ខេត្តបាត់ដំបង ៖ អធិការនគរបាលស្រុកសង្កែបានរងការចោទប្រកាន់ថា បានព្យាយាមលាក់បាំងសំណុំ រឿងអំពើ «មនុស្សឃាត»មួយករណីដែលជាបទល្មើស«ឧក្រិដ្ឋ» អស់រយៈពេលជិត១ខែកន្លងទៅនេះ ហើយទើបតែត្រូវគេទម្លាយឲ្យដឹង កាលពីថ្ងៃទី២១ ឧសភា ដោយសារតែគេសង្ស័យទៅលើសមត្ថកិច្ចមានជាប់ពាក់ព័ន្ធនឹងការសមគំនិតគ្នាជាមួយជនដៃដល់ជាថ្នូរនឹងផលប្រយោជន៍ ។ ព្រោះជនដៃដល់ដែលមានគ្នាចំនួន៣នាក់ កំពុងស្ថិតនៅក្រៅសំណាញ់ច្បាប់យ៉ាងមានសេរីភាព។
ប្រភពព័ត៌មានបានទម្លាយពីប្រវត្តិសំណុំរឿងឧក្រិដ្ឋនេះថា សំណុំរឿង «មនុស្សឃាត»នេះ បានកើតឡើង តាំងពីយប់ថ្ងៃទី២៧ មេសា កន្លងទៅថ្មីៗនេះ នៅចំណុច«អូរខ្ចះ» ស្ថិតនៅខាងក្រោយភូមិកំពង់ឆ្លង ឃុំវត្តតាមិម ស្រុកសង្កែ ។ អំពើ«មនុស្សឃាត» នេះបង្កឡើងដោយជនសង្ស័យចំនួន០៣នាក់ (សុំលាក់ឈ្មោះ) បានព្រួតគ្នាវាយទៅលើជនរងគ្រោះម្នាក់ឈ្មោះ ចាន់ យ៉ត ភេទប្រុស អាយុ៣៦ឆ្នាំ រស់នៅក្បែរគ្នានៅក្នុងភូមិ-ឃុំ ខាងលើ។ ប្រភពបានឲ្យដឹងថា ភាគីជម្លោះនេះ គឺជាបងប្អូនជីដូន១នឹងគ្នា។ ពួកគេបាននាំគ្នាផឹកស៊ីនៅក្បែរអណ្ដូងទឹក ដែលបូមចាប់ត្រីអាំង ឬដុតក្លែមស្រាយ៉ាងសប្បាយ។
ការផឹកស៊ីនោះ បានពន្យាពេលរហូតដល់យប់ ហើយបានផ្ទុះជម្លោះយ៉ាងកំរោលនៅពេលស្រវឹងធ្លាក់ភ្នែករៀងៗខ្លួន។ ពេលនោះពួកជនដៃដល់បានព្រួតគ្នាវាយទៅលើឈ្មោះយ៉ត បណ្ដាលឲ្យរងរបួសធ្ងន់ ហើយជនរងគ្រោះបានស្លាប់នៅថ្ងៃទី២៨ មេសា ពេលបញ្ជូនទៅព្យាបាលនៅមន្ទីរពេទ្យ។ បើតាមព័ត៌មានថា ជនរងគ្រោះត្រូវក្រុមដៃដល់ព្រួតវាយរហូត «បែកក្រពះ» ទើបគ្រូពេទ្យជួយសង្គ្រោះមិនបាន។
ប្រភពដែលសុំមិនប្រាប់ឈ្មោះរូបនេះ បានបញ្ជាក់ថា ក្រោយកើតហេតុមួយថ្ងៃ គឺនៅថ្ងៃបុណ្យសពជនរងគ្រោះ គេឃើញសមត្ថកិច្ចមូលដ្ឋានបានចុះទៅសួរនាំនៅទីនោះ ហើយក៏ស្ងាត់ឈឹងរហូតដល់ពេលនេះ ខណៈក្រុមជនដៃដល់ទាំង០៣នាក់ដើរនៅក្នុងភូមិយ៉ាងរំភើយ។ ប៉ុន្តែក្រោយបញ្ចប់ពិធីបុណ្យសព គេល្បី
តៗគ្នាពេញភូមិថា ក្រុមជនដៃដល់ បានព្រមព្រៀងបង់សំណងឲ្យជនរងគ្រោះក្នុងម្នាក់ចំនួន២,០០០ដុល្លា ដោយមានមន្ត្រីប៉ុស្ដិ៍រដ្ឋបាលវត្តតាមិម ជាអ្នកជួយសម្របសម្រួលបិទសំណុំរឿងនេះ។
ឆ្លើយតបទៅនឹងព័ត៌មានបែកធ្លាយខាងលើនេះ លោកស៊ុន សុវណ្ណ អធិការស្រុកសង្កែ បានថ្លែងប្រាប់កោះសន្តិភាព តាមទូរស័ព្ទនៅព្រឹកថ្ងៃទី២២ ឧសភា នេះថា ករណីនេះពិតជាបានកើតឡើងបែបនេះមែន គឺភាគីទាំង២ជាបងប្អូនជីដូនមួយនឹងគ្នា ហើយ២ថ្ងៃក្រោយទើបកម្លាំងបុស្ដិ៍បានដឹងរឿងនេះ និងបានចុះទៅសាកសួរ។ លោកអធិការរូបនេះ បានប្រាប់ថា រឿងនេះបានកើតឡើងនៅពេលពួកគេនៅផឹកស៊ីជុំគ្នា ហើយបានឈ្លោះប្រកែកនិងវាយតប់គ្នាខ្លះ តែមិនដល់ថ្នាក់ធ្ងន់ធ្ងររហូតដល់ស្លាប់នោះទេ។ លោកបានបំភ្លឺហាក់ជួយសម្រាលបន្ទុកជនសង្ស័យថា ក្រោយពេលកើតហេតុ ជនទាំង៣នាក់នោះបានដឹកជនរងគ្រោះតាមម៉ូតូយកទៅពេទ្យ តែជនរងគ្រោះបានធ្លាក់ពីលើម៉ូតូ ទើបធ្វើឲ្យរបួសកាន់តែធ្ងន់ លុះបានមួយថ្ងៃក្រោយ ជនរងគ្រោះបានស្លាប់នៅមន្ទីរពេទ្យ។ ជនរងគ្រោះស្លាប់ដោយសារមានរោគផង មិនមែនស្លាប់ដោយសារតែគេវាយនោះទេ។
នៅពេលសួរថា តើហេតុអ្វីបានជាសមត្ថកិច្ចមិនចាត់ការទៅលើក្រុមជនដៃដល់ ? លោកស៊ុន សុវណ្ណ ហាក់ស្ទាក់ស្ទើរបន្តិចក្នុងការឆ្លើយតបនឹងសំនួរនេះ។ ប៉ុន្តែលោកបានផ្ដល់ចម្លើយទាំងប្រថុយប្រថានបែបនេះថា «ខ្ញុំមិនចាត់ការដោយសារតែវាមិនស្ថិតនៅក្នុងហេតុការណ៍ជាក់ស្ដែង និងសំអាងថា មិនបានវាយតប់គ្នា»។ មានការលើកឡើងថា សំណុំរឿងនេះលោកអធិការបានព្យាយាមបិទបាំងមិនរាយការណ៍ជូនថ្នាក់លើ.. តើពិតឬទេ ? លោកស៊ុន សុវណ្ណ បានសួរដេញដោលរកមុខអ្នកផ្ដល់ព័ត៌មាននេះមុននឹងឆ្លើយសំនួរ។ ព្រោះលោកអះអាងថា សំណុំរឿងនេះកំពុងស្ថិតក្នុងដៃរបស់លោកនៅឡើយ តើមន្ត្រីណាអ្នកផ្ដល់ ?
ប៉ុន្តែយ៉ាងណា លោកអធិការរូបនេះ បានផ្ដល់ចម្លើយបន្តយ៉ាងដូច្នេះថា « ក្រោយកើតហេតុ ខ្ញុំបានរាយ
ការណ៍ផ្ដាល់មាត់ជូនថ្នាក់លើ សូម្បីលោកព្រះរាជអាជ្ញាក៏ខ្ញុំបានរាយការណ៍ជូនដែរ តើថ្នាក់ណាដែលថា មិនដឹង ? ពេលនេះ ខ្ញុំកំពុងចងក្រងឯកសារ ដែលអាចបញ្ជូនទៅស្នងការនៅរសៀលថ្ងៃនេះហើយ (២២ ០៥ ២០)។ រីឯមនុស្ស៣នាក់ដែលពាក់ព័ន្ធមិនទៅណាទេ គឺស្ថិតនៅក្រោមការតាមឃ្លាំមើលរបស់សមត្ថ កិច្ចនៅឡើយ ហើយបើត្រូវការជួបខ្ញុំនឹងបញ្ជូនពួកគេទៅភ្លាម» ។
ដោយឡែក និយាយពីទឹកប្រាក់ចំនួន៦,០០០ដុល្លាវិញ ដែលគេអះអាងថា ជាទឹកប្រាក់របស់ក្រុមជនសង្ស័យទាំង០៣នាក់បង់សំណងឲ្យទៅគ្រូសារជនរងគ្រោះនោះ លោកស៊ុន សុវណ្ណ បានទទូលស្គាល់ថា ពិតជាមានមែន។ ប៉ុន្តែលោកបានបំភ្លឺអំពីចំនួនទឹកប្រាក់ដ៏សម្បើមនេះថា «ខ្ញុំបានដឹងចំនួនទឹកប្រាក់៦,០០០ដុល្លានោះ តែគ្រួសាររងគ្រោះអះអាងថា ជាប្រាក់ចូលបុណ្យ ខ្ញុំក៏ឆ្ងល់ដែរថា តើប្រាក់ចូលបុណ្យ ម្ដេចក៏សម្បើមម្លេះ ? តែយ៉ាងណា ខ្ញុំបានឲ្យមន្ត្រីប៉ុស្ដ៏ធ្វើរបាយការណ៏ច្បាស់លាស់ហើយ»។
វាហាក់ផ្ទុយបន្តិចពីការបំភ្លឺរបស់លោកអធិការស្រុកសង្កែ ពាក់ព័ន្ធនឹងចំនួនទឹកប្រាក់ចូលបុណ្យ៦,០០០ដុល្លា។ បើតាមព័ត៌មានច្បាស់ការ ដែលត្រូវបានគេបង្ហើបឲ្យដឹងនៅពេលបែកធ្លាយរឿងនេះថា នៅថ្ងៃធ្វើបុណ្យនោះ ក្រុមជនសង្ស័យទាំង០៣នាក់ បាននាំគ្នាកាន់ប្រាក់ម្នាក់ៗ២,០០០ដុល្លារទៅប្រគល់ជូនគ្រួសារជនរងគ្រោះ។ ពេលនោះ ភាគីរងគ្រោះស្រឡាំងកាំងទៅនឹងចំនួនទឹកប្រាក់ទាំងដុំៗ រួចសួរទៅពួកជនសង្ស័យថា តើប្រាក់អ្វីយកមកឲ្យគាត់ច្រើនម្លេះ ? ក្រុមជនសង្ស័យក៏បានឆ្លើយរៀបរាប់ស្ងាត់ៗពីដំណើររឿងដែលពួកខ្លួនវាយដំជនរងគ្រោះរហូតដល់ស្លាប់ ហើយសុំកុំឲ្យម្ដាយជនរងគ្រោះប្ដឹងផ្ដល់ និងសុំបញ្ចប់រឿងត្រឹមបង់សំណង៦,០០០ដុល្លារ ។
មិនតែប៉ុណ្ណោះ ក្រោយពីប្រគល់ប្រាក់ទៅគ្រួសារជនរងគ្រោះ ជនសង្ស័យទាំង៣នាក់ បាននាំគ្នាទៅប៉ុស្ដិ៍នគរបាលវត្តតាមិម ដើម្បីសារភាពរឿងនេះ។ ដោយឃើញភាគីទាំង២មិនប្ដឹងផ្ដល់គ្នា ទើបមន្ត្រីប៉ុស្ដិ៍ឯកភាពជួយធ្វើកិច្ចសន្យាទទូលសំណង និងមិនប្ដឹងផ្ដល់គ្នាឲ្យភាគីទាំង២ ថែមទាំងបិទខ្ជិបសំណុំរឿងនេះមិនរាយការណ៍ជូនថ្នាក់លើទៀតផង។
បើនិយាយអំពីនីតិវិធីតាមផ្លូវច្បាប់វិញ លោកស៊ុន សុវណ្ណ អធិការស្រុកសង្កែ អះអាងថា មូលហេតុដែលលោកមិនចាត់ការលើជនសង្ស័យ ដោយសារពេលនោះ មិនស្ថិតនៅក្នុងហេតុការជាក់ស្ដែង ព្រោះមន្ត្រីរបស់លោកបានដឹងក្រោយកើតហេតុ២ថ្ងៃ។ ប៉ុន្តែមន្ត្រីការិយាល័យជំនាញបានចាត់ទុកការបកស្រាយរបស់លោកអធិការរូបនេះថា «ជាការបកស្រាយខុសនឹងនីតិវិធីព្រហ្មទណ្ឌ»។ មន្ត្រីជំនាញបានបញ្ជាក់ថា បើយោងលើនីតិវិធីព្រហ្មទណ្ឌ «បទល្មើសជាក់ស្ដែងមានរយៈពេល៧ថ្ងៃ» សម្រាប់មន្ត្រីជំនាញធ្វើការស៊ើបអង្កេតនិងឃាត់ខ្លួនជនល្មើស។
ដូច្នេះ ក្នុងអំឡុងពេលដែលមន្ត្រីប៉ុស្ដិ៍ចុះសួរនាំ ក្រោយកើតហេតុ២ថ្ងៃនោះ គឺមិនទាន់ផុតនីតិវិធីជាក់ស្ដែង
ទេ។ ការលើកឡើងរបស់លោកអធិការស្រុកសង្កែបែបនេះ គឺស្មើនឹងមន្ត្រីដែលមិនចេះនីតិវិធីព្រហ្មទណ្ឌ។ ពេលនេះ លោកស្នងការខេត្ត បានបញ្ជាឲ្យលោកអធិការស្រុកសង្កែ ត្រូវតែបញ្ជូនសំណុំរឿងបទ«ឧក្រិដ្ឋ»នេះ មកកាន់ការិយាល័យជំនាញហើយ។ ប៉ុន្តែមន្ត្រីការិយាល័យជំនាញ បានបញ្ជាក់ថា គិតត្រឹមម៉ោង១២ថ្ងៃត្រង់ ថ្ងៃទី២២ ឧសភា ការិយាល័យជំនាញ មិនទាន់ឃើញមានរបាយការណ៍ជាក់លាក់ ដែលលោកអធិការស្រុកសង្កែ បញ្ជូនមកដល់ស្នងការខេត្តនៅឡើយទេ បែបទំនងកំពុងដើរប្រមូល៕
ចែករំលែកព័តមាននេះ