ខេត្តកំពង់ស្ពឺ ៖ បុរសម្នាក់ដោយអាងអំណាចខ្លួនជាអធិការរងនគរបាលស្រុកភ្នំស្រួចបានទៅសង់ផ្ទះនៅលើផ្លូវប្រសព្វចំណុចក្បែរមជ្ឈមណ្ឌលវប្បធម៌ពុទ្ធសាសនាកម្ពុជា ដែលជាដីរបស់ឧទ្យានជាតិគីរីរម្យទាំងបំពាន។
បុរសដែលសង់ផ្ទះនៅលើដីរបស់ឧទ្យានជាតិទាំងបំពានច្បាប់នេះ ត្រូវបានស្គាល់ថា មានឈ្មោះសួន ចាន់ ជាអធិការរងនគរបាលស្រុកភ្នំស្រួចចំណុះស្នងការដ្ឋាននគរបាលខេត្តកំពង់ស្ពឺ។
បើតាមមន្ត្រីបរិស្ថានមួយរូបដែលឈរជើងនៅតំបន់ឧទ្យានជាតិគិរីរម្យ បានប្រាប់ថា ពីមុនកន្លែងដែលលោកសួន ចាន់ អធិការងសង់ផ្ទះនេះ គឺជាចំណោទយ៉ាងជ្រៅ ។ ក្រោយមកអំឡុងឆ្នាំ 2014 មជ្ឈមណ្ឌលវប្បធម៌ពុទ្ធសាសនាកម្ពុជា ត្រូវបានប្រមុខថ្នាក់ដឹកនាំអនុញ្ញាតឲ្យសាងសង់នៅលើផ្ទៃដីចំនួនជាង 100 ហិកតា ដោយកាលនោះលោកសួន ចាន់ ប្រហែលជាមានទំនាក់ទំនងជាមួយក្រុមអ្នកម៉ៅការកាយដី ហើយក៏បានហៅឲ្យក្រុមអ្នកមើលការកាយដីយកដីទៅចាក់នៅចំណុចមុខផ្លូវចូលមជ្ឈមណ្ឌលវប្បធម៌នេះ ដោយប្រាប់ក្រុមអ្នកម៉ៅការថា សាងសង់រោងយាម។
ក្រោយមកនៅឆ្នាំ 2017 ស្រាប់តែលោកសួន ចាន់ មិនបានសង់រោងយាមដូចការនិយាយនោះទេ បែរជាមកសង់ផ្ទះ ហើយត្រូវបានក្រុមមន្ត្រីឧទ្យាននុរក្សធ្វើការហាមឃាត់មិនឲ្យសង់ផ្ទះនោះទេ។ តែលោកសួន ចាន់ ដោយអាងអំណាចខ្លួនជាអធិការរងនគរបាលស្រុកភ្នំស្រួច នៅតែគឃ្លើនឱ្យជាងសាងសង់ទាំងបំពាន បើទោះជាមន្ត្រីបរិស្ថានយើងចុះទៅហាមឃាត់ 6 ទៅ 7ដងក៏ដោយ ក្រោយពេលសង់ហើយ លោកសួន ចាន់ ក៏បានយកប្រពន្ធ និងកូនមកស្នាក់នៅជាអចិន្ត្រៃយ៍តែម្ដង ដោយមានលក់ដូររបស់របរថែមទៀតផង។
មន្ត្រីបរិស្ថានដដែលបន្តថា ចំណុចដែលលោកសួន ចាន់ សង់ផ្ទះនេះ គឺជាកន្លែងដែលស្ថិតក្នុងគម្រោងរបស់មជ្ឈមណ្ឌលវប្បធម៌ពុទ្ធសាសនាសាងសង់ពង្រីកផ្លូវឲ្យធំ ដើម្បីចៀសវាងការគ្រោះថ្នាក់ជាយថាហេតុណាមួយ ព្រោះចំណុចកន្លែងដែលលោកសួន ចាន់ សង់ផ្ទះនេះ គឺជាផ្លូវប្រសព្វតែម្ដង។
ហើយអ្វីដែលធ្វើឱ្យខាងមន្ត្រីបរិស្ថានមានការហួសចិត្តនិយាយជាមួយលោកសួន ចាន់ មិនកើតនោះ គឺត្រង់ថា នៅពេលដែលមន្ត្រីចុះមកធ្វើការហាមឃាត់ បែរជាលោកសួន ចាន់ ប្រើពាក្យសំដីថា អ្នកសង់ផ្ទះនៅលើគីរីរម្យនេះ សុទ្ធតែខុសច្បាប់ ហេតុអ្វីបានជាមិនឃាត់ បែរជាមកឃាត់តែរូបលោកម្នាក់ទៅវិញ?
ហើយមានការលើកឡើងផងដែរថា ការដែលលោកសួន ចាន់ និយាយដូច្នេះ ទំនងជាគាត់ភ្លេចខ្លួនថា គាត់គឺជាមន្ត្រីអនុវត្តច្បាប់ តែបែរជាមកបំពានច្បាប់បែបនេះ ចុះបើគាត់ជាអ្នកអនុវត្តច្បាប់ហើយ ហើយបំពានច្បាប់បែបនេះ តើអ្នកណាគេអនុវត្តតាម?
ព័ត៌មានបន្ថែមមានផ្សាយនៅលើកាសែតកោះសន្តិភាព ។
ចែករំលែកព័តមាននេះ