ប្រទេសចិន ៖ តាមប្រភពព័ត៌មាន Shanghaiist បានឱ្យដឹងថា ស្ត្រីម្នាក់កំពុងតែត្រូវបានគេសរសើរថា បានធ្វើតាមការណែនាំរបស់សៀវភៅ នៅពេលដែលត្រូវពស់ចឹក។ ស្ត្រីម្នាក់ត្រកូល Ding…
ប្រទេសចិន ៖ តាមប្រភពព័ត៌មាន Shanghaiist បានឱ្យដឹងថា ស្ត្រីម្នាក់កំពុងតែត្រូវបានគេសរសើរថា បានធ្វើតាមការណែនាំរបស់សៀវភៅ នៅពេលដែលត្រូវពស់ចឹក។
ស្ត្រីម្នាក់ត្រកូល Ding បានទៅធ្វើចម្ការនៅតំបន់ជាយក្រុង Yangzhou នៃខេត្ត Jiangsu ហើយក៏ត្រូវបានពស់មួយក្បាលចឹកម្រាមដៃរបស់គាត់។ មិនបង្អង់យូរនាំតែខាតពេល គាត់ក៏បានវាយវាជាច្រើនដងជាមួយនឹងចបរហូតទាល់តែដាច់ក្បាល ហើយយកកៅស៊ូចងម្រាមដៃរបស់គាត់នៅគល់ ដើម្បីទប់មិនឱ្យពិសឆាប់ជ្រាបចូលក្នុងសរសៃឈាម។
បន្ទាប់មកគាត់បានរើសសាកសពពស់ យកទៅដាក់ក្នុងបាវ ហើយប្រញាប់បញ្ជូនវាទៅកាន់មន្ទីរពេទ្យ។ នេះមិនមែនយកវាទៅព្យាបាលនោះទេ។ តែគាត់បានយកវាទៅបង្ហាញដល់គ្រូពេទ្យ ដើម្បីឱ្យគ្រូពេទ្យអាចដឹងពីប្រភេទរបស់ពិស ហើយអាចធ្វើការព្យាបាលយ៉ាងមានប្រសិទ្ធភាព។
គ្រូពេទ្យបានកំណត់អត្តសញ្ញាណវាថា ជាពស់វែកកន្ទុយខ្លី។ ជាមួយនឹងការកំណត់អត្តសញ្ញាណនេះ គ្រូពេទ្យអាចរកថ្នាំបន្សាបមកឱ្យត្រូវជាមួយនឹងប្រភេទពិសពស់។
ដូច្នេះប្រសិនបើអ្នកថ្ងៃណាមួយត្រូវពស់ចឹក លោកអ្នកអាចយកគម្រូតាមអ្នកមីងខាងលើបាន។ ម្យ៉ាងទៀតប្រសិនបើអ្នកក្លាហានគ្រប់គ្រាន់ អ្នកក៏អាចចាប់ពស់នោះទាំងរស់ទៅមន្ទីរពេទ្យផងដែរ៕ ដកស្រង់ចេញពីវេបសាយ ៖ shanghaiist (កែសម្រួលដោយ ៖ បុប្ផា)
ចែករំលែកព័តមាននេះ