ខេត្តព្រៃវែង ៖ បង្កងអូស្ត្រាលីទឹកសាប គឺជាបង្កងមួយប្រភេទដែលមានទីផ្សារល្អនាពេលបច្ចុប្បន្ន ហើយប្រជាពលរដ្ឋទូទៅក៏និយមចូលចិត្តទទួលទានផងដែរ ព្រោះវាមានសាច់ហាប់ល្អ និងរសជាតិឆ្ងាញ់មិនចាញ់បង្កងទឹកសាបរបស់ខ្មែរយើងនោះឡើយ។ ម្ចាស់កសិដ្ឋានបង្កងព្រៃវែងរុងរឿង លោកពូ យុន…
ខេត្តព្រៃវែង ៖ បង្កងអូស្ត្រាលីទឹកសាប គឺជាបង្កងមួយប្រភេទដែលមានទីផ្សារល្អនាពេលបច្ចុប្បន្ន ហើយប្រជាពលរដ្ឋទូទៅក៏និយមចូលចិត្តទទួលទានផងដែរ ព្រោះវាមានសាច់ហាប់ល្អ និងរសជាតិឆ្ងាញ់មិនចាញ់បង្កងទឹកសាបរបស់ខ្មែរយើងនោះឡើយ។
ម្ចាស់កសិដ្ឋានបង្កងព្រៃវែងរុងរឿង លោកពូ យុន សុផល ដែលជាមន្ត្រីរាជការចូលនិវត្តន៍មួយរូបនៅក្រុងព្រៃវែង បានចាប់យកអាជីពជាអ្នកចិញ្ចឹមបង្កងអូស្ត្រាលីទឹកសាបនេះ អស់រយៈពេលជិត២ឆ្នាំមកហើយ ហើយពេលនេះគាត់កំពុងតែកាក់កបខ្លាំង ដោយសារតែបង្កងរបស់គាត់លក់បានថ្លៃ និងសម្បូរទីផ្សារទៀត ជួយឱ្យជីវភាពគ្រួសារគាត់បានធូរធាច្រើនណាស់។
លោកពូ យុន សុផល បានឱ្យដឹងថា បង្កងអូស្ត្រាលីទឹកសាបនេះ ជាមធ្យមគេអាចលក់បានក្នុងតម្លៃ១Kg ចន្លោះពី៣០ដុល្លារ ទៅ៤០ដុល្លារ ទៅតាមទំហំរបស់វាតូច ឬធំ ប៉ុន្តែសម្រាប់កសិដ្ឋានរបស់លោកពេលនេះ គឺមិនទាន់ចិញ្ចឹមលក់ជាបង្កងសាច់នោះទេ គឺគាត់ចិញ្ចឹមលក់ជាកូនបង្កង និងបង្កងមេពូជ ដែលកូនបង្កងក្នុង១ក្បាលលក់បាន២ពាន់រៀល។
រីឯបង្កងមេពូជក្នុង១គូរលក់បានតម្លៃ១០ដុល្លារ ហើយជាមធ្យមក្នុង១ខែ គាត់អាចលក់កូនបង្កងបាន១៥០កូន និងបង្កងមេពូជបាន១២០ក្បាល ចំណែកឯម៉ូយរបស់គាត់ដែលជាអ្នកទិញយកទៅចិញ្ចឹមបន្ត ភាគច្រើនគឺមកពីខេត្តផ្សេងៗ ដូចជាខេត្តរតនគីរី មណ្ឌលគីរី និងក្រចេះជាដើម។
ម្ចាស់កសិដ្ឋានខាងលើបានឱ្យដឹងទៀតថា សព្វថ្ងៃនេះ គាត់មិនទាន់បានចិញ្ចឹមបង្កងជាលក្ខណៈយកសាច់លក់ផ្គត់ផ្គង់ទីផ្សារនោះទេ ក៏ប៉ុន្តែនៅពេលខាងមុខ គាត់នឹងបង្កើតអាងដើម្បីចិញ្ចឹមបង្កងសាច់សម្រាប់លក់ថែមទៀត គឺលក់ទាំងកូនបង្កង បង្កងមេពូជ និងបង្កងសាច់តែម្តង។
លោក យុន សុផល បញ្ជាក់ផងដែរថា ការចិញ្ចឹមបង្កងអូស្ត្រាលីទឹកសាបនេះ គឺមានភាពងាយស្រួលមិនពិបាកប៉ុន្មាននោះទេ ហើយសព្វថ្ងៃនេះ គឺសម្បូរទីផ្សារណាស់ ដូច្នេះគាត់ចង់ឱ្យប្រជាពលរដ្ឋដទៃទៀត អ្នកដែលមានដីទំនេរ សូមងាកមកចាប់យកមុខរបរចិញ្ចឹមបង្កងអូស្ត្រាលីទឹកសាបដូចរូបគាត់ដែរ ព្រោះវាផ្តល់ប្រាក់ចំណូលខ្ពស់ អាចជួយឱ្យជីវភាពយើងបានធូរធាជាងមុន។
ដោយឡែកលោក អ៊ុក សំណាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែងបានឲ្យដឹងថា សព្វថ្ងៃនៅខេត្តព្រៃវែង ពុំសូវមានអ្នកប្រកបរបរចិញ្ចឹមបង្កងអូស្ត្រាលីនេះទេ គឺមានតែគ្រួសារលោក យុន សុផល មួយគត់នៅភូមិ៤ សង្កាត់កំពង់លាវ ក្រុងព្រៃវែង ដែលចាប់យកមុខរបរនេះ និងដំណើរការរយៈពេលជាង១ឆ្នាំមកហើយ ឃើញថា ទីផ្សារ និងការចិញ្ចឹមបង្កងរបស់គ្រួសារនេះ ចេះតែរលូនទៅមុខ និងរីកចំរើនល្អណាស់។
លោក អ៊ុក សំណាង បានបញ្ជាក់ថា ក្នុងនាមមន្ទីរជំនាញ បើមានប្រជាពលរដ្ឋណាផ្សេងចាប់អារម្មណ៍ចង់ចាប់យកមុខរបរចិញ្ចឹមបង្កងនេះ មន្ទីរកសិកម្មខេត្ត និងធ្វើការគាំទ្រ ព្រមទាំងផ្តល់មន្ត្រីជំនាញចុះទៅបង្ហាត់បង្ហាញបច្ចេកទេសពីរបៀបក្នុងការចិញ្ចឹមដល់កន្លែងតែម្តង ដើម្បីជាការលើកទឹកចិត្តដល់ពួកគាត់ផង និងជួយឱ្យការងាររបស់ពួកគាត់ ទទួលបានជោគជ័យផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ