ប្រទេសចិន ៖ ទីក្រុងសៀងហៃ បានរាយការណ៍ពីករណីឆ្លងជំងឺកូវីដ១៩ថ្មីមួយទៀត ដែលវាជាករណីទី២ហើយក្នុងសប្តាហ៍នេះ ដែលមានប្រភពមកពីទីក្រុងវូហាន ខេត្តហ៊ូប៉ី ដូចទៅនឹងករណីមុន។
យោងតាមគណៈកម្មការសុខភាពសៀងហៃ បានឱ្យដឹងថា អ្នកជំងឺគឺជាស្ត្រីអាយុ ៤៧ឆ្នាំ មកពីទីក្រុងវូហាន ដែលបានរួមដំណើរជាមួយប្តីរបស់នាងទៅកាន់ទីក្រុងសៀងហៃ ដើម្បីទទួលការព្យាបាលសុខភាពកាលពីសប្តាហ៍មុន។
ស្ត្រីដែលមានត្រកូល ខឺ (Ke) បានមកជិះរថភ្លើងល្បឿនលឿននៅស្ថានីយរថភ្លើងសៀងហៃ ឈ្មោះថា Hongqiao កាលពីសប្តាហ៍មុន ហើយបានទៅជិះនៅខ្សែរថភ្លើងក្រោមដីលេខ៨ និង ១០ ទៅកាន់សណ្ឋាគាររបស់គាត់ ដែលស្ថិតនៅលើផ្លូវ South Xizang។
បន្ទាប់មក គាត់បានទៅជាមួយប្តីរបស់គាត់ ទៅកាន់មន្ទីរពេទ្យ។ ពួកគេបានឆ្លងកាត់ការត្រួតពិនិត្យសីតុណ្ហភាព ហើយបង្ហាញលេខកូដសុខភាពពណ៌បៃតងជាធម្មតា។ ពេលត្រលប់មកវិញនៅថ្ងៃទី៨ ខែឧសភា គាត់និងប្តី ក៏បានធ្វើតេស្តរកកូវីដ១៩ នៅទីក្រុងវូហានដែរ តែឃើញលទ្ធផលអវិជ្ជមាន។
ដោយសារប្តីរបស់គាត់ត្រូវការសម្រាកព្យាបាលនៅមន្ទីរពេទ្យ ដើម្បីធ្វើការវះកាត់ គាត់បាននៅជាមួយគ្នានៅទីនោះ។ ថ្ងៃច័ន្ទនេះ មន្ទីរពេទ្យបានឱ្យប្តីប្រពន្ធទាំងពីរ ធ្វើតេស្តម្តងទៀត ស្រាប់តែរកឃើញថា គាត់មានផ្ទុកកូវីដ១៩ ខណៈដែលប្តីរបស់គាត់មិនមានផ្ទុកនោះទេ។ ពេលនេះ គាត់ត្រូវបានគេដាក់ឱ្យនៅដាច់ពីគេ នៅឯមជ្ឈមណ្ឌលសុខភាពសាធារណៈក្រុងសៀងហៃ។
អាជ្ញាធរសុខាភិបាលបានតាមដានទំនាក់ទំនងជិតស្និទ្ធចំនួន៤ ជាមួយនឹងអ្នកស្រី ខឺ ហើយដាក់ពួកគេនៅក្រោមការសង្កេត។ វាមិនច្បាស់ទេថា តើគាត់មានទំនាក់ទំនងអ្វីខ្លះជាមួយនឹងមនុស្សផ្សេងទៀតនៅក្នុងមន្ទីរពេទ្យ? ៕ ដកស្រង់ចេញពីវេបសាយ ៖ shanghaiist (កែសម្រួលដោយ ៖ បុប្ផា)
ចែករំលែកព័តមាននេះ