រាជធានីភ្នំពេញ ៖ រថយន្តដឹកដីមួយគ្រឿងបានបើកបរក្នុងល្បឿនលឿន ហើយជាន់ហ្វ្រាំងមិនស៊ីក៏ទាញចង្កូតគេចរថយន្តដឹកដីមួយគ្រឿងទៀតដែលនៅពីមុខ ស្រាប់តែជ្រុលបុកឡើងខឿនទ្រូងផ្លូវកល់សសរគ្រឹះផ្សាយពាណិជ្ជកម្ម បណ្តាលអោយរថយន្តនោះដាច់កង់អស់២រងការខូចខាតយ៉ាងធ្ងន់ធ្ងរ។
គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោងប្រមាណ១២និង៤០នាទីថ្ងៃត្រង់ថ្ងៃទី២០ខែឧសភា ឆ្នាំ២០២០ នៅចំណុចមហាវិថីឈ្នះឈ្នះ គល់ស្ពានព្រែកព្នៅខាងលិច ក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
រថយន្តដឹកដីមួយគ្រឿងដែលរងការខូចខាត ម៉ាកហ៊ីណូ ពណ៌ទឹកប្រាក់លាយខៀវ ពាកស្លាកលេខ ភ្នំពេញស្វាយរៀង ៣A-០២០១ បើកបរដោយឈ្មោះពេញ វុទ្ធី ភេទប្រុស អាយុ២៥ឆ្នាំ មានលំនៅភូមិជ្រៃកោងលិចឃុំខ្នា ស្រុកសាមគ្គីមានជ័យ ខេត្តកំពង់ឆ្នាំង ។
តាមប្រភពពីសាក្សីបានអោយដឹងថា នៅមុនពេលកើតហេតុ គេឃើញរថយន្តមួយខាងលើមានដឹកដីពេញ ធ្វើដំណើរក្នុងទិសដៅពីលិចទៅកើត ស្របជាមួយរថយន្តដឹកដីមួយគ្រឿងផ្សេងទៀត លុះពេលធ្វើដំណើរ មកចំណុចកើតហេតុ ស្រាប់តែរថយន្តនោះក៍បានទាញចង្កូតគេចរថយន្តដែលនៅពីមុខ ក៏ជ្រុលឡើងខឿន ខណ្ឌចែកទ្រូងផ្លូវ និងបុកសរសគ្រឹះ បណ្តាលអោយកល់ជាប់ និងដាច់កង់ទាំង២តែម្តង ។ បន្ទាប់ពីកើតហេតុ អ្នកបើកបរត្រូវបាននគរបាលឃាត់ខ្លួនយកទៅសួរនាំផងដែរ។
តាមប្រភពពីអ្នកបើកបរបានអោយដឹងថា មូលហេតុដែលកើតមានគ្រោះថ្នាក់ខាងលើ គឺដោយសារតែ ហ្វ្រាំងមិនស៊ី ហើយនៅមុនពេលកើតហេតុ រថយន្តបានដឹកដីចេញពីរណ្តៅបឹងតាមោកយកទៅចាក់នៅដីលីយ៉ុងផាត់ ។ ដោយសាតែររថយន្តមួយទៀតនៅពីមុខបង្អង់ល្បឿន ទើបគាត់ជាន់ហ្វ្រាំងមិនស៊ីក៏ទាញចង្កូតឡើងទ្រូងផ្លូវ ដើម្បីបញ្ចៀសគ្រោះថ្នាក់។
ក្រោយពេលកើតហេតុ ទាំងរថយន្តនិងអ្នកបើកបរ ត្រូវបាននគរបាលបញ្ចូនទៅកាន់ការិយាល័យ ដើម្បីដោះស្រាយសងការខូចខាត៕ (កែសម្រួលដោយ ៖ ធីតា)
ចែករំលែកព័តមាននេះ