ខេត្តបន្ទាយមានជ័យ ៖ ភាគីថៃគ្រោងបើកច្រកព្រំដែនកម្ពុជា-ថៃឱ្យដំណើរការឡើងវិញ នៅថ្ងៃទី១ ខែមិថុនា ២០២០ដើមខែក្រោយនេះ ។ នេះជាការលើកឡើងដោយលោកអភិបាលខេត្តក្នុងកិច្ចប្រជុំគណៈបញ្ជាការឯកភាពរដ្ឋបាលខេត្ត នៅថ្ងៃទី១៩ ឧសភា ឆ្នាំ២០២០ នៅសាលប្រជុំសាលាខេត្តបន្ទាយមាន
ជ័យ ។
លោក ង៉ោ ម៉េងជ្រួន អភិបាលរងខេត្តបន្ទាយមានជ័យបានប្រសាសន៍ថា ភាគីថៃបានបិទច្រកទ្វារព្រំដែនកម្ពុជា-ថៃ ដើម្បីបង្ការនិងទប់ស្កាត់ជំងឺកូវីដ១៩ និងប្រកាសប្រទេសដាក់ក្នុងគ្រាអាសន្ន ហើយពលករខ្មែរដែលភាគីថៃចាប់បញ្ជូនមកតាមច្រករបៀងក្នុង១ថ្ងៃៗ មានមិនតិចជា១៥០ ទៅ២០០នាក់ ស្ទើររាល់ថ្ងៃ ។ បើគិតតាំងពីមុនថ្ងៃចូលឆ្នាំមានរាប់ម៉ឺននាក់ហើយ ។
លោកបានបញ្ជាក់ថា លោកបានទទួលព័ត៌មានពីភាគីថៃដែលគ្រោងបើកច្រកទ្វារព្រំដែនកម្ពុជា-ថៃនៅថ្ងៃទី១ ខែមិថុនាខាងមុខនេះ បើសិនរាជរដ្ឋាភិបាលមិនបន្តការប្រកាសអាសន្នទៀតទេនោះ ខេត្តបន្ទាយមានជ័យ មានព្រំប្រទល់ជាប់ប្រទេសថៃមានប្រវែង១៧៦ គីឡូម៉ែត្រ ហើយមានច្រកទ្វារជាមួយប្រទេសថៃមាន៖ ១-ច្រកទ្វារអន្តរជាតិប៉ោយប៉ែត ។
២-ច្រកតំបន់ព្រំដែនម៉ាឡៃ ។
៣-ច្រកតំបន់ព្រំដែនបឹងត្រកួន ។ នេះមិនរាប់ច្រករបៀងរាប់សិបតាមព្រំដែននោះទេ ។
លោកឧត្តមសេនីយ៍ទោ ឈុន ម៉ៅ មេបញ្ជាការទិសទី១បន្ទាយមានជ័យបានលើកឡើងថា ពេលភាគីថៃបិទច្រកព្រំដែនគឺពលករខ្មែរសំរុកចូលមកប្រទេសវិញ១ថ្ងៃ រាប់រយនាក់តាមច្រកទ្វារអន្តរជាតិប៉ោយប៉ែត ។ លោកថា នៅពេលនេះក៏មានពលករចំណាកស្រុកខុសច្បាប់លួចចេញតាមច្រករបៀងខុសច្បាប់តាមរយៈមេខ្យល់ត្រូវបានចាប់បញ្ជូនមកវិញរាល់ថ្ងៃដែរ ។
លោក អ៊ុំ រាត្រី អភិបាលខេត្តបន្ទាយមានជ័យបានមានប្រសាសន៍ណែនាំដល់អាជ្ញាធរស្រុក-ក្រុងជាប់ព្រំដែន និងកងកម្លាំងដែលឈជើងតាមបន្ទាត់ព្រំដែនត្រូវទប់ស្កាត់ឱ្យបានពលករចំណាកស្រុកខុសច្បាប់តាមរយៈមេខ្យល់ ដើម្បីការពារសុវត្ថិភាពបងប្អូនប្រជាពលរដ្ឋដែលលួចចូលទៅរកការងារធ្វើនៅប្រទេសថៃ ។
លោកបានដាក់វិធានការដល់កម្លាំងមានសមត្ថកិច្ចត្រូវផ្សព្វផ្សាយដល់ប្រជាពលរដ្ឋឱ្យមានការយល់ដឹងពីការធ្វើចំណាកស្រុកខុសច្បាប់ហើយត្រូវស្រាវជ្រាវចាប់ខ្លួនឱ្យបាន ចំពោះមេខ្យល់ដែលបានបោកប្រាស់ប្រជាពលរដ្ឋយកទៅធ្វើការនៅប្រទេសថៃត្រូវចាត់ការទៅតាមច្បាប់ ៕
ចែករំលែកព័តមាននេះ