ខេត្តប៉ៃលិន ៖ ប្រជាពលរដ្ឋរស់នៅក្នុងភូមិកុយចំនួន២គ្រួសារបាននាំគ្នាទៅជម្រាបលោកមេភូមិឱ្យជួយអន្តរាគមន៍ និងណែនាំដល់អ្នកដុតសំរាម ខណ:ដុតរួចអត់នៅចាំពន្លត់ បណ្តាលឱ្យរាលឆេះដល់ដំណាំដាំដុះរបស់ពួកគាត់ និងប៊ិះឆេះរាលដាលចូលទៅដល់ផ្ទះរបស់ពួកគាត់ បង្កឱ្យមានការភ្ញាក់ផ្អើល ។
ហេតុការណ៍អ្នកជិតខាងដុតសម្រាមនៅព្រំដីទុកចោល បណ្តាលឱ្យរាលឆេះដល់ដំណាំប្រជាពលរដ្ឋ២គ្រួសារខាងលើនេះបានកើតឡើងកាលពីវេលាម៉ោង១២និង៣០នាទីព្រឹកថ្ងៃទី២០ ខែឧសភា ឆ្នាំ២០២០ ស្ថិតនៅចំណុចសំបូរ ក្នុងភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន ។
តាមប្រភពព័ត៌មានបានឱ្យដឹងថា ប្រជាពលរដ្ឋទាំង២គ្រួសារដែលត្រូវភ្លើងរាលឆេះដំណាំខាងលើនេះ គ្រួសារទី១-ឈ្មោះ ទឹម សុខុម ភេទប្រុស អាយុ៦៥ឆ្នាំ និងប្រពន្ធ ឈ្មោះកែប ប៉ិក អាយុ៥៥ឆ្នាំ ត្រូវភ្លើងឆេះរងការខូចខាតដូចជា ដើមដូង៥ដើម, ដើមត្នោត១០ដើម ដើមចន្ទី៣ដើម និងក្រសាំង១ដើម ។ ចំណែកគ្រួសារទី២-ឈ្មោះ សែត ណាក់ ភេទស្រី អាយុ៤៨ឆ្នាំ ត្រូវភ្លើងឆេះរងការខូចខាតដូចជាដើមស្វាយ៣ដើម ឆេះត្នោត៥ដើម និងឆេះដើមចេកអស់មួយចំនួនផងដែរ ។
តាមប្រភពព័ត៌មានបានឱ្យដឹងបន្តថា នៅព្រឹកថ្ងៃកើតហេតុ ខណ:ពួកគាត់ទៅចម្ការឆ្ងាយពីផ្ទះ ស្រាប់តែមានគេដុតសម្រាមនៅក្បែរព្រំដីរបស់ពួកគាត់ ហើយអត់បាននៅចាំពន្លត់នោះទេ ពេលដុតរួច បែរជាដើរទៅផ្ទះបាត់ បណ្តាលឱ្យឆាបឆេះរាលដាលរហូតដំណាំរបស់ពួកគាត់ និងប៊ិះរាលឆេះចូលដល់ផ្ទះរបស់ពួកគាត់ថែមទៀត តែបានកូនចៅឃើញក៏នាំគ្នាពន្លត់ទាន់ពេល ។
តាមប្រភពព័ត៌មានបានឱ្យដឹងបន្តទៀតថា ទោះបីជាយ៉ាងណា ពួកគាត់មិនប្តឹងទាមទារឱ្យអ្នកដុតនេះសងថ្លៃខូចខាតអ្វីនោះទេ តែពួកគាត់ទៅជម្រាបលោកមេភូមិឱ្យណែនាំដល់អ្នកដុត សម្រាម ត្រូវតែប្រុងប្រយ័ត្ន ដោយមិនត្រូវដុតរួចទុកចោលបែបនេះទេ ព្រោះបច្ចុប្បន្ននៅជាប់នឹងដីចម្ការរបស់គាត់មានសុទ្ធតែដើមឈើងាប់ គរទុកចោល និងស្មៅស្ងួតជាច្រើន បើដុតរួចមិននៅចាំពន្លត់បែបនេះ អាចនឹងឆេះរាលដាលងាប់ដំណាំពួកគាត់ជាច្រើន ។
ពាក់ព័ន្ធទៅនឹងបញ្ហាខាងលើនេះ លោក ឡិញ ឡី មេភូមិភ្នំកុយ ក៏បានប្រាប់ប្រជាពលរដ្ឋឱ្យមានការប្រុងប្រយ័ត្ន ដោយមុននឹងដុតស្មៅ ឬសម្រាមនៅក្នុងបរិវេណដីចម្ការរបស់ខ្លួន ត្រូវត្រៀមខ្លួនពន្លត់ជាមុន ព្រោះភ្លើងឆេះកាន់តែខ្លាំង មិនអាចពន្លត់ទាន់នោះទេ និងអាចរាលទៅឆេះដំណាំ និងផ្ទះអ្នកដទៃដែលនៅក្បែរនោះ នាំឱ្យកើតរឿងរ៉ាវជាក់ជាមិនខាន ។
លោកមេភូមិបានបន្តទៀតថា អ្នកដុតសម្រាមគឺមានផ្ទះនៅក្បែរផ្ទះរបស់ជនរងគ្រោះទាំងពីរគ្រួសារខាងលើដែរ ដោយពួកគាត់ហាក់ដូចជារស់នៅមានការមិនចុះសម្រុងនឹងគ្នា ពាក់ព័ន្ធនឹងព្រំដីផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ