រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់ដែលអះអាងថាមានជំងឺពោះវៀនដុះខ្នែង រួចរត់ចេញពីមន្ទីរពេទ្យ ព្រោះតែអត់មានលុយឲ្យពេទ្យ ហើយគ្រូពេទ្យអត់មើល បន្ទាប់មកអង្គុយចុកពោះស្រែកយំឱ្យប្រជាពលរដ្ឋប្រមូលលុយបានជិត២០ម៉ឺនរៀល ហើយក៏ត្រូវដឹកទៅមន្ទីរពេទ្យ ប៉ុន្តែបែរជាបុរសរូបនេះសុំរថយន្តសង្គ្រោះចុះតាមផ្លូវ…
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់ដែលអះអាងថាមានជំងឺពោះវៀនដុះខ្នែង រួចរត់ចេញពីមន្ទីរពេទ្យ ព្រោះតែអត់មានលុយឲ្យពេទ្យ ហើយគ្រូពេទ្យអត់មើល បន្ទាប់មកអង្គុយចុកពោះស្រែកយំឱ្យប្រជាពលរដ្ឋប្រមូលលុយបានជិត២០ម៉ឺនរៀល ហើយក៏ត្រូវដឹកទៅមន្ទីរពេទ្យ ប៉ុន្តែបែរជាបុរសរូបនេះសុំរថយន្តសង្គ្រោះចុះតាមផ្លូវ រួចគេចខ្លួនបាត់ទាំងយប់តែម្តង បង្កឱ្យមានការភ្ញាក់ផ្អើលកាលពីម៉ោង8យប់ ថ្ងៃទី18 ខែឧសភា ឆ្នាំ2020 តាមបណ្តោយផ្លូវសុរាម្រិត នៅចំណុចក្បែរនឹងវិមានឯករាជ្យ ស្ថិតក្នុងសង្កាត់ចតុមុខ ខណ្ឌដូនពេញ ។
សេចក្តីរាយការណ៍បន្តថា បុរសរូបនេះឈ្មោះ អួក វិចិត្រ ភេទប្រុស អាយុ41ឆ្នាំ មុខរបរជាកម្មករសំណង់ បច្ចុប្បន្ននៅក្បែរនឹងឧណ្ណាលោម មានស្រុកកំណើតនៅស្រុកកោះសុទិន ខេត្តកំពង់ចាម។
តាមប្រភពពីបុរសខាងលើ បានឱ្យដឹងថា រូបគាត់ឈឺពោះវៀនដុះខ្នែងនេះជាយូរមកហើយ ប៉ុន្តែគ្មានលុយព្យាបាលនោះទេ រហូតដល់ថ្ងៃកើតហេតុនោះ ពោះវៀនដុះខ្នែងរបស់គាត់បានរើឡើងខ្លាំងធ្វើឱ្យគាត់ត្រូវរត់ទៅមន្ទីរពេទ្យ តែដោយជីវភាពខ្វះខាតខ្លាំងអត់លុយ អត់មានអ្នកមើលថែ គ្រូពេទ្យទុករូបគាត់ចោល ធ្វើឲ្យរូបគាត់ទ្រាំលែងក៏រត់ចេញមកក្រៅរហូតមកដល់ក្បែរនឹងវិមានឯករាជ្យក៏អង្គុយស្រែកទ្រហោយំយកដៃស្ទាបពោះ រួចហើយស្រែកឱ្យយគេជួយ តែពេលនោះក៏មានបងប្អូនប្រជាពលរដ្ឋដែលមកហាត់ប្រាណមានការអាណិតអាសូរនាំគ្នាចូលជាថវិកាចំនួនសរុបទាំងអស់ជិត20ម៉ឺនរៀល គ្រាន់ទៅសំរាកព្យាបាល ។
បន្ទាប់ពីមានការភ្ញាក់ផ្អើលដល់សមត្ថកិច្ចមូលដ្ឋានប៉ុស្តិ៍ចតុមុខបានមកដល់រួចហើយក៏ទំនាក់ទំនងហៅរថយន្តសង្គ្រោះរបស់មន្ទីរពេទ្យកាល់ម៉ែត ដឹកយកបុរសនេះទៅព្យាបាលបាត់តែម្តង ។
ប៉ុន្តែអ្វីដែលមិនគួរឲ្យជឿនោះ គឺពេលដែលរថយន្តសង្គ្រោះរបស់មន្ទីរពេទ្យកាល់ម៉ែត ដឹកបុរសនេះយកទៅព្យាបាល បែរជាបុរសជាជនបោកប្រាស់រូបនោះ បានសុំចុះតាមផ្លូវ រួចគេចខ្លួនទៅបាត់ស្រមោលតែម្តង និងត្រូវបានខាងក្រុមរថយន្តសង្គ្រោះទាក់ទងមកប្រាប់សមត្ថកិច្ចវិញទាំងយប់ ។
លុះព្រឹកឡើង បន្ទាប់ពីមានការផ្សព្វផ្សាយព័ត៌មានរឿងអត់លុយព្យាបាលត្រូវគ្រូពេទ្យអត់មើលធ្វើឲ្យសប្បុរសជនមានការអាណិតអាសូរ និងចង់ជួយ ហើយក៏បានទៅស្រាវជ្រាវរកក្នុងមន្ទីរពេទ្យកាល់ម៉ែត ប៉ុន្តែរកអត់ឃើញនោះទេ ទើបដឹងថា ការពិតបុរសខាងលើរូបនេះ ជាមនុស្សឆបោកដែលតែងតែយកវិធីឈឺមកសុំលុយពីប្រជាពលរដ្ឋស្ទើរគ្រប់ទីកន្លែងក្នុងរាជធានីភ្នំពេញ ដូច្នេះបើសិនជាបងប្អូនណាឃើញបុរសខាងលើនេះទៀត ឈប់ជឿគាត់ទៅ ៕ (កែសម្រួលដោយ ៖ បុប្ផា)
ចែករំលែកព័តមាននេះ