ខេត្តត្បូងឃ្មុំ ៖ នៅតាមដងផ្លូវជាតិលេខ៧ ត្រើយខាងកើតទន្លេមេគង្គក្នុងឃុំទន្លេបិទ ស្រុកត្បូងឃ្មុំ មានប្រជាពលរដ្ឋបានចាប់យកអាជីពលក់ត្រី និងបង្កងមានមិនដល់១០កន្លែងនោះទេ។ ជាមួយនោះដែរ គេតែងតែសង្កេតឃើញមានអ្នកធ្វើដំណើរតាមម៉ូតូ និងរថយន្តតូចធំចូលទិញយកទៅធ្វើម្ហូបពិសារ ហើយរបរនេះក៏បានជួយបង្កើនប្រាក់ចំណូលដល់គ្រួសារមួយកម្រិតផងដែរ។
បើតាមអ្នកលក់ត្រីឈ្មោះ នី រ៉ ជាជនជាតិខ្មែរអ៊ិស្លាម រស់នៅភូមិព្រែកតូច ឃុំទន្លេបិទ បានប្រាប់ឲ្យដឹងនៅព្រឹកថ្ងៃទី១៨ ខែឧសភា ឆ្នាំ២០២០នេះថា ចាប់តាំងពីពេលដែលបានប្រកបរបរលក់ត្រី និងបង្កងនៅតាមដងផ្លូវជាតិនេះរយៈពេលជិតមួយឆ្នាំហើយ។ ក្នុងពេលចេញលក់ដំបូងមានមនុស្សតែ២ទៅ៣នាក់ប៉ុណ្ណោះ ហើយក៏លក់ដាច់ទទួលបានប្រាក់ចំណេញគ្រាន់បើសម្រាប់ដោះស្រាយជីវភាពគ្រួសារ។ លុះក្រោយមក ដោយសារតែឃើញគាត់លក់ដាច់ អ្នកផ្សេងទៀតក៏បង្កើតរបរលក់ដូរដូចគាត់ដែរ មានរហូតទៅដល់ជាង១០កន្លែងឯណោះ។
អ្នកលក់ត្រីខាងលើរៀបរាប់ឲ្យដឹងទៀតថា សម្រាប់ត្រីគ្រុំមាស លក់ក្នុងមួយគីឡូតម្លៃ២៥.០០០រៀល ត្រីតានេល1kgតម្លៃ៣ម៉ឺនរៀល និងបង្កងមួយគីឡូក្រាមតម្លៃ៥ម៉ឺនរៀល។ ប្រសិនបើថ្ងៃណា ដែលលក់ដាច់អាចទទួលបានប្រាក់ចំណេញប្រមាណ៥ម៉ឺនរៀល ក្នុងមួយថ្ងៃ ។ ប៉ុន្តែមកដល់សព្វថ្ងៃ របស់នេះហាក់បីដូចជាលែងចង់ប្រកបលក់បន្តទៀតដោយសារតែលក់មិនដាច់ គឺមានការថមថយច្រើន។ ហើយមានពេលខ្លះលក់មិនដាច់ក៏មានត្រូវចូលដើមទៀតផង គឺចាប់តាំងពីពេលដែលផ្ទុះជំងឺកូវី១៩មក ត្រី និងបង្កងលក់មិនសូវដាច់នោះទេ ពេលខ្លះលក់ខាតចូលដើមក៏មានដែរ។
បើតាមអ្នកលក់ត្រីឈ្មោះ សាន់ រីណា ជាជនជាតិខ្មែរឥស្លាម បានប្រាប់ឲ្យដឹងថា ចំពោះត្រីគ្រុំមាស គាត់លក់ក្នុងមួយគីឡូតម្លៃជាង២ម៉ឺន រៀលបង្កង១គីឡូក្រាមតម្លៃ ៤៥.០០០រៀល ហើយត្រីទាំងនេះទទួលពីម៉ូយមកពីក្រុងកំពង់ចាម សម្រាប់លក់បន្ត។ មានពេលខ្លះអ្នកធ្វើដំណើរតាមរថយន្តបានមកចូលទិញបង្កងរបស់ប្អូនគាត់ លុះពេលយកទៅធ្វើម្ហូបទទួលទានមានរសជាតិឆ្ងាញ់ គេក៏កម្មង់តាមទូរស័ព្ទឱ្យផ្ញើតាមរថយន្តយកទៅដល់ខេត្តក្រចេះ និងអ្នកដំណើរខ្លះទៀតនៅរាជធានីភ្នំពេញ ក៏កម្មង់ទិញជាច្រើនគីឡូដែរ ដើម្បីយកទៅធ្វើម្ហូបពិសារក្នុងពិធីឡើងគេហដ្ឋានផ្សេងៗក៏មាន។
ចំណែកអ្នកស្រីសាក់ ស៊ីណ: អាយុ៤៥ឆ្នាំ ជាកន្លែងលក់ទី៣ ប្រាប់ដឹងថា គាត់ជាស្ត្រីមេម៉ាយមានកូនបីនាក់នៅក្នុងបន្ទុកគ្រួសារ គាត់បានចាប់ផ្ដើមលក់ត្រី និងបង្កងនៅតាមដងផ្លូវជាតិលេខ៧ ក្នុងឃុំទន្លេបិទនេះរយៈពេល៣ខែហើយ ។ សម្រាប់ថ្ងៃលក់ដាច់ គឺថ្ងៃសៅរ៍ និងអាទិត្យ ឬក៏ថ្ងៃមានបុណ្យទានជាដើម ដែលអាចលក់ដូរដាច់ក្នុងមួយថ្ងៃបានចំនួន១០គីឡូក្រាម ហើយទទួលប្រាក់ចំណេញប្រមាណ៥ម៉ឺនរៀល សម្រាប់ផ្គត់ផ្គង់ជីវភាពក្រុមគ្រួសារ ។
អ្នកលក់ត្រីបានបញ្ជាក់ថា ក្នុងពេលដែលត្រី និងបង្កងលក់ដាច់តាមដងផ្លូវជាតិលេខ ៧ ក្នុងឃុំទន្លេបិទ មានជាច្រើនកន្លែងរហូតទៅដល់ជាង១០នាក់ តែមកដល់ពេលនេះរបបលក់ត្រីនេះហាក់បីដូចជាធ្លាក់ចុះ ធ្វើឲ្យចំនួនអ្នកលក់នៅសល់ប្រមាណ៥ទៅ៦នាក់ប៉ុណ្ណោះ។
លោកភិន ឈុន មេឃុំទន្លេបិទ មានប្រសាសន៍ឲ្យដឹងថា ក្នុងពេលដែលបងប្អូនខ្មែរឥស្លាមបានចាប់ផ្ដើមលក់ក្នុងឆ្នាំ២០១៩ ត្រី និងបង្កងលក់ដាច់មានជាច្រើនកន្លែង ដោយតាមការសង្កេតផ្ទាល់មានចាប់ពីចំណុចម្ដុំមុខអាហារដ្ឋានបឹងទន្លេមាស ដល់ភូមិយាយស ឃុំទន្លេបិទ លុះមកដល់ពេលនេះមានអ្នកលក់មួយចំនួនត្រូវបានឈប់ ដោយសារតែលក់មិនដាច់ដូចពីមុន ចំណែកអ្នកខ្លះទៀតក៏នៅតែបន្តរបរលក់ដូរនេះបន្តទៀត ដើម្បីរកកម្រៃដោះស្រាយជីវភាពគ្រួសារផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ