រាជធានីភ្នំពេញ ៖ ក្នុងកាលៈទេសៈ ប្រទេសកម្ពុជាស្ថិតក្នុងស្ថានភាពរាលដាលខ្លាំងនៃកូវីដ ១៩ រាជរដ្ឋាភិបាលបានប្រកាសបិទអាជីវកម្មមួយចំនួនដើម្បីទប់ស្កាត់ការរីករាលដាល កាន់តែខ្លាំង ដូចជាក្លឹបកម្សាន្ត រោងចក្រ កន្លែងហាត់ប្រាណ…
រាជធានីភ្នំពេញ ៖ ក្នុងកាលៈទេសៈ ប្រទេសកម្ពុជាស្ថិតក្នុងស្ថានភាពរាលដាលខ្លាំងនៃកូវីដ ១៩ រាជរដ្ឋាភិបាលបានប្រកាសបិទអាជីវកម្មមួយចំនួនដើម្បីទប់ស្កាត់ការរីករាលដាល កាន់តែខ្លាំង ដូចជាក្លឹបកម្សាន្ត រោងចក្រ កន្លែងហាត់ប្រាណ ជាពិសេសគឺកន្លែងណាដែល មានការជួបជុំគ្នាច្រើន ។ ប៉ុន្តែនៅពេលស្ថានភាពនេះ ហាក់ប្រសើរឡើងវិញ អាជីវកម្មមួយ ចំនួនក៏បានបើកឡើងវិញបណ្ដើរៗ បើទោះបីជារាជរដ្ឋាភិបាលមិនទាន់ប្រកាសឱ្យបើកជា ផ្លូវការក្ដី ក្នុងនោះគេឃើញថា កន្លែងហាត់ប្រាណ ម៉ាហ្សា ស្ទីមសោណាជាដើម ។
បើយោងតាមម្ចាស់ក្លឹបហាត់ប្រាណមួយកន្លែងនៅបណ្ដោយផ្លូវវេងស្រេងបាននិយាយថាលោកបានចាប់ផ្ដើមបើកក្លឹបហាត់ប្រាណឡើងវិញ នៅក្នុងរយៈពេលប៉ុន្មានថ្ងៃនេះ ដោយឃើញថាស្ថានភាព កូវីដ ១៩ នៅកម្ពុជា បានធូរស្រាលឡើងវិញ ហើយមិនមានការ ឆ្លងថ្មីក្នុងរយៈពេលជាងមួយខែកន្លងទៅនេះ ។
ម្ចាស់ក្លឹបហាត់ប្រាណរូបនេះ បាននិយាយថា ថ្វីត្បិតតែស្ថានភាពកូវីដ ១៩ នេះ បានធូរស្រាលក៏ពិតមែន តែលោកបានដាក់វិធានការតឹងតែងចំពោះ អ្នកចូលមកហាត់ ប្រាណដោយវាស់កំដៅ និងតម្រូវឱ្យលាងដៃជាមួយទឹកអាល់កុលមុននឹងហាត់ប្រាណ ហើយក៏លើកទឹកចិត្តឱ្យអ្នកចូលហាត់ប្រាណមានកន្លែងលាងដៃ និងស្ព្រៃអាល់កុល សម្រាប់បាញកន្លែងដែលត្រូវហាត់ ។ ធ្វើបែបនេះគឺជាការចូលរួមបង្កើនការទប់ស្កាត់ការ ឆ្លងកូវីដ ១៩ កុំឱ្យមានការរីករាលដាលម្ដងទៀត ។
ចំណែកក្លឹបហាត់ប្រាណមួយកន្លែងទៀត នៅម្ដុំស្ទឹងមានជ័យក៏ឃើញថា មានអ្នក ចូលហាត់ពេញៗតែម្ដង តែក្លឹបហាត់ប្រាណនេះក៏មានការវាស់ស្ទង់កំដៅ មុននឹងអនុញ្ញា តឱ្យភ្ញៀវចូលហាត់ដែរ និងមានការលាងដៃនឹងអាល់កុលដល់ភ្ញៀវផងដែរ ។
ម្ចាស់ក្លឹបរូបនេះ បាននិយាយថា លោកលួចបើកតិចៗដោយមានវិធានការការពារ គឺដើម្បីបានចំណូលខ្លះសម្រាប់ទប់ទល់នឹងការចំណាយប្រចាំថ្ងៃ និងការជួលផ្ទះជួល កន្លែងគេ បើសិនជានៅបិទតទៅទៀត ក្លឹបលោកប្រហែលជាត្រូវរើចេញហើយ ព្រោះមិន មានលុយបង់ បើទោះបីជាម្ចាស់ទីតាំងបានអនុគ្រោះមួយចំនួនក្ដី ។ លោកបន្តថា ៖ « តាម ពិតបើសិនជាជំងឺនេះ វានៅតែរាលដាល យើងក៏មិនទាន់បើកដែរ ក៏ប៉ុន្តែស្ថានភាពបានល្អ ប្រសើរហើយក៏មានក្លឹបជាច្រើនទៀត បានចាប់ផ្ដើមបើកបណ្ដើរៗ យើងក៏ដាច់ចិត្តបើកដំ ណើរការវិញ ដោយអនុវត្តន៍តាមវិធានការការពារយ៉ាងម៉ឺងម៉ាត់ផងដែរ » ។
បុរស់ម្នាក់ឈ្មោះ ពិសិដ្ឋ ដែលចូលចិត្តក្នុងការទៅហាត់ប្រាណនៅក្លឹបហាត់ប្រាណ បាននិយាយថា លោកក៏ខ្លាចកូវីដ ១៩ ដែរ ក៏ប៉ុន្តែលោកទៅហាត់ប្រាណមិនមែនទៅបង្ក ជំងឺនោះទេ គឺទៅដើម្បីសុខភាព ព្រោះលោកហាត់ប្រាណនៅក្នុងក្លឹបអស់រយៈពេលបីទៅ ៤ឆ្នាំមកហើយ ដូច្នេះនៅពេលមិនបានហាត់ប្រាណ ចេះតែមានអារម្មណ៍ថាមិនសុខ អ៊ីចឹង ហើយចេះតែទៅចូលហាត់ប្រាណលេងៗ ជាមួយមិត្តភក្ដិដទៃទៀត ។
លោកកត់សម្គាល់ឃើញថា អ្នកដែលចូលមកក្លឹបហាត់ប្រាណ គឺភាគច្រើន តែងតែ មានអាល់កុលមួយដបតូច ទុកបាញ់សម្លាប់មេរោគទៅលើឧបករណ៍ ដែលខ្លួនត្រូវប្រើ ហើយនៅពេលខ្លួនប្រើហើយក៏បាញ់ម្ដងទៀត ដើម្បីទុកឱ្យអ្នកដែលមកហាត់តាមក្រោយ ហាត់បន្ត និងបាញ់បន្ថែមទៀតមុននឹងគេចាប់ផ្ដើមហាត់ ។
លោកបន្តថា តាមពិតទៅ កាលពីកំឡុងរដ្ឋាភិបាលរឹតបន្តឹងលោកក៏បានហាត់នៅ ផ្ទះមួយរយៈ ក៏ប៉ុន្តែ ការហាត់នៅផ្ទះមិនអាចអស់ដៃអស់ជើងទេ ត្រូវការឧបករណ៍ជំនួយ ។ នេះ គឺសម្រាប់អ្នកដែលចូលចិត្តលេងសាច់ដុំ ។
បើតាមមន្ត្រីជាន់ខ្ពស់ក្រសួងសុខាភិបាល បានព្រមានពីការផ្ទុះឡើងវិញបើសិនជា ពលរដ្ឋមិនមានការការពារត្រឹមត្រូវ ហើយក៏ព្រមានពលរដ្ឋដោយមិនគួរមើលស្រាលស្ថាន ភាពឡើងវិញ គឺត្រូវតែមានការប្រុងប្រយ័ត្នឱ្យបានខ្ពស់បន្ថែមទៀត បើទោះបីជាពេលនេះ ស្ថានភាពនេះលែងមានអ្នកឆ្លង និងមិនមានអ្នកកំពុងសម្រាកព្យាបាលក្ដី ៕
ចែករំលែកព័តមាននេះ