិកហ្រេ្គនយ៉ញស្តុកខមភេនីលីមីតធីត កាលពីថ្ងៃទី២១ ឧសភា ស្ថិតនៅភូមិរវ៉ាក់ ឃុំរយ៉ ស្រុកកោះញែក ខេត្តមណ្ឌលគិរី ដែលក្រុមហ៊ុន T S M Wឯកជនដេញថ្លៃបាន សម្រាប់កែច្នៃប្រើប្រាស់ក្នុងស្រុក។
លោក ស្វាយ សំអ៊ាង អភិបាលខេត្តបានមានប្រសាសន៍ថា ចំពោះឈើល្មើសច្បាប់ ដែលគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ចុះបង្ក្រាប នៅភូមិសាស្ត្រស្រុកកោះញែក នាពេលកន្លងមក ត្រូវបានក្រុមហ៊ុនTSMWឯក ធ្វើការដេញថ្លៃ តាមរយៈក្រសួងកសិកម្ម រុក្ខាប្រមាញ់ និងនេសាទ និងបានបង់ពន្ធជូនរដ្ឋ ដើម្បីយកឈើទាំងនោះ ធ្វើការកែឆ្នៃប្រើប្រាស់ក្នុងស្រុក។
លោកអភិបាលខេត្ត បានជំរុញដល់ក្រុមហ៊ុនត្រូវធ្វើការកែច្នៃ និងដឹកជញ្ចូនឈើល្មើសច្បាប់ទាំងនេះ ឱ្យបានរួចរាល់ក្នុងរយៈពេល៥ខែ ជាពិសេស ត្រូវអនុវត្តតាមបញ្ជីរបស់គណៈកម្មការជាតិ។ បន្ថែមលើសនេះ អភិបាលខេត្តបានណែនាំដល់មន្ត្រីជំនាញ ត្រូវសហការជាមួយក្រុមហ៊ុន ដើម្បីបង្ករលក្ខណៈងាយស្រួល ក្នុងការដឹកជញ្ចូនឈើតាមគោលដៅដែលបានចុះបញ្ជីយកទៅកែច្នៃប្រើប្រាស់តាមគោលការណ៍ដែលបានកំណត់។ ហើយកងកម្លាំងក៏ដូចជាមន្ត្រីជំនាញ ត្រូវយកចិត្តទុកដាក់អនុវត្តឱ្យបានត្រឹមត្រូវក្នុងការត្រួតពិនិត្យតាំងពីការដឹកជញ្ចូន និងការចេញលិខិតPCជាដើម ៕
ចែករំលែកព័តមាននេះ