រាជធានីភ្នំពេញ៖ ប្រសិនជាកម្ពុជាមានជើងហោះហើរត្រង់ (direct-fly) ពីសហរដ្ឋមេរិក មកប្រទេសកម្ពុជា នោះនឹងផ្តល់នូវផលចំណេញបានច្រើន ជាពិសេសអាចជួយដល់វិស័យសេដ្ឋរបស់ជាតិឲ្យបានរីកចម្រើនបានខ្លាំងមួយកម្រិតទៀត ។ យ៉ាងណាមិញនៅមានរឿងជាច្រើនទៀតពាក់ព័ន្ធនឹងការចរចារវាងប្រទេសទាំងពីរដើម្បីសម្រេចឲ្យបានកិច្ចព្រមព្រៀងផ្លូវអាកាសមួយនេះ ។
បើយោងតាមការលើកឡើង អ្នកនាំពាក្យលេខាធិការដ្ឋានអាកាសចរណ៍ស៊ីវិល បាននិយាយថា នៅពេលដែលប្រទេសណាមួយ ដែលមានជើងហោះហើរត្រង់ជាមួយក្រុមហ៊ុនសហរដ្ឋអាមេរិកនេះ ប្រទេសនោះនិងចំណេញខាងផ្នែកទេសចរណ៍ ទំនិញ ពាណ្ជិកម្ម វិនិយោគ និងសេដ្ឋកិច្ច។
លោក ស៊ីន ចាន់សិរីវត្ថា អ្នកនាំពាក្យលេខាធិការដ្ឋានអាកាសចរណ៍ស៊ីវិល បាននិយាយថា «យើងដឹងហើយថាប្រសិនជាមាន ជើងហោះហើរត្រង់ (អាមេរិក-កម្ពុជា) បើទោះជាដឹកទំនិញ ឬដឹកមនុស្សក៏ដោយ វាជាតំលៃបន្ថែម។ តូរយ៉ាង យើងមើលទៅប្រទេសជិតខាង ដូចជា ប្រទេសហ្វីលីពីន តៃវ៉ាន់ ថៃ និងប្រទេសវៀតណាមជាដើម ដែលសេដ្ឋកិច្ចរបស់ពួកគេមានការរីកចម្រើនខ្លាំង។»
លោកបានបន្តថា «វាជាកិច្ចពិភាក្សា ត្រូសត្រាយផ្លូវ លើគម្រោងនឹង ហើយយើងមិនប្រាកដថាពេលណានិងមានការព្រមព្រៀងគ្នាទេ ប៉ុន្តែវាអាចប្រើរយៈពេលយូរបន្តិច។ តួយ៉ាងប្រទេសវៀតណាមបានប្រើរយៈពេល៧ឆ្នាំ ទំរាំមានកិច្ចព្រមព្រាងជើងហោះហើរត្រង់ទៅ សហរដ្ឋអាមេរិកបាន» ។
លោក ចាន់សិរីវត្ថាបានបន្តថា បើទោះបីយ៉ាងនេះក្តី ប៉ុន្តែការពិភាក្សានេះគឺជាការត្រូសត្រាយផ្លូវ ឲ្យមានលក្ខណៈងាយស្រួលសម្រាប់ក្រុមហ៊ុននានា ក្នុងការបើកផ្លូវដល់ភាគីទាំងសងខាង ៕ (កែសម្រួលដោយ ៖ បុប្ផា)
ចែករំលែកព័តមាននេះ