ខេត្តបាត់ដំបង ៖ បន្ទាប់ពីដាំក្បាលចុះយ៉ាងគំហុក កាលពីអំឡុងផ្ទុះជំងឺ «កូវីដ១៩ថ្មី» តំលៃគ្រាប់ឈូកទុំនៅពេលនេះ ហាក់ស្ទុះងើបឡើងវិញបន្តិច ក្រោយពីជំងឺដ៏កាចសាហាវនេះ មានសភាពធូរស្រាលនៅក្នុងប្រទេសកម្ពុជា។ នេះបើតាមការអះអាងរបស់កសិករដាំឈូក…
ខេត្តបាត់ដំបង ៖ បន្ទាប់ពីដាំក្បាលចុះយ៉ាងគំហុក កាលពីអំឡុងផ្ទុះជំងឺ «កូវីដ១៩ថ្មី» តំលៃគ្រាប់ឈូកទុំនៅពេលនេះ ហាក់ស្ទុះងើបឡើងវិញបន្តិច ក្រោយពីជំងឺដ៏កាចសាហាវនេះ មានសភាពធូរស្រាលនៅក្នុងប្រទេសកម្ពុជា។ នេះបើតាមការអះអាងរបស់កសិករដាំឈូក នៅក្នុង «អាងកំពីងពួយ» ដែលស្ថិតនៅភូមិតាង៉ែន ឃុំតាគ្រាម ស្រុកបាណន់។
កសិករឈ្មោះ សូន ស៊ត ភេទស្រី អាយុ៣៨ឆ្នាំ បានប្រាប់កោះសន្តិភាព នៅព្រឹកថ្ងៃទី១៨ ឧសភា ថា តំលៃគ្រាប់ឈូកបានធ្លាក់តំលៃដល់៣,០០០រៀល ឬ៣,៥០០រៀលក្នុង១គីឡូក្រាម កាលពី២ ៣ខែមុន ក្នុងអំឡុងពេលផ្ទុះជំងឺ «កូវីដ១៩ថ្មី» ខ្លាំងពាសពេញពិភពលោក ។
ប៉ុន្តែពេលនេះ តំលៃគ្រាប់ឈូកហាក់ងើបឡើងវិញបន្តិចហើយ ស្របពេលដែលដំណាំឈូកក្នុងពេលនេះ កសិករកំពុងប្រមូលផល។ អ្នកស្រី សូន ស៊ត បានបញ្ជាក់ថា ពេលនេះ គ្រាប់ឈូកបានហក់ឡើងខ្ពស់បន្តិចហើយ គឺតំលៃគ្រាប់ឈូកទុំ១គីឡូក្រាមថ្លៃចន្លោះពី៤,៥០០រៀល ដល់៥,០០០រៀល។ ហើយគេរំពឹងថា តំលៃគ្រាប់ឈូកនេះ នឹងអាចឡើងថ្លៃជាងនេះ រហូតដល់ជិត១ម៉ឺនរៀលក្នុង១គីឡូក្រាម នៅក្នុងខែ៧ ឬខែ៨ខាងមុខនេះ។
ដោយឡែក ឈ្មូញកណ្ដាលដែលធ្លាបទទួលទិញគ្រាប់ឈូកជារៀងរាល់ឆ្នាំ ក៏បានបង្ហាញពីការរំពឹងទុកដូចការលើកឡើងរបស់កសិករដែរ ។ ឈ្មូញកណ្ដាលរូបនេះ បាននិយាយថា បច្ចុប្បន្ន កសិករបានចាប់ផ្ដើមប្រមូលផលឈូកជាបណ្ដើរៗហើយ ហើយតំលៃគ្រាប់ឈូកក៏ល្អជាងប៉ុន្មានខែមុនដែរ។
នៅក្នុងអំឡុង នៃការផ្ទុះជំងឺកូវីដ១៩ថ្មី ទីផ្សារគ្រាប់ឈូកហាក់ដាំក្បាលចុះយ៉ាងខ្លាំង តែពេលនេះងើបឡើងវិញជាបន្តបន្ទាប់។ សូមបញ្ជាក់ថា ជារៀងរាល់ឆ្នាំ ប្រជាកសិករបាននាំគ្នាដាំដំណាំឈូករាប់រាយហិកតា នៅក្នុង« អាងកំពីងពួយ » ដែលជាតំបន់ទេសចរណ៍ដ៏ល្បីល្បាញ នៅក្នុងស្រុកបាណន់ ខេត្តបាត់ដំបង។ ក្រៅពីធ្វើស្រែចំការ ប្រជាពលរដ្ឋមួយចំនួន ដែលរស់នៅតំបន់នោះបាននាំគ្នាដាំឈូក ដើម្បីយកផ្លៃខ្ចី ឬ ចាស់លក់ ដើម្បីរកប្រាក់ចំណូលក្នុងគ្រួសារ។ កសិករខ្លះបានជួសដីគេដើម្បីដាំឈូក រីឯខ្លះទៀតបានដាំដុះលើដីខ្លួនឯង នៅក្នុងអាងទឹកដ៏ធំសម្បើមនេះ។
ពាក់ព័ន្ធនឹងការដាំដំណាំឈូកនេះ ទិន្នផលដែលប្រមូលបានវិញ បើតាមការអះអាងរបស់កសិករថា ឆ្នាំនេះដំណាំឈូកដែលកសិករបានដាំ ស្ទើរគ្រប់ៗគ្នាហាក់ទទូលបានទិន្និផលល្អគួរសម បើប្រៀបធៀបទៅនឹងឆ្នាំមុនៗ។ កសិករបានបញ្ជាក់ថា ដំណាំឈូកដាំលើផ្ទៃដីទំហំ២ហិកតា អាចប្រមូលបានគ្រាប់ប្រហែលជិត១តោន ហើយកសិករអាចទទូលបានប្រាក់ចំណេញច្រើន ព្រោះដាំណាំឈូកមិនសូវចំណាយទុនច្រើន ដូចដាំណាំកសិកម្មផ្សេងៗទេ៕
ចែករំលែកព័តមាននេះ