ខេត្តបន្ទាយមានជ័យ ៖ ខណៈម្តាយមិននៅផ្ទះ ក្មេងស្រីអាយុ៧ឆ្នាំម្នាក់ដាំទឹកក្តៅទុកឱ្យ លុះពេលកំពុងពុះលើកទឹកចេញពីចង្ក្រាន ស្រាប់តែរបូតដៃកំពប់ស្រោចលើភ្លៅទាំងសងខាង បណ្តាលឲ្យរលាកភ្លៅទាំងសងខាងយ៉ាងធ្ងន់ធ្ងរ ។ ហេតុការណ៍ខាងលើនេះបានកើតឡើងកាលពីរសៀលថ្ងៃទី២០ ខែឧសភា…
ខេត្តបន្ទាយមានជ័យ ៖ ខណៈម្តាយមិននៅផ្ទះ ក្មេងស្រីអាយុ៧ឆ្នាំម្នាក់ដាំទឹកក្តៅទុកឱ្យ លុះពេលកំពុងពុះលើកទឹកចេញពីចង្ក្រាន ស្រាប់តែរបូតដៃកំពប់ស្រោចលើភ្លៅទាំងសងខាង បណ្តាលឲ្យរលាកភ្លៅទាំងសងខាងយ៉ាងធ្ងន់ធ្ងរ ។
ហេតុការណ៍ខាងលើនេះបានកើតឡើងកាលពីរសៀលថ្ងៃទី២០ ខែឧសភា ឆ្នាំ២០២០ នៅភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។
អាជ្ញាធរភូមិបានឲ្យដឹងថា ក្មេងស្រីរងគ្រោះឈ្មោះ ឡូយ គន្ធា អាយុ៧ឆ្នាំ មានម្តាយឈ្មោះយិប ស្រីនាង អាយុ៣៣ឆ្នាំ ជាស្ត្រីមេម៉ាយ មុខរបរជាអ្នកលាងចាននៅហាងមួយកន្លែង រស់នៅក្នុងភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។
តាមប្រភពពីម្តាយក្មេងស្រីរងគ្រោះបានឱ្យដឹងថា នៅមុនពេលកើតហេតុ គាត់បានចេញទៅធ្វើការនៅហាង ស្រាប់តែមានអ្នកជិតខាងបានរត់មកប្រាប់ថា កូនរបស់គាត់រលាកទឹកក្តៅស្រោចពេញខ្លួន លុះពេលឮបែបនេះភ្លាម គាត់បានរត់មកមើលកូន ស្រាប់តែឃើញកូនកំពុងដេកឈឺផ្សារនៅក្នុងរោងផ្ទះបាយ ដោយរលាកទឹកក្តៅស្រោចលើភ្លៅទាំងសងខាង ហើយគាត់ក៏បានដឹកកូនយកមកព្យាបាលនៅមន្ទីរពេទ្យបង្អែកក្រុងសិរីសោភ័ណ។
បើតាមការអះអាងពីអ្នកជិតខាងបានឲ្យដឹងថា ស្ត្រីជាម្តាយក្មេងស្រីរងគ្រោះខាងលើជាស្ត្រីមេម៉ាយ មានមុខរបរជាអ្នកលាងចាននៅហាង ហើយស្ត្រីរូបនេះក្រខ្សត់ខ្លាំងណាស់ ហេតុដូច្នេះពួកគាត់អំពាវនាវដល់សប្បុរសជនជួយក្នុងការព្យាបាលក្មេងស្រីដែលរងគ្រោះដោយរលាកទឹកក្តៅខាងលើនេះផង ៕ (កែសម្រួលដោយ ៖ ធីតា)
ចែករំលែកព័តមាននេះ