ខេត្តកំពង់ស្ពឺ ៖ ក្រោយពីប្រទេសកម្ពុជាទទួលរងនៅវិបត្តិកូវីដ១៩ យើងអង្កេតឃើញថា អាជីវកម្មខ្នាតតូច ឬមធ្យម ក៏រងផលប៉ះពាល់ផងដែរ ។ នៅឯខេត្តកំពង់ស្ពឺឯនោះក៏ទទួលរងដូចគ្នា ដែលភាគច្រើនប្រជាជននៅទីនោះបានប្រកបមុខរបរក្រងផ្កា…
ខេត្តកំពង់ស្ពឺ ៖ ក្រោយពីប្រទេសកម្ពុជាទទួលរងនៅវិបត្តិកូវីដ១៩ យើងអង្កេតឃើញថា អាជីវកម្មខ្នាតតូច ឬមធ្យម ក៏រងផលប៉ះពាល់ផងដែរ ។ នៅឯខេត្តកំពង់ស្ពឺឯនោះក៏ទទួលរងដូចគ្នា ដែលភាគច្រើនប្រជាជននៅទីនោះបានប្រកបមុខរបរក្រងផ្កា ដើម្បីលក់ជូនភ្ញៀវទេសចរដែលទៅកម្សាន្តនៅទីនោះ ។
ដោយសារភ្ញៀវទេសចរត្រូវបានកាត់បន្ថយ ធ្វើអោយប្រជាជនដែលរស់នៅ និងប្រកបមុខរបរលក់ម្កុដផ្កាទីនោះ រកប្រាក់ចំណូលមិនបាន ឬលក់ផ្កាមិនដាច់ ដែលនេះបានធ្វើអោយពួកគាត់ខ្លះជួបបញ្ហាសេដ្ឋកិច្ចគ្រួសារ ។
អ៊ុំស្រីម្នាក់ជាអ្នកស្រុកភូមិ រស់នៅក្បែរឧទ្យានជាតិគីរីរម្យ ក្នុងខេត្តកំពង់ស្ពឺ អ៊ុំស្រីជាអ្នកប្រកបមុខរបរលក់ផ្កា ដើម្បីចិញ្ចឹមជីវិតប្រចាំថ្ងៃ ប៉ុន្តែដោយវិបត្តិកូវីដ១៩ នេះធ្វើអោយអ៊ុំស្រីបាត់បង់ប្រាក់ចំណូលប្រចាំថ្ងៃ ។
ដោយកាន់តែជរា និងមានរោគប្រចាំកាយទៀតនោះ អ៊ុំស្រី នៀង ជ្រោន ដែលមានអាយុ ៦៩ឆ្នាំហើយ បាននិយាយ «ខ្ញុំរករាល់ថ្ងៃសម្រាប់ចំណាយមួយថ្ងៃ ព្រោះខ្ញុំនៅផ្ទះតែម្នាក់ឯងទេ រកសម្រាប់តែខ្លួនឯង ពីព្រោះកូនចៅមានប្តីប្រពន្ធ ហើយទៅតាមគ្នាអស់ហើយ ។»
មុនកូវីដ១៩ កើតឡើងមានភ្ញៀវជាតិ និងអន្តរជាតិមកលេងកម្សាន្តនៅឧទ្យានជាតិប្រវត្តិសាស្ត្រនេះណាស់ ហើយនៅតាមផ្លូវទៅ យើងសង្កេតឃើញថា មានអ្នកស្រុកភូមិបានប្រកបមុខរបរលក់ដូរផ្សេងៗពីគ្នា មានដូចជា លក់ផ្លែឈើ ភេសជ្ជៈ ចំណីអាហារជាច្រើន និងលក់ម្កុដផ្កា ដើម្បីភ្ញៀវទិញទុកថតរូបលេង ។
អ៊ុំស្រី បន្តទៀតថា «ខ្ញុំលក់តែថ្ងៃសៅរ៍ និងថ្ងៃអាទិត្យទេ មុនពេលកូវីដ១៩ ខ្ញុំលក់បានគួរសម្យ ៤ទៅ៥ម៉ឺន ក្នុងមួយថ្ងៃ បើផាត់សងថ្លៃទិញផ្កាពីគេ ។ ប៉ុន្តែអីឡូវលក់មិនបានទេព្រោះអត់អ្នកមកលេង ហើយខ្ញុំក៏បានផ្អាកពេលខ្លះដែរ ដោយសារយើងត្រូវទិញផ្កាពីគេតទៀត ចឹងលក់មិនបានអត់មានលុយទិញទេ។»
អ៊ុំស្រីបន្ថែមថា «នៅពេលយើងទិញផ្កាពីគេ ហើយក៏មិនទាន់គ្រប់ដែរ យើងត្រូវដើរបេះផ្កាព្រៃបន្ថែម ដើម្បីបន្ថែមសម្រស់របស់ម្កុដឲ្យមានភាពទាក់ទាញ ។ ពេលខ្លះក៏ឈឺជើងដែរ តែត្រូវចូលក្នុងព្រៃ ដើម្បីបេះផ្កា ។ អីឡូវមិនមានប្រាក់ចំណូលទេ ហើយបានញុំាដោយសារអ្នកភូមិផងរបងជាមួយ គេយកបាយ និងសម្លរឲ្យញុំា ហើយពេលខ្លះក៏គេឲ្យអង្ករដែរ» ៕
ចែករំលែកព័តមាននេះ