អុីតាលី ៖ កីឡាករ Cristiano Ronaldo បានវិលត្រឡប់មកចូលរួមជាមួយក្រុម Juventus សម្រាប់ការហ្វឹកហាត់កាលពីថ្ងៃអង្គារ បន្ទាប់ពីអវត្តមាន៧២ថ្ងៃដែលរាប់បញ្ចូលទាំង២សប្តាហ៍ចុងក្រោយដែលរូបគេ តម្រូវឲ្យនៅដាច់ដោយឡែក…
អុីតាលី ៖ កីឡាករ Cristiano Ronaldo បានវិលត្រឡប់មកចូលរួមជាមួយក្រុម Juventus សម្រាប់ការហ្វឹកហាត់កាលពីថ្ងៃអង្គារ បន្ទាប់ពីអវត្តមាន៧២ថ្ងៃដែលរាប់បញ្ចូលទាំង២សប្តាហ៍ចុងក្រោយដែលរូបគេ តម្រូវឲ្យនៅដាច់ដោយឡែក ក្រោយវិលត្រឡប់ពីប្រទេសកំណើតវិញ ។
ម្ចាស់ពាន Ballon d’Or ៥សម័យកាលវ័យ ៣៥ឆ្នាំរូបនេះ ត្រូវបានគេថតជាប់ពេលធ្វើដំណើរមកដល់ទីលានហ្វឹកហាត់ Continassa របស់ក្លិប Juventus ក្នុងរថយន្តខ្មៅមួយ ។ តាមការបញ្ជាក់បានឲ្យដឹងថា ខ្សែប្រយុទ្ធព័រទុយហ្គាល់រូបនេះ បានទទួលការត្រួតពិនិត្យសុខភាពម្តងទៀត មុនពេលអាចចូលរួមហ្វឹកហាត់ជាមួយគ្រូបង្វឹកលោក Maurizio Sarri និងមិត្តរួម ។
សូមរំលឹកថា C.Ronaldo បានហោះត្រឡប់ទៅស្រុកកំណើតវិញ ក្នុងតំបន់ Madeira ប្រទេសព័រទុយហ្គាល់ បន្ទាប់ពីក្រុម Juventus បានយកឈ្នះលើក្រុម Inter Milan ដោយលទ្ធផល ២-០ នៅពីក្រោយការប្រកួតបិទទ្វារកីឡដ្ឋានកាលពីថ្ងៃទី៨ ខែមីនា ដែលជាការប្រកួតចុងក្រោយរបស់ពួកគេ មុនពេលលីគកំពូល Serie A ត្រូវបានផ្អាកដោយសារតែការផ្ទុះឡើងនៃវីរុសកូវីដ-១៩ ។
កីឡាកររូបនេះ បានវិលត្រឡប់មកកាន់ទីក្រុង Turin ប្រទេសអ៊ីតាលីវិញ ដោយយន្ដហោះឯកជនផ្ទាល់ខ្លួននៅដើមខែនេះ ។ នៅពេលមកដល់ភា្លម រូបគេត្រូវចំណាយពេលពីរសប្តាហ៍នៅក្នុងផ្ទះ ក្រោមច្បាប់ផ្តាច់ខ្លួនរបស់ប្រទេសអ៊ីតាលី ។
ក្លិបនៅក្របខណ្ឌ Serie A ត្រូវបានអនុញ្ញាតឲ្យវិលត្រឡប់ចូលជំរំហ្វឹកហាត់វិញកាលពីថ្ងៃទី៤ ខែឧសភា ប៉ុន្តែស្ថិតក្រោមការរឹតត្បិតមួយចំនួន ចំពោះការហ្វឹកហាត់លក្ខណៈជាក្រុមតូចៗ ហើយត្រូវតែគោរពតាមគោលការណ៍ដែលលីគ និងក្លិបបានដាក់ចេញ ។
ក្របខណ្ឌ Serie A មានក្តីសង្ឃឹមក្នុងការចាប់ផ្តើមសកម្មភាពប្រកួតប្រជែងឡើងវិញ ក្រោយកាលពីថ្ងៃច័ន្ទរដ្ឋាភិបាលប្រទេសនេះ បានបញ្ជាក់ថា ព្រឹត្តិការណ៍ធំៗទាំងអស់ នឹងមិនអាចកើតឡើងបានទេរហូតដល់ថ្ងៃទី១៤ ខែមិថុនា។
Juventus នៅតែអវត្តមានខ្សែប្រយុទ្ធអាហ្សង់ទីន Gonzalo Higuain ដែលទើបតែវិលត្រឡប់ពីស្រុកកំណើតមកដល់ប្រទេសអ៊ីតាលីវិញ កាលពីថ្ងៃព្រហស្បតិ៍សប្តាហ៍មុន ហើយរូបគេត្រូវចំណាយពេល ១០ថ្ងៃទៀតក្នុងការដាក់ឲ្យនៅដាច់ដោយឡែក ៕ (ដកស្រង់ចេញពី Rreuters)
ចែករំលែកព័តមាននេះ