ខេត្តបាត់ដំបង ៖ អស់រយៈពេល៣ឆ្នាំកន្លងមកហើយ ដែលប្រជាពលរដ្ឋរស់នៅជុំវិញតំបន់ទេសចរណ៍
«អាងកំពូងពួយ» នាំគ្នាដើររកខ្យង «ជប៉ុនឬខ្យងពងក្រហម» លក់ឲ្យឈ្មូញ គ្រាន់បានកម្រៃផ្គត់ផ្គង់ជីវិភាពគ្រួសារ ហើយឈ្មួញកណ្ដាលដែលប្រមូលទិញខ្យងប្រភេទ បាននាំចេញយកទៅលក់បន្តនៅប្រទេសថៃ ដែលមានតំលៃខ្ពស់គួរសម ។ គេមិនបានដឹងអំពីប្រវត្តិខ្យងនេះ ពិតប្រាដកទេ តែអ្នកស្រុកកំពីងពួយនិយមហៅឈ្មោះខ្យងនេះ «ខ្យងជប៉ុន ឬ ខ្យងពងក្រហម»។ ខ្យង់ប្រភេទនេះ មានមាត់ធំជាងខ្យងស្រែ ឬខ្យងបឹង និងមានពងពណ៏ក្រហម ហើយត្រូវគេប្រទះឃើញសំបូរបំផុតនៅរដូវវស្សាមិនថា នៅក្នុងបឹងឬនៅតាមវាលស្រែឡើយ។ ប៉ុន្តែនៅដូវប្រាំងគេប្រទះឃើញមាននៅក្នុងបឹងដែលមានទឹក ពិសេសនៅក្នុង«អាងកំពីងពួយ» រីឯតាមស្រែគ្មានទេ ព្រោះគ្មានទឹក។
អ្នកភូមិដែលរស់នៅតំបន់អាងកំពីងពួយក្នុង ឃុំតាគ្រាម និងឃុំស្នឹង ស្រុកបាណន់ បាននិយាយថា កាលដើមឡើយគ្មានអ្នកទិញខ្យងនេះទេ តែប៉ុន្មានឆ្នាំចុងក្រោយនេះ ស្រាប់តែមានអ្នកដើរទិញក្នុងតំលៃខ្ពស់គួរសម ដែលជាហេតុនាំឲ្យអ្នកភូមិនានា នាំគ្នាដើររកខ្យងលក់ទាំងយប់ទាំងថ្ងៃ។ ប្រភពដដែលបានបញ្ជាក់ថា នៅរដូវវស្សាដែលសំបូរខ្យង អ្នកភូមិម្នាក់អាចរកបានយ៉ាងតិច១០គីឡីក្រាម (ឆ្កឹសយកតែសាច់) ក្នុង១យប់ឬ១ថ្ងៃ ហើយតំលៃចាប់ពី១,០០០០រៀល ដល់១,១០០០រៀលក្នុង១គីឡូក្រាម។ ប៉ុន្តែចាប់តាំងពីមានការផ្ទុះនូវជំងឺ «កូវីដ១៩ថ្មី» នេះមក តំលៃខ្យង់បានធ្លាក់សល់ត្រិម៦,០០០រៀល ទៅ៧,០០០រៀលក្នុងមួយគីឡូក្រាមរហូតដល់សព្វថ្ងៃនេះ ហើយអ្នកភូមិក៏រកមិនសូវបានដូចនៅរដូវវស្សាដែរ។
ឈ្មួញកណ្ដាលម្នាក់ដែលបោះទីតាំងឈរទិញខ្យង «ជប៉ុនឬខ្យងពងក្រហម» នេះនៅភូមិតាង៉ែន ឃុំតាគ្រាម ស្រុកបាណន់ គឺ លោកចូវ ឆយ បាននិយាយថា តំលៃខ្យងសព្វថ្ងៃពិតជាធ្លាក់មកនៅត្រិម ៦,០០០រៀល ទៅ ៧,០០០រៀលមែន ហើយក៏មិនសូវសំបូរដូចរដូវវស្សាដែរ។ ឈ្មូញខ្សយរូបនេះ បានប្រាប់ថា ថៃហៅខ្យងនេះ «ខ្យងឈរី» តែខ្មែរយើងហៅ«ខ្យងជប៉ុនឬខ្យងពងក្រហម»។ ខ្យងនេះមិនមុនគ្មានទិញហូមទេ តែសព្វថ្ងៃមានទីផ្សារនាំចេញទៅលក់នៅប្រទេសថៃ។ លោកចូវ ឆយ បានបញ្ជាក់យ៉ាងដូច្នេះថា « ខ្ញុំឈរទិញខ្យងនេះរយះពេល៣ឆ្នាំកន្លងមកហើយ ដោយនាំចេញទៅលក់នៅប្រទេសថៃ តាមច្រកទ្វារព្រំដែន អូរស្មាច់ ខេត្តឧត្តមានជ័យ»។
ពាក់ព័ន្ធនឹងការហូបខ្យង់ឈរីនេះ លោកចូវ ឆយ បានពន្យល់ថា ពិតមែនតែខ្យងនេះកំពុងត្រូវប៉ាន់ខ្លាំងលើទីផ្សារប្រទេសថៃ តែអ្នកហូបខ្យងនេះអាចប៉ះពាល់ដល់សេរីរាង្គរបស់មនុស្ស បើយើងមិនបានធ្វើវាឲ្យបានស្អាតល្អ។ គាត់បានស្រង់សំដីពីជនជាតិថៃដែលនិយមហូបខ្យងនេះមកប្រាប់ថា ថៃដែលនិយមហូបខ្យងនេះ បានប្រាប់ថា «អ្នកហូបខ្យងឈរីនេះ ត្រូវធ្វើឲ្យស្អាត ជាពិសេស ត្រូវកាត់យកភ្នែកវាចេញ ។ មិនត្រូវយកខ្យងនេះទៅធ្វើម្ហូបទាំងភ្នែកវាទេ ព្រោះបើហូបដោយទាំងភ្នែកខ្យងនេះ វាអាចធ្វើឲ្យយើងស្រវាំង ឬ ងងឹតភ្នែកនៅថ្ងៃក្រោយ ។ ជនជាតិថៃ បានបញ្ជាក់ច្បាស់ណាស់អំពីបញ្ហានេះ ដូច្នេះបើបងប្អូនចង់ហូបខ្យងនេះ ចាំបាច់ត្រូវតែកាត់ភ្នែកវាចោល៕
ចែករំលែកព័តមាននេះ